ലണ്ടന്‍: ഉയര്‍ന്ന ശമ്പളവും മികച്ച കരിയര്‍ സാധ്യതകളും ഉണ്ടായിരുന്ന നിയമരംഗത്തെ ജോലി ഉപേക്ഷിച്ച് വ്യത്യസ്തമായൊരു തൊഴില്‍ തെരഞ്ഞെടുത്ത് ശ്രദ്ധേയമായ വിജയം കൈവരിച്ചിരിക്കുകയാണ് യു.കെയില്‍ നിന്നുള്ള 30കാരിയായ ലിസ് ഈസ്റ്റ്. ക്രിമിനല്‍ ഡിഫന്‍സ് ലോയറാകണമെന്ന ലക്ഷ്യത്തോടെ പഠനം പൂര്‍ത്തിയാക്കി വര്‍ഷങ്ങളോളം നിയമരംഗത്ത് പ്രവര്‍ത്തിച്ച ലിസ്, പിന്നീട് കോര്‍പ്പറേറ്റ് ജീവിതം അവസാനിപ്പിച്ച് നായകളെ നടത്തുകയും പരിപാലിക്കുകയും ചെയ്യുന്ന ഡോഗ് വാക്കിങ് ബിസിനസിലേക്ക് തിരിയുകയായിരുന്നു. നാല് വര്‍ഷത്തോളം ക്രിമിനല്‍ ഡിഫന്‍സ് മേഖലയില്‍ പാരാലീഗലായി പ്രവര്‍ത്തിച്ച ലിസ് പിന്നീട് കണ്‍സള്‍ട്ടിങ് രംഗത്തും ജോലി ചെയ്തു. അഡ്മിനിസ്‌ട്രേഷന്‍ ജോലികള്‍, കോടതിയില്‍ ഹാജരാകല്‍, ജയിലുകളിലെ സന്ദര്‍ശനം, കക്ഷികളുമായി കൂടിക്കാഴ്ച എന്നിവ ഉള്‍പ്പെടുന്ന ജോലിജീവിതം കടുത്ത മാനസിക സമ്മര്‍ദ്ദമാണ് സൃഷ്ടിച്ചതെന്ന് ലിസ് പറയുന്നു.

ദിവസവും 12 മണിക്കൂറിലധികം ജോലി ചെയ്യേണ്ടിവന്നതിനൊപ്പം ലണ്ടനിലേക്കുള്ള രണ്ട് മണിക്കൂര്‍ യാത്രയും പതിവായിരുന്നു. ഇതോടെ ജോലി ജീവിതത്തെ തന്നെ ബാധിക്കാന്‍ തുടങ്ങിയതായി അവര്‍ പറയുന്നു. യഥാര്‍ത്ഥ പ്രായത്തേക്കാള്‍ പ്രായം തോന്നിത്തുടങ്ങിയെന്നും എല്ലാ ദിവസവും ഇതേ രീതിയിലാണോ ജീവിതം മുന്നോട്ട് പോകേണ്ടതെന്ന് ചിന്തിച്ചിരുന്നുവെന്നും ലിസ് ഓര്‍ക്കുന്നു. കോര്‍പ്പറേറ്റ് ജോലികളിലെ നീണ്ട ജോലി സമയം, വൈകിയുള്ള സാമൂഹിക പരിപാടികള്‍ എന്നിവ കുടുംബജീവിതത്തിന് അനുയോജ്യമല്ലെന്ന തിരിച്ചറിവും ജോലി മാറ്റാനുള്ള തീരുമാനത്തിന് കാരണമായി. നായകളെ നടത്തുകയും പരിപാലിക്കുകയും ചെയ്യുന്ന ജോലി ചെയ്തിരുന്ന ഭര്‍ത്താവാണ് പുതിയ കരിയറിലേക്ക് കടക്കാന്‍ ലിസിന് പ്രചോദനമായത്. ഭര്‍ത്താവ് തന്റെ ജോലിയില്‍ അനുഭവിക്കുന്ന സന്തോഷവും സ്വാതന്ത്ര്യവും കണ്ടതോടെയാണ് സമാനമായ തൊഴില്‍ തെരഞ്ഞെടുക്കാന്‍ തീരുമാനിച്ചതെന്ന് അവര്‍ പറയുന്നു.

കോര്‍പ്പറേറ്റ് ജോലി ഉപേക്ഷിച്ചതിന് പിന്നാലെ ലിസ് സ്വന്തമായി ഒരു വാന്‍ വാങ്ങി. തുടക്കത്തില്‍ ഒരു പബ്ബില്‍ ജോലി ചെയ്തുകൊണ്ടാണ് ഡോഗ് വാക്കിങ് ബിസിനസ് വളര്‍ത്തിയത്. പിന്നീട് ആവശ്യക്കാര്‍ വര്‍ധിച്ചതോടെ ഇത് പൂര്‍ണസമയ തൊഴിലായി മാറി. നിലവില്‍ ദിവസേന നാല് സെഷനുകളിലായി 20 മുതല്‍ 30 നായകളെ വരെ ലിസ് നടത്തുന്നു. ഒരു നായയ്ക്ക് ഒരു മണിക്കൂറിന് ഏകദേശം 19 ഡോളറാണ് ഈടാക്കുന്നത്. ഇതിലൂടെ ദിവസേന 400 മുതല്‍ 530 ഡോളര്‍ വരെ, ഇന്ത്യന്‍ രൂപയില്‍ ഏകദേശം 38,000 മുതല്‍ 50,000 രൂപ വരെ സമ്പാദിക്കാന്‍ കഴിയുന്നുണ്ടെന്നാണ് റിപ്പോര്‍ട്ട്. മുന്‍ ജോലിയില്‍ ലഭിച്ചിരുന്നതിനേക്കാള്‍ മാസത്തില്‍ ആയിരക്കണക്കിന് പൗണ്ട് അധികം ഇപ്പോള്‍ സമ്പാദിക്കുന്നുണ്ടെന്നും അതേസമയം ജോലി സമയം ഏകദേശം പകുതിയായി കുറഞ്ഞതായും ലിസ് പറയുന്നു.

നിയമപഠനം പൂര്‍ത്തിയാക്കി ഡോഗ് വാക്കിങ് പോലൊരു ജോലി തെരഞ്ഞെടുക്കുന്നതിനെതിരെ പലരില്‍ നിന്നും വിമര്‍ശനങ്ങളും ചോദ്യങ്ങളും ഉയര്‍ന്നിരുന്നു. എന്നാല്‍ തന്റെ തീരുമാനത്തില്‍ യാതൊരു ഖേദവുമില്ലെന്നാണ് ലിസിന്റെ പ്രതികരണം. നായകളോടുള്ള സ്‌നേഹവും പ്രകൃതിയോട് ചേര്‍ന്ന് ജോലി ചെയ്യാനുള്ള താല്‍പ്പര്യവുമാണ് പുതിയ കരിയറില്‍ സന്തോഷം കണ്ടെത്താന്‍ സഹായിച്ചതെന്നും അവര്‍ പറയുന്നു. ഉയര്‍ന്ന ശമ്പളമുള്ള പരമ്പരാഗത കരിയറുകളേക്കാള്‍ വ്യക്തിപരമായ സന്തോഷത്തിനും ജീവിത-ജോലി സന്തുലിതാവസ്ഥയ്ക്കും പ്രാധാന്യം നല്‍കുന്ന പുതിയ തലമുറയുടെ കരിയര്‍ സമീപനത്തിന്റെ ഉദാഹരണമായാണ് ലിസ് ഈസ്റ്റിന്റെ ജീവിതമാറ്റം ശ്രദ്ധ നേടുന്നത്.