ലണ്ടനിലും മറ്റു നഗരങ്ങളിലും ആയിരക്കണക്കിന് വേയ്പ് (ഇലക്ട്രോണിക് സിഗററ്റ്) ഷോപ്പുകള് mushroom ചെയ്തുവരികയാണ്. അന്വേഷണ റിപ്പോര്ട്ടുകള് പ്രകാരം, ഇവയില് പലതും സ്കൂളുകളുടെ പരിസരത്താണ് പ്രവര്ത്തിക്കുന്നത്. ആകര്ഷകമായ പരസ്യങ്ങളും, രുചികരമായ വിവിധ ഫ്ളേവറുകളും ഉപയോഗിച്ച് വിദ്യാര്ത്ഥികളെ ലക്ഷ്യമിടുന്നതായി കണ്ടെത്തിയിട്ടുണ്ട്.
പൊതുവെ ആരോഗ്യ പ്രശ്നങ്ങള് മാത്രമല്ല, വേയ്പ് ഷോപ്പുകളുടെ മറവില് കുട്ടികളെ ലക്ഷ്യമിട്ട് പ്രവര്ത്തിക്കുന്ന ഗ്രൂമിംഗ് ഗ്യാംഗുകള് വലിയൊരു അപകടമാണെന്ന് അധികൃതര് മുന്നറിയിപ്പ് നല്കുന്നു. പെണ്കുട്ടികളെ സൗജന്യ സാമ്പിളുകള് നല്കി വശീകരിച്ച് ലൈംഗികമായി ദുരുപയോഗം ചെയ്യുന്നതില് ഇത്തരം ഷോപ്പുകള് പങ്കാളികളാണെന്ന സംശയം പോലീസിനും സാമൂഹ്യപ്രവര്ത്തകര്ക്കും ഉണ്ട്.
ഗേള്സ് ഔട്ട് ലൗഡ് എന്ന സംഘടനയുടെ സ്ഥാപകയായ ജെയിന് കെന്യോണ് പറയുന്നതനുസരിച്ച്, വേയ്പ് നല്കി പലതവണ ദുരുപയോഗം ചെയ്യപ്പെട്ട പെണ്കുട്ടികള് സഹായം തേടി എത്തിയിട്ടുണ്ട്. മുന്പ് ഇക്ബാല് സിംഗ് എന്ന അഫ്ഗാന് പൗരന് വേയ്പ് നല്കി പെണ്കുട്ടികളെ ലൈംഗികമായി ദുരുപയോഗം ചെയ്ത കേസില് 22 വര്ഷത്തെ തടവിന് ശിക്ഷിക്കപ്പെട്ടിരുന്നു.
കുറ്റകൃത്യ നിരക്ക് വര്ദ്ധിച്ചതായി റിപ്പോര്ട്ട്
ലണ്ടന് മേയര് സാദിഖ് ഖാന് നഗരത്തിന്റെ സുരക്ഷിതത്വം ആവര്ത്തിച്ച് അവകാശപ്പെടുന്നുണ്ടെങ്കിലും, പുതിയ പഠന റിപ്പോര്ട്ടുകള് വ്യത്യസ്തമായ ചിത്രം വരച്ചുകാട്ടുന്നു. 2016-ല് അധികാരമേറ്റതിന് ശേഷം മോഷണം, ലൈംഗിക കുറ്റകൃത്യങ്ങള്, മയക്കുമരുന്ന് കേസുകള്, അക്രമ സംഭവങ്ങള് എന്നിവയില് വലിയ വര്ദ്ധനവ് രേഖപ്പെടുത്തിയതായി മെട്രോപോളിറ്റന് പോലീസിന്റെ കണക്കുകള് വ്യക്തമാക്കുന്നു.
മോഷണം: 140% വര്ദ്ധന
ലൈംഗിക കുറ്റകൃത്യങ്ങള്: 55% വര്ദ്ധന
മയക്കുമരുന്ന് കേസുകള്: 34% വര്ദ്ധന
അക്രമ സംഭവങ്ങള്: 27% വര്ദ്ധന
ഖാന് കഴിഞ്ഞ വര്ഷം കൊലപാതക നിരക്ക് കുറവാണെന്നും ഫോണ് മോഷണം കുറഞ്ഞുവെന്നും അവകാശപ്പെട്ടിരുന്നെങ്കിലും, തുടര്ന്ന് നടന്ന കൊലപാതകങ്ങളും വെടിവെപ്പുകളും നഗരത്തിലെ സുരക്ഷാ അവസ്ഥയെ ചോദ്യം ചെയ്യുന്നതായി റിപ്പോര്ട്ട് ചൂണ്ടിക്കാണിക്കുന്നു.
ജനസംഖ്യ വര്ദ്ധനയും കുറ്റകൃത്യങ്ങളും
ലണ്ടനിലെ ജനസംഖ്യ വര്ദ്ധിച്ചതും കുറ്റകൃത്യങ്ങളുടെ വര്ദ്ധനവിന് കാരണമാകാമെന്ന വാദം നിലനില്ക്കുന്നുണ്ടെങ്കിലും, സാമൂഹിക സുരക്ഷാ സംവിധാനങ്ങള് ശക്തിപ്പെടുത്തേണ്ടത് അടിയന്തിരമാണെന്ന് വിദഗ്ധര് അഭിപ്രായപ്പെടുന്നു.
