ലണ്ടന്‍: യുകെയില്‍ ഭക്ഷ്യസാധനങ്ങളുടെ വില കുത്തനെ ഉയരുന്നതായി റിപ്പോര്‍ട്ടുകള്‍. 2021 മധ്യത്തോടെ ആരംഭിച്ച ജീവിതച്ചെലവിലെ വര്‍ധന ഇപ്പോള്‍ കൂടുതല്‍ രൂക്ഷമായിരിക്കുകയാണ്. നവംബര്‍ മാസത്തോടെ ഭക്ഷ്യവില 50 ശതമാനം വരെ ഉയരുമെന്നാണ് വിലയിരുത്തല്‍. കഴിഞ്ഞ അഞ്ച് വര്‍ഷത്തിനിടെ ഉണ്ടായ വിലവര്‍ധന, കഴിഞ്ഞ രണ്ടു പതിറ്റാണ്ടിലെ വര്‍ധനയ്ക്ക് തുല്യമാണെന്നാണ് സാമ്പത്തിക വിദഗ്ധരുടെ നിരീക്ഷണം. മോശമായ കാലാവസ്ഥയും ആഗോള വിതരണ ശൃംഖലയിലെ പ്രശ്‌നങ്ങളും ഈ സാഹചര്യത്തിന് പ്രധാന കാരണങ്ങളായി ചൂണ്ടിക്കാണിക്കപ്പെടുന്നു. കൂടാതെ എണ്ണ-വാതക വിപണിയിലെ അനിശ്ചിതത്വവും വിലവര്‍ധനയെ കൂടുതല്‍ ശക്തമാക്കുകയാണ്.

പാസ്ത, ബീഫ്, ചോക്ലേറ്റ് എന്നിവയുടെ വില 50 മുതല്‍ 64 ശതമാനം വരെ ഉയരുമെന്നാണ് കണക്കുകള്‍. ഒലീവ് ഓയിലിന് 113 ശതമാനം വരെ വില വര്‍ധിക്കാനിടയുണ്ട്. 2022-23 കാലയളവില്‍ ഒരു കുടുംബത്തിന്റെ ഭക്ഷ്യച്ചെലവില്‍ ശരാശരി 605 പൗണ്ട് അധികമായി വര്‍ധിച്ചതായും റിപ്പോര്‍ട്ടുകള്‍ പറയുന്നു. വെണ്ണ, പാല്‍, ബീഫ്, ചോക്ലേറ്റ്, കോഫി തുടങ്ങിയ സാധനങ്ങളുടെ വില മറ്റ് ഭക്ഷ്യവസ്തുക്കളേക്കാള്‍ നാലിരട്ടി വരെ ഉയരാനാണ് സാധ്യത. തുടര്‍ച്ചയായ ഈ വിലവര്‍ധന സാധാരണക്കാരുടെ ജീവിതത്തെ ഗൗരവമായി ബാധിക്കുമെന്ന് ആശങ്ക ഉയരുന്നു. ഇതിനിടെ ഹോര്‍മുസ് കടലിടുക്ക് അടച്ചതോടെ ആഗോള ഓയില്‍ വിതരണത്തില്‍ പ്രതിസന്ധി രൂക്ഷമായിട്ടുണ്ട്. ഇതിന്റെ പ്രതിഫലനം യുകെയുടെ സമ്പദ്വ്യവസ്ഥയിലും പ്രകടമായതായി വിദഗ്ധര്‍ വിലയിരുത്തുന്നു.