ലണ്ടന്‍: യൂറോപ്യന്‍ യൂണിയനിലേക്കുള്ള ബ്രിട്ടന്റെ ഉല്‍പ്പന്ന കയറ്റുമതി പ്രതിവര്‍ഷം 6.5 ബില്യണ്‍ പൗണ്ട് വരെ കൂടുതലാകാമായിരുന്നുവെന്ന് പുതിയ പഠനം. ബ്രെക്സിറ്റിന് ശേഷം ഉല്‍പ്പന്നങ്ങളുടെ പരിശോധനയും സര്‍ട്ടിഫിക്കേഷനും ആവര്‍ത്തിക്കേണ്ടിവരുന്നതാണ് ബ്രിട്ടീഷ് കയറ്റുമതിക്കാര്‍ നേരിടുന്ന പ്രധാന വ്യാപാരതടസ്സങ്ങളിലൊന്നെന്ന് ഇന്‍സ്റ്റിറ്റ്യൂട്ട് ഫോര്‍ പബ്ലിക് പോളിസി റിസര്‍ച്ച് (ഐപിപിആര്‍) റിപ്പോര്‍ട്ട് ചൂണ്ടിക്കാട്ടുന്നു. 2021-ല്‍ ബ്രെക്സിറ്റിന് ശേഷമുള്ള പുതിയ വ്യാപാര ക്രമീകരണങ്ങള്‍ പ്രാബല്യത്തില്‍ വന്നതുമുതല്‍, ഉല്‍പ്പന്ന പരിശോധനയും സര്‍ട്ടിഫിക്കേഷനും പരസ്പരം അംഗീകരിക്കുന്ന കരാര്‍ ഇല്ലാത്തത് ബ്രിട്ടീഷ് കയറ്റുമതിക്കാര്‍ക്ക് പ്രതിവര്‍ഷം 3.7 ബില്യണ്‍ മുതല്‍ 6.5 ബില്യണ്‍ പൗണ്ട് വരെ അധിക കയറ്റുമതി നഷ്ടമുണ്ടാക്കിയിരിക്കാമെന്നാണ് ഐപിപിആറിന്റെ കണക്ക്. ഉയര്‍ന്ന കണക്കുപ്രകാരം ഇത് ബ്രിട്ടന്റെ ജിഡിപിയുടെ ഏകദേശം 0.18 ശതമാനത്തിന് തുല്യമാണ്.

ബ്രിട്ടനില്‍ പരിശോധനയും സര്‍ട്ടിഫിക്കേഷനും പൂര്‍ത്തിയാക്കിയ നിരവധി ഉല്‍പ്പന്നങ്ങള്‍ യൂറോപ്യന്‍ യൂണിയന്‍ വിപണിയില്‍ വില്‍ക്കുന്നതിനുമുമ്പ് വീണ്ടും യൂറോപ്യന്‍ യൂണിയന്‍ അംഗീകൃത സ്ഥാപനങ്ങളുടെ പരിശോധനയ്ക്ക് വിധേയമാക്കേണ്ടിവരുന്നുണ്ട്. ഇത് കമ്പനികള്‍ക്ക് അധിക ചെലവും കാലതാമസവും അനിശ്ചിതത്വവും സൃഷ്ടിക്കുന്നതായി റിപ്പോര്‍ട്ട് പറയുന്നു. ഈ സാഹചര്യത്തില്‍ ചില ബ്രിട്ടീഷ് കമ്പനികള്‍ യൂറോപ്യന്‍ യൂണിയനിലേക്കുള്ള കയറ്റുമതി അവസാനിപ്പിക്കുകയും മറ്റു ചില കമ്പനികള്‍ യൂറോപ്യന്‍ യൂണിയന്‍ രാജ്യങ്ങളില്‍ അനുബന്ധ സ്ഥാപനങ്ങള്‍ ആരംഭിക്കുകയും ചെയ്തതായും പഠനം ചൂണ്ടിക്കാട്ടുന്നു.

വാഹനമേഖലയ്ക്ക് ഏറ്റവും വലിയ തിരിച്ചടി

മോട്ടോര്‍ വാഹനങ്ങളും വാഹനഭാഗങ്ങളും, ഇലക്ട്രോണിക്‌സ്, ഫാര്‍മസ്യൂട്ടിക്കല്‍സ് എന്നീ മേഖലകളിലാണ് നഷ്ടം ഏറ്റവും കൂടുതലായി കണക്കാക്കുന്നത്. പരസ്പര അംഗീകാര കരാര്‍ നിലവിലുണ്ടായിരുന്നെങ്കില്‍ മോട്ടോര്‍ വാഹനങ്ങളുടെയും ഭാഗങ്ങളുടെയും കയറ്റുമതി പ്രതിവര്‍ഷം 2.48 ബില്യണ്‍ മുതല്‍ 3.42 ബില്യണ്‍ പൗണ്ട് വരെ കൂടുതലാകാമായിരുന്നുവെന്നാണ് ഐപിപിആറിന്റെ വിലയിരുത്തല്‍. ഇലക്ട്രോണിക്‌സ് മേഖലയില്‍ 1.17 ബില്യണ്‍ മുതല്‍ 1.67 ബില്യണ്‍ പൗണ്ട് വരെയും ഫാര്‍മസ്യൂട്ടിക്കല്‍ മേഖലയില്‍ 740 മില്യണ്‍ മുതല്‍ 820 മില്യണ്‍ പൗണ്ട് വരെയും അധിക കയറ്റുമതി സാധ്യമായിരുന്നുവെന്നാണ് കണക്കുകള്‍. ബ്രെക്സിറ്റിന് ശേഷമുള്ള നിയന്ത്രണ വ്യത്യാസങ്ങള്‍ മൂലം നഷ്ടമായ വ്യാപാരത്തിന്റെ വ്യാപ്തിയാണ് കണക്കുകള്‍ വ്യക്തമാക്കുന്നതെന്ന് ഐപിപിആര്‍ പറയുന്നു.

പരിശോധനകള്‍ പരസ്പരം അംഗീകരിക്കണമെന്ന് ആവശ്യം

ബ്രിട്ടനും യൂറോപ്യന്‍ യൂണിയനും തമ്മില്‍ 'മ്യൂച്വല്‍ റെക്കഗ്‌നിഷന്‍ എഗ്രിമെന്റ്' നടപ്പാക്കണമെന്നാണ് ഐപിപിആറിന്റെ നിര്‍ദേശം. ഇതിലൂടെ ബ്രിട്ടനിലെ അംഗീകൃത സ്ഥാപനങ്ങള്‍ നടത്തുന്ന ഉല്‍പ്പന്ന പരിശോധനകളും സര്‍ട്ടിഫിക്കേഷനും യൂറോപ്യന്‍ യൂണിയന്‍ അംഗീകരിക്കുകയും തിരിച്ചും സമാന സംവിധാനം നിലവില്‍ വരികയും ചെയ്യും. യൂറോപ്യന്‍ യൂണിയന്റെ ബന്ധപ്പെട്ട ഉല്‍പ്പന്ന മാനദണ്ഡങ്ങളുമായി ബ്രിട്ടന്‍ തുടര്‍ച്ചയായി പൊരുത്തപ്പെടുന്ന 'ഡൈനാമിക് അലൈന്‍മെന്റ്' സംവിധാനത്തിന്റെ അടിസ്ഥാനത്തിലുള്ള കരാറാണ് കൂടുതല്‍ സാമ്പത്തിക നേട്ടമുണ്ടാക്കുകയെന്ന് റിപ്പോര്‍ട്ട് വിലയിരുത്തുന്നു. ഇത്തരം കരാര്‍ നടപ്പാക്കിയാല്‍ ആവര്‍ത്തിച്ചുള്ള പരിശോധനകള്‍ ഒഴിവാക്കാനും കമ്പനികളുടെ ചെലവും കാലതാമസവും കുറയ്ക്കാനും യൂറോപ്യന്‍ യൂണിയനിലേക്കുള്ള ബ്രിട്ടീഷ് കയറ്റുമതി വര്‍ധിപ്പിക്കാനും കഴിയുമെന്ന് ഐപിപിആര്‍ വ്യക്തമാക്കി.