Iranയും Israelയും തമ്മിലുള്ള സംഘര്‍ഷവും അമേരിക്കയുടെ സൈനിക ഇടപെടലുകളും ആഗോള സമ്പദ്വ്യവസ്ഥയെ ബാധിക്കുന്നതിനിടെ യുകെയിലും ജീവിതച്ചെലവ് പ്രതിസന്ധി വീണ്ടും രൂക്ഷമാകുന്നു. ഇന്ധന-ഭക്ഷ്യവില വര്‍ധന ജനങ്ങളെ കടുത്ത സാമ്പത്തിക സമ്മര്‍ദത്തിലാക്കുന്ന സാഹചര്യത്തില്‍ രക്ഷാപ്രവര്‍ത്തന പദ്ധതികളുമായി രംഗത്തെത്തുകയാണ് ബ്രിട്ടീഷ് ചാന്‍സലര്‍ Rachel Reeves. അടുത്ത ആഴ്ച ജീവിതച്ചെലവ് പ്രതിസന്ധി നേരിടാനുള്ള പ്രത്യേക സഹായപദ്ധതി റേച്ചല്‍ റീവ്സ് പ്രഖ്യാപിക്കുമെന്നാണ് റിപ്പോര്‍ട്ടുകള്‍. ഇന്ധനവിലയും ഭക്ഷ്യവിലയും കുത്തനെ ഉയരുന്ന സാഹചര്യത്തില്‍ കുടുംബങ്ങളെയും ചെറുകിട ബിസിനസുകളെയും സംരക്ഷിക്കാന്‍ ലക്ഷ്യമിട്ടുള്ള പദ്ധതികളാണ് പരിഗണനയിലുള്ളത്. കുടുംബങ്ങളെ സഹായിക്കാന്‍ വിവിധ നടപടികള്‍ രൂപപ്പെടുത്താന്‍ ട്രഷറി ഉദ്യോഗസ്ഥര്‍ക്ക് ചാന്‍സലര്‍ നിര്‍ദേശം നല്‍കിയിട്ടുണ്ട്. എന്നാല്‍ എല്ലാവര്‍ക്കും ഒരുപോലെ ഇന്ധനബില്‍ സഹായം നല്‍കുന്നതിനുപകരം ഏറ്റവും കൂടുതല്‍ സഹായം ആവശ്യമുള്ള വിഭാഗങ്ങളിലേക്ക് പിന്തുണ പരിമിതപ്പെടുത്താനാണ് സര്‍ക്കാര്‍ ആലോചിക്കുന്നത്. അല്ലാത്തപക്ഷം പണപ്പെരുപ്പം വീണ്ടും കുതിച്ചുയരുമെന്ന ആശങ്കയാണ് സര്‍ക്കാരിനുള്ളത്.

സെപ്റ്റംബറില്‍ 5 പെന്‍സ് ഇന്ധന നികുതി വര്‍ധന നടപ്പാക്കാനായിരുന്നു സര്‍ക്കാരിന്റെ പദ്ധതി. എന്നാല്‍ നിലവിലെ സാഹചര്യത്തില്‍ അത് മാറ്റിവെക്കണമെന്ന ആവശ്യവും ശക്തമാകുകയാണ്. Strait of Hormuz മേഖലയിലെ പ്രതിസന്ധി രൂക്ഷമായതോടെ എണ്ണ-വാതകവിലകള്‍ വന്‍തോതില്‍ ഉയര്‍ന്നിരിക്കുകയാണ്. അതേസമയം, ഈ വര്‍ഷത്തിന്റെ ആദ്യ ആറുമാസത്തില്‍ ബ്രിട്ടീഷ് സമ്പദ്വ്യവസ്ഥ 0.6 ശതമാനം വളര്‍ച്ച രേഖപ്പെടുത്തിയതായും റിപ്പോര്‍ട്ടുകളുണ്ട്. എന്നിരുന്നാലും ഭക്ഷ്യവില വര്‍ധനയാണ് ഇപ്പോള്‍ ജനങ്ങളെ കൂടുതല്‍ ബാധിക്കുന്നത്. വര്‍ഷാവസാനത്തോടെ ചില ഭക്ഷ്യവസ്തുക്കളുടെ വില 50 ശതമാനം വരെ ഉയരാമെന്ന മുന്നറിയിപ്പും സാമ്പത്തിക വിദഗ്ധര്‍ നല്‍കുന്നു. അമേരിക്ക-ഇറാന്‍ സംഘര്‍ഷത്തെ തുടര്‍ന്നുള്ള എണ്ണ-വാതകവില വര്‍ധന ഭക്ഷ്യോത്പാദനച്ചെലവും ഉയര്‍ത്തിയിരിക്കുകയാണ്. വളവില വര്‍ധന, കാലാവസ്ഥാ വ്യതിയാന പ്രശ്‌നങ്ങള്‍, ആഗോള വിതരണ ശൃംഖലയിലെ തടസ്സങ്ങള്‍ എന്നിവയും ഭക്ഷ്യരംഗത്തെ പ്രതിസന്ധി കൂടുതല്‍ രൂക്ഷമാക്കുന്ന ഘടകങ്ങളായി മാറിയിരിക്കുകയാണ്. 2021 മുതല്‍ യുകെയില്‍ ജീവിതച്ചെലവ് പ്രതിസന്ധി ശക്തമായിരുന്നുവെങ്കിലും ഇപ്പോഴത്തെ വിലക്കയറ്റം സമീപകാല ചരിത്രത്തിലെ ഏറ്റവും വലിയ വര്‍ധനവുകളിലൊന്നായി വിലയിരുത്തപ്പെടുന്നു.