ലണ്ടന്‍: ഹോര്‍മുസ് കടലിടുക്ക് വഴി കടന്നുപോകുന്ന കപ്പലുകളുടെ സുരക്ഷ ഉറപ്പാക്കുന്നതിനായി യു.എസ്. സൈനിക ആക്രമണങ്ങള്‍ക്ക് ബ്രിട്ടീഷ് താവളങ്ങള്‍ ഉപയോഗിക്കാന്‍ അനുമതി നല്‍കി യുകെ. അടിയന്തര യോഗത്തില്‍ ബ്രിട്ടീഷ് മന്ത്രിസഭയാണ് തീരുമാനം എടുത്തത്. ബ്രിട്ടന്റെ താല്‍പ്പര്യങ്ങള്‍ക്കും പൗരന്മാരുടെ ജീവനും ഭീഷണിയാകുന്ന ഇറാന്റെ മിസൈല്‍ വിക്ഷേപണങ്ങളെ പ്രതിരോധിക്കാനാണ് നടപടി. നേരത്തെ തന്നെ യു.എസ്.ക്ക് താവളങ്ങള്‍ ഉപയോഗിക്കാന്‍ അനുമതി നല്‍കിയിരുന്നുവെന്ന് ബ്രിട്ടന്‍ വ്യക്തമാക്കി.
ബ്രിട്ടന്റെ തീരുമാനത്തോട് ഇറാന്‍ രൂക്ഷമായി പ്രതികരിച്ചു. ''സ്വയം പ്രതിരോധത്തിനുള്ള അവകാശം തങ്ങള്‍ക്കുണ്ട്,'' എന്ന് ഇറാന്‍ വിദേശകാര്യമന്ത്രി സെയ്ദ് അബ്ബാസ് അരാഗ്ചി വ്യക്തമാക്കി. ബ്രിട്ടീഷ് ജനങ്ങളുടെ ഭൂരിഭാഗവും യു.എസ്.-ഇസ്രായേല്‍ ആക്രമണങ്ങളില്‍ പങ്കാളികളാകാന്‍ താല്‍പ്പര്യമില്ലെന്നും, പ്രധാനമന്ത്രി കീര്‍ സ്റ്റാര്‍മര്‍ സ്വന്തം ജനങ്ങളുടെ ജീവന്‍ അപകടത്തിലാക്കുകയാണെന്നും ഇറാന്‍ ആരോപിച്ചു.
യു.എസ്. പ്രസിഡന്റ് ഡോണാള്‍ ട്രംപ്, ''ബ്രിട്ടീഷ് താവളങ്ങള്‍ നേരത്തെ തന്നെ അനുവദിക്കേണ്ടതായിരുന്നു,'' എന്ന് പ്രതികരിച്ചു. ഇറാനെ ആക്രമിക്കാന്‍ യു.എസ്.ക്ക് താവളങ്ങള്‍ വിട്ടുനല്‍കുന്നത് യുദ്ധത്തില്‍ നേരിട്ട് പങ്കാളിത്തമാണെന്ന് അരാഗ്ചി മുമ്പ് തന്നെ ബ്രിട്ടീഷ് വിദേശകാര്യമന്ത്രി യ്വേറ്റ് കൂപ്പറുമായി നടത്തിയ ഫോണ്‍ ചര്‍ച്ചയില്‍ മുന്നറിയിപ്പ് നല്‍കിയിരുന്നു
