ലണ്ടന്‍: ഇംഗ്ലണ്ടിലെ അധ്യാപകരുടെ ശമ്പളവര്‍ധന പൂര്‍ണമായി നടപ്പാക്കാന്‍ സ്‌കൂളുകള്‍ക്ക് ആവശ്യമായ സാമ്പത്തിക പിന്തുണ ഉറപ്പാക്കി ബ്രിട്ടീഷ് സര്‍ക്കാര്‍. ശമ്പളവര്‍ധനയുടെ ഒരു ഭാഗം സ്‌കൂളുകള്‍ സ്വന്തം ബജറ്റില്‍നിന്ന് കണ്ടെത്തണമെന്ന മുന്‍ നിലപാടില്‍ മാറ്റം വരുത്തിയതായി എഡ്യൂക്കേഷന്‍ സെക്രട്ടറി ലൂസി പവല്‍ വ്യക്തമാക്കി. ഇതോടെ സ്‌കൂളുകള്‍ക്ക് ഈ വര്‍ഷം ഏകദേശം 500 മില്യണ്‍ പൗണ്ടിന്റെ അധിക സാമ്പത്തിക ഇടം ലഭിക്കുമെന്നാണ് കണക്കാക്കുന്നത്. 2026 സെപ്റ്റംബര്‍ മുതല്‍ അധ്യാപകര്‍ക്കും സ്‌കൂള്‍ നേതാക്കള്‍ക്കും 3.5 ശതമാനം ശമ്പളവര്‍ധനയും 2027 സെപ്റ്റംബര്‍ മുതല്‍ മൂന്ന് ശതമാനം അധിക വര്‍ധനയും നല്‍കാനാണ് സര്‍ക്കാര്‍ തീരുമാനിച്ചിരിക്കുന്നത്. സ്‌കൂള്‍ ടീച്ചേഴ്‌സ് റിവ്യൂ ബോഡിയുടെ ശുപാര്‍ശകള്‍ സര്‍ക്കാര്‍ പൂര്‍ണമായി അംഗീകരിച്ചിട്ടുണ്ട്.

എന്നാല്‍ ശമ്പളവര്‍ധനയുടെ മുഴുവന്‍ ചെലവും കേന്ദ്രസര്‍ക്കാര്‍ വഹിക്കില്ലെന്നും ഒരു വിഹിതം സ്‌കൂളുകള്‍ നിലവിലെ ബജറ്റില്‍നിന്ന് കണ്ടെത്തണമെന്നും നേരത്തെ തീരുമാനിച്ചിരുന്നു. ഇതനുസരിച്ച് ഏകദേശം 460 മില്യണ്‍ പൗണ്ടിന്റെ അധിക ബാധ്യത സ്‌കൂളുകള്‍ക്ക് നേരിടേണ്ടിവരുമെന്ന് നാഷണല്‍ എഡ്യൂക്കേഷന്‍ യൂണിയന്‍ (NEU) ചൂണ്ടിക്കാട്ടിയിരുന്നു. ഈ സാഹചര്യത്തിലാണ് ശമ്പളവും സ്‌കൂള്‍ ഫണ്ടിംഗും സംബന്ധിച്ച ആവശ്യങ്ങളില്‍ സര്‍ക്കാര്‍ നടപടിയെടുത്തില്ലെങ്കില്‍ ഒക്ടോബറില്‍ ഔദ്യോഗിക സമരബാലറ്റ് ആരംഭിക്കുമെന്ന് എന്‍ഇയു മുന്നറിയിപ്പ് നല്‍കിയത്. യൂണിയന്റെ നേരത്തെയുള്ള അംഗവോട്ടെടുപ്പില്‍ ശമ്പളവര്‍ധനയുടെ ചെലവ് സ്‌കൂളുകള്‍ വഹിക്കണമെന്ന നിര്‍ദേശത്തിനെതിരെ ശക്തമായ എതിര്‍പ്പും സമരനടപടികള്‍ക്ക് പിന്തുണയും രേഖപ്പെടുത്തിയിരുന്നു.

പെന്‍ഷന്‍ സംഭാവനയിലെ ലാഭം സ്‌കൂളുകള്‍ക്ക്

എന്‍ഇയു ജനറല്‍ സെക്രട്ടറി ഡാനിയല്‍ കെബെഡെയ്ക്ക് അയച്ച കത്തിലാണ് ലൂസി പവല്‍ പുതിയ നിലപാട് വ്യക്തമാക്കിയത്. ലോക്കല്‍ ഗവണ്‍മെന്റ് പെന്‍ഷന്‍ സ്‌കീമിന്റെ പുതിയ മൂല്യനിര്‍ണയത്തെ തുടര്‍ന്ന് തൊഴിലുടമകളുടെ പെന്‍ഷന്‍ സംഭാവന നിരക്കില്‍ 4.9 ശതമാന പോയിന്റിന്റെ കുറവുണ്ടാകും. ഇതിലൂടെ സ്‌കൂളുകളുടെ സപ്പോര്‍ട്ട് സ്റ്റാഫ് ശമ്പളച്ചെലവില്‍ കാര്യമായ ലാഭം ലഭിക്കുമെന്നാണ് സര്‍ക്കാര്‍ കണക്കാക്കുന്നത്. ഈ ലാഭം സര്‍ക്കാര്‍ തിരിച്ചെടുക്കില്ലെന്നും അതുവഴി അധ്യാപക ശമ്പളവര്‍ധനയുടെ മുഴുവന്‍ ചെലവും ദേശീയതലത്തില്‍ സ്‌കൂളുകള്‍ക്ക് വഹിക്കാനാകുമെന്നും പവല്‍ അറിയിച്ചു. ഈ മാറ്റത്തിലൂടെ ഈ വര്‍ഷം സ്‌കൂളുകള്‍ക്ക് ഏകദേശം 500 മില്യണ്‍ പൗണ്ടിന്റെ സാമ്പത്തിക നേട്ടമുണ്ടാകുമെന്ന് എന്‍ഇയു വിലയിരുത്തുന്നു.

ശമ്പളവര്‍ധനയ്ക്കായി 2026-27 സാമ്പത്തിക വര്‍ഷത്തില്‍ 700 മില്യണ്‍ പൗണ്ടും 2027-28ല്‍ 1.1 ബില്യണ്‍ പൗണ്ടും ഉള്‍പ്പെടെ രണ്ട് വര്‍ഷത്തിനിടെ മൊത്തം 1.8 ബില്യണ്‍ പൗണ്ടിന്റെ അധിക നിക്ഷേപമാണ് സര്‍ക്കാര്‍ നേരത്തെ പ്രഖ്യാപിച്ചിരുന്നത്. പുതിയ പെന്‍ഷന്‍ ചെലവ് ലാഭവും സ്‌കൂളുകള്‍ക്ക് തന്നെ നിലനിര്‍ത്താനാകുന്നതോടെ ശമ്പളവര്‍ധന നടപ്പാക്കുന്നതിനുള്ള സാമ്പത്തിക സമ്മര്‍ദം കുറയുമെന്നാണ് സര്‍ക്കാരിന്റെ കണക്കുകൂട്ടല്‍.

സമരഭീഷണി ഒഴിവാകുമോ?

സര്‍ക്കാരിന്റെ തീരുമാനം സുപ്രധാന മുന്നേറ്റമാണെന്നാണ് എന്‍ഇയുവിന്റെ പ്രതികരണം. സ്‌കൂളുകളുടെ ബജറ്റില്‍ ഉണ്ടായിരുന്ന 460 മില്യണ്‍ പൗണ്ടിന്റെ കുറവ് നികത്തുന്ന നടപടിയാണിതെന്ന് യൂണിയന്‍ ജനറല്‍ സെക്രട്ടറി ഡാനിയല്‍ കെബെഡെ പറഞ്ഞു. അതേസമയം, ഒക്ടോബറില്‍ നടത്താന്‍ തീരുമാനിച്ചിരുന്ന ഔദ്യോഗിക സമരബാലറ്റിന്റെ കാര്യത്തില്‍ എന്‍ഇയുവിന്റെ ദേശീയ എക്‌സിക്യൂട്ടീവ് അന്തിമ തീരുമാനമെടുത്തിട്ടില്ല. പുതിയ സാമ്പത്തിക സാഹചര്യം പരിഗണിച്ച് സമരബാലറ്റ് പുനഃപരിശോധിക്കണമെന്നും വ്യവസായിക സമരനടപടികളില്‍നിന്ന് പിന്മാറണമെന്നും ലൂസി പവല്‍ യൂണിയനോട് ആവശ്യപ്പെട്ടിട്ടുണ്ട്. ഇതോടെ അധ്യാപക സമരഭീഷണി ഒഴിവാക്കാനും സ്‌കൂളുകളുടെ ബജറ്റിനുമേലുള്ള സമ്മര്‍ദം കുറയ്ക്കാനും കഴിയുമെന്ന പ്രതീക്ഷയിലാണ് സര്‍ക്കാര്‍.