ലണ്ടന്‍: എന്‍എച്ച്എസ് ആശുപത്രികളില്‍ ഷിഫ്റ്റിന് കയറുമ്പോള്‍ തന്നെ ഭയത്തോടെയാണ് പല നഴ്സുമാരും ജോലി ചെയ്യുന്നതെന്ന് റിപ്പോര്‍ട്ട്. ആവശ്യത്തിന് നഴ്സുമാര്‍ ഇല്ലാത്തതിനാല്‍ രോഗികള്‍ക്ക് സുരക്ഷിതമായ പരിചരണം നല്‍കാന്‍ കഴിയുന്നില്ലെന്ന ആശങ്കയാണ് ആരോഗ്യപ്രവര്‍ത്തകര്‍ക്കിടയില്‍ ശക്തമാകുന്നത്. Royal College of Nursing നടത്തിയ സര്‍വേയില്‍ 22 ശതമാനം നഴ്സുമാരും തങ്ങളുടെ ഷിഫ്റ്റുകളില്‍ ആവശ്യത്തിന് ജീവനക്കാര്‍ ഇല്ലെന്ന് വ്യക്തമാക്കിയിട്ടുണ്ട്. രോഗികളുടെ എണ്ണം വര്‍ധിക്കുമ്പോഴും ജീവനക്കാരുടെ ക്ഷാമം തുടരുന്നത് ആശുപത്രി സംവിധാനങ്ങളെ കടുത്ത സമ്മര്‍ദ്ദത്തിലാക്കുന്നുവെന്നാണ് റിപ്പോര്‍ട്ട്.

''രജിസ്റ്റേഡ് നഴ്സുമാരുടെ ഒഴിവുകള്‍ വ്യാപകമാകുന്നത് സ്ഥിരമായ സുരക്ഷാ പ്രതിസന്ധിയാണ് സൃഷ്ടിക്കുന്നത്. പ്രായമായവരും ഗുരുതര ആരോഗ്യപ്രശ്‌നങ്ങളുള്ളവരുമായ രോഗികളെ പരിചരിക്കേണ്ട സാഹചര്യത്തില്‍ ജീവനക്കാരുടെ കുറവ് അതീവ അപകടകരമായ അവസ്ഥയിലേക്ക് നയിക്കുന്നു,'' എന്ന് ആര്‍സിഎന്‍ ചീഫ് എക്സിക്യൂട്ടീവ് പ്രൊഫസര്‍ നിക്കോള റേഞ്ചര്‍ പറഞ്ഞു. ആരോഗ്യരംഗത്ത് ആവശ്യത്തിന് നഴ്സുമാരെ നിയമിക്കാത്തതും നഴ്സിംഗ് മേഖലയെ ശക്തിപ്പെടുത്തുന്നതില്‍ സര്‍ക്കാര്‍ പരാജയപ്പെട്ടതുമാണ് നിലവിലെ പ്രതിസന്ധിക്ക് കാരണമെന്ന് അവര്‍ ആരോപിച്ചു.

NHS Englandയിലെ പ്രായമായ രോഗികള്‍ക്കും ഗുരുതര ആരോഗ്യപ്രശ്‌നങ്ങളുള്ളവര്‍ക്കും ഇത് വലിയ അപകടസാധ്യതയാണെന്ന് ആര്‍സിഎന്‍ മുന്നറിയിപ്പ് നല്‍കുന്നു. കഴിഞ്ഞ വര്‍ഷം നഴ്സിംഗ് മേഖലയിലെ വളര്‍ച്ച എട്ട് വര്‍ഷത്തിനിടയിലെ ഏറ്റവും താഴ്ന്ന നിലയിലായിരുന്നുവെന്നും റിപ്പോര്‍ട്ടില്‍ പറയുന്നു. കഴിഞ്ഞ പത്ത് വര്‍ഷത്തിനിടെ എന്‍എച്ച്എസ് ഇംഗ്ലണ്ടില്‍ ഡോക്ടര്‍മാരുടെ എണ്ണം നഴ്സിംഗ് ജീവനക്കാരെ അപേക്ഷിച്ച് 51 ശതമാനം കൂടുതലായി വര്‍ധിച്ചതായും സംഘടന ചൂണ്ടിക്കാട്ടി. രോഗികളുടെ എണ്ണം വര്‍ധിക്കുന്ന സാഹചര്യത്തില്‍ നഴ്സുമാരുടെ നിയമനം അടിയന്തരമായി വര്‍ധിപ്പിക്കാത്ത പക്ഷം എന്‍എച്ച്എസ് ആശുപത്രികളിലെ സേവന നിലവാരത്തെയും രോഗി സുരക്ഷയെയും അത് ഗുരുതരമായി ബാധിക്കാമെന്ന ആശങ്കയാണ് ആരോഗ്യവിദഗ്ധര്‍ ഉയര്‍ത്തുന്നത്.