എസെക്സ്: പരിസ്ഥിതിയെക്കുറിച്ചുള്ള കടുത്ത ആശങ്കകള്ക്കിടെ സര്വകലാശാല വിദ്യാര്ഥിനി ജീവനൊടുക്കിയ സംഭവത്തില്, വീഗന് ഭക്ഷണരീതിയുമായി ബന്ധപ്പെട്ട പോഷകക്കുറവും കാരണമായതായി ഇന്ക്വസ്റ്റ് റിപ്പോര്ട്ട്. എസെക്സിലെ സാഫ്രോണ് വാര്ഡില് താമസിച്ചിരുന്ന ഇരുപത്തിയൊന്നുകാരിയായ ജോര്ജിന ഓവന്റെ മരണവുമായി ബന്ധപ്പെട്ട അന്വേഷണത്തിലാണ് ഈ കണ്ടെത്തല്. സ്വാന്സി സര്വകലാശാലയിലെ വിദ്യാര്ഥിനിയായ ജോര്ജിന രണ്ടായിരത്തി പത്തൊന്പത് സെപ്റ്റംബറിലാണ് ജീവനൊടുക്കിയത്. മരണാനന്തരമാണ് കഴിഞ്ഞ ആറുമാസത്തിലധികമായി അവര് ബി പന്ത്രണ്ട് സപ്ലിമെന്റ് കഴിച്ചിരുന്നില്ലെന്ന് കുടുംബം കണ്ടെത്തിയത്. വീഗന് ഭക്ഷണരീതിയിലൂടെ ബി പന്ത്രണ്ട് ആവശ്യത്തിന് ലഭിക്കുക പ്രയാസകരമാണെന്നും അതിനാല് സപ്ലിമെന്റുകളോ പോഷകങ്ങള് ചേര്ത്ത ഭക്ഷണങ്ങളോ അനിവാര്യമാണെന്നും റിപ്പോര്ട്ടില് ചൂണ്ടിക്കാട്ടുന്നു.
മാംസം, മത്സ്യവിഭവങ്ങള്, പാല്, മുട്ട തുടങ്ങിയവയില് ധാരാളമായി ലഭിക്കുന്ന ബി പന്ത്രണ്ട് ചുവന്ന രക്താണുക്കളുടെ ഉല്പാദനത്തിനും നാഡീവ്യവസ്ഥയുടെ പ്രവര്ത്തനത്തിനും ശരീരത്തിലെ പ്രധാന കോശപ്രവര്ത്തനങ്ങള്ക്കും അത്യന്താപേക്ഷിതമാണ്. ഇതിന്റെ കുറവ് വിളര്ച്ചയ്ക്കും നാഡീ സംബന്ധമായ പ്രശ്നങ്ങള്ക്കും മാനസികാരോഗ്യ പ്രശ്നങ്ങള്ക്കും കാരണമാകാമെന്നാണ് ആരോഗ്യ വിദഗ്ധരുടെ വിലയിരുത്തല്.
മരണത്തിന് മുന്പ് സപ്ലിമെന്റുകള് കഴിക്കാന് താന് മറന്നുപോയതായി ജോര്ജിന കുടുംബത്തോട് പറഞ്ഞിരുന്നു. പിന്നീട് കാനഡയില് നിന്ന് ഓര്ഗാനിക് മീഥൈല് കോബലാമിന് ബി പന്ത്രണ്ട് സ്പ്രേ വാങ്ങിയതായും അവര് അറിയിച്ചിരുന്നു. എന്നാല് പോസ്റ്റ്മോര്ട്ടം പരിശോധനയില് ജോര്ജിനയ്ക്ക് ബി പന്ത്രണ്ട് കുറവുണ്ടായിരുന്നുവെന്ന് കണ്ടെത്തി. മരണത്തിന് മുന്പുള്ള ദിവസങ്ങളില് ജോര്ജിനയുടെ പെരുമാറ്റത്തില് മാറ്റങ്ങള് പ്രകടമായിരുന്നുവെന്ന് കേംബ്രിജ്ഷയറിലെയും പീറ്റര്ബറോയിലെയും ഏരിയ കൊറോണര് എലിസബത്ത് ഗ്രേ പറഞ്ഞു. സ്വകാര്യ ഡയറികളില് അവരുടെ മാനസികാരോഗ്യം മോശമായിരുന്നുവെന്ന സൂചനകള് ഉണ്ടായിരുന്നുവെന്നും കോടതിയെ അറിയിച്ചു. ജോര്ജിനയ്ക്ക് ഉത്കണ്ഠ അനുഭവപ്പെട്ടതായി തിരിച്ചറിഞ്ഞതിനെ തുടര്ന്ന് മാനസികാരോഗ്യ പിന്തുണയും ഏര്പ്പെടുത്തിയിരുന്നു. രണ്ടായിരത്തി പത്തൊന്പത് സെപ്റ്റംബര് പത്തൊന്പതിന് ജോര്ജിനയെ വെയില്സിലേക്ക് തിരികെ കൊണ്ടുപോകാന് കുടുംബം തീരുമാനിച്ചിരുന്നു. എന്നാല് അന്നേ ദിവസം തന്നെ വീട്ടില് ജീവനൊടുക്കാന് ശ്രമിച്ച നിലയില് കുടുംബാംഗങ്ങള് അവരെ കണ്ടെത്തുകയായിരുന്നു. ഉടന് കേംബ്രിജിലെ അഡന്ബ്രൂക്ക് ആശുപത്രിയില് പ്രവേശിപ്പിച്ചു. ഗുരുതരാവസ്ഥയില് രണ്ട് ദിവസം ചികിത്സയില് കഴിഞ്ഞ ശേഷം ജോര്ജിന മരണത്തിന് കീഴടങ്ങുകയായിരുന്നു.
