ലണ്ടന്‍: കുട്ടികള്‍ കുറ്റകൃത്യങ്ങളില്‍ ഏര്‍പ്പെട്ടാല്‍ മാതാപിതാക്കളുടെയും രക്ഷിതാക്കളുടെയും ഉത്തരവാദിത്തം ശക്തമാക്കുന്നതിനായി ഇംഗ്ലണ്ടിലും വെയില്‍സിലും നിയമനടപടികള്‍ കടുപ്പിക്കാന്‍ സര്‍ക്കാര്‍ നീക്കം. ഗുരുതര സാഹചര്യങ്ങളില്‍ മാതാപിതാക്കള്‍ക്ക് ലഭിക്കുന്ന ആനുകൂല്യങ്ങള്‍ വെട്ടിക്കുറയ്ക്കുന്നതു മുതല്‍ ജയില്‍ ശിക്ഷ വരെ നല്‍കാന്‍ കോടതികള്‍ക്ക് അധികാരം നല്‍കുന്നതാണ് പരിഗണനയിലുള്ളത്. എന്നാല്‍ മാതാപിതാക്കളെ ജയിലിലടയ്ക്കുന്നത് അതീവ ഗുരുതരമായ കേസുകളില്‍ മാത്രമായിരിക്കുമെന്ന് യുവജന നീതിന്യായ മന്ത്രി ജേക്ക് റിച്ചാര്‍ഡ്‌സ് വ്യക്തമാക്കി. ഓരോ കേസിന്റെയും സാഹചര്യം വിലയിരുത്തി ശിക്ഷ വേണമോ, ഏത് തരത്തിലുള്ള നടപടി സ്വീകരിക്കണമോ എന്നതില്‍ അന്തിമ തീരുമാനം ജഡ്ജിക്കായിരിക്കുമെന്നും അദ്ദേഹം പറഞ്ഞു. നിലവിലുള്ള പേരന്റിങ് ഓര്‍ഡറുകള്‍ കൂടുതല്‍ ശക്തിപ്പെടുത്തുന്നതിന്റെ ഭാഗമായാണ് പുതിയ നിര്‍ദേശങ്ങള്‍. കുട്ടിയുടെ പെരുമാറ്റം തിരുത്തുന്നതിനായി കൗണ്‍സലിങ് ഉള്‍പ്പെടെയുള്ള പ്രത്യേക പരിപാടികളില്‍ പങ്കെടുക്കാന്‍ മാതാപിതാക്കളെയോ രക്ഷിതാക്കളെയോ കോടതി നിര്‍ബന്ധിക്കാം. ഇത്തരം ഉത്തരവുകള്‍ ലംഘിച്ചാല്‍ നിലവില്‍ പരമാവധി 1,000 പൗണ്ട് വരെ പിഴ ചുമത്താനാകും.

മാതാപിതാക്കള്‍ക്ക് ആവശ്യമായ പിന്തുണ നല്‍കുന്നതിനൊപ്പം ഉത്തരവാദിത്തം ഉറപ്പാക്കുന്ന 'ക്യാരറ്റ് ആന്‍ഡ് സ്റ്റിക്ക്' സമീപനമാണ് സര്‍ക്കാര്‍ സ്വീകരിക്കുന്നതെന്ന് റിച്ചാര്‍ഡ്‌സ് പറഞ്ഞു. കുട്ടികളെ കുറ്റകൃത്യങ്ങളില്‍നിന്ന് പിന്തിരിപ്പിക്കാന്‍ മാതാപിതാക്കളുടെ സഹകരണം അനിവാര്യമാണ്. സഹകരിക്കാന്‍ തയ്യാറാകാത്ത സാഹചര്യങ്ങളിലാണ് ആനുകൂല്യങ്ങള്‍ വെട്ടിക്കുറയ്ക്കുന്നതുള്‍പ്പെടെയുള്ള നടപടികള്‍ പരിഗണിക്കുന്നതെന്നും മന്ത്രി വ്യക്തമാക്കി. അതേസമയം, സര്‍ക്കാര്‍ നീക്കത്തിനെതിരെ കുട്ടികളുടെ അവകാശ സംഘടനകളും നീതിന്യായ പരിഷ്‌കരണ രംഗത്തുള്ളവരും വിമര്‍ശനവുമായി രംഗത്തെത്തിയിട്ടുണ്ട്. നിര്‍ബന്ധിത ശിക്ഷാ നടപടികളേക്കാള്‍ മാതാപിതാക്കളുമായി സ്വമേധയാ സഹകരിച്ച് പ്രവര്‍ത്തിക്കുന്നതാണ് കുട്ടികളുടെ പ്രശ്‌നങ്ങള്‍ പരിഹരിക്കാന്‍ കൂടുതല്‍ ഫലപ്രദമെന്നാണ് ഇവരുടെ വാദം. മാതാപിതാക്കളെ ജയിലിലടയ്ക്കുന്നത് കുട്ടികളുടെ കുടുംബസാഹചര്യം കൂടുതല്‍ വഷളാക്കാനും പുതിയ സാമൂഹിക പ്രശ്‌നങ്ങള്‍ക്ക് വഴിവെക്കാനും സാധ്യതയുണ്ടെന്നും വിമര്‍ശകര്‍ ചൂണ്ടിക്കാട്ടുന്നു.

പേരന്റിങ് ഓര്‍ഡറുകളില്‍ വന്‍ ഇടിവ്

കഴിഞ്ഞ വര്‍ഷങ്ങളില്‍ പേരന്റിങ് ഓര്‍ഡറുകളുടെ ഉപയോഗത്തില്‍ വലിയ കുറവുണ്ടായിട്ടുണ്ട്. 2009-10 കാലയളവില്‍ 1,000ലേറെ ഉത്തരവുകള്‍ പുറപ്പെടുവിച്ചിരുന്ന സ്ഥാനത്ത് 2022-23ല്‍ ഇത് വെറും 33 ആയി കുറഞ്ഞു. 16 വയസ്സില്‍ താഴെയുള്ള കുട്ടി കുറ്റത്തിന് ശിക്ഷിക്കപ്പെട്ടാല്‍ പേരന്റിങ് ഓര്‍ഡര്‍ നല്‍കണമോയെന്ന് കോടതി നിലവില്‍ പരിഗണിക്കേണ്ടതുണ്ട്. 16, 17 വയസ്സുള്ളവരുടെ കാര്യത്തിലും വീണ്ടും കുറ്റകൃത്യങ്ങളില്‍ ഏര്‍പ്പെടുന്നത് തടയാന്‍ ഉത്തരവ് സഹായിക്കുമെന്ന് കോടതി വിലയിരുത്തിയാല്‍ നടപടി സ്വീകരിക്കാം. പരമാവധി 12 മാസമാണ് പേരന്റിങ് ഓര്‍ഡറിന്റെ കാലാവധി.

ക്രിമിനല്‍ ഉത്തരവാദിത്ത പ്രായം 10 വയസ്സായി തുടരും

ഇംഗ്ലണ്ടിലും വെയില്‍സിലും നിലവിലുള്ള 10 വയസ്സ് എന്ന ക്രിമിനല്‍ ഉത്തരവാദിത്ത പ്രായം ഉയര്‍ത്തണമെന്ന ആവശ്യവും സര്‍ക്കാര്‍ തള്ളി. പ്രായപരിധി ഉയര്‍ത്തുന്നത് നീതിന്യായ സംവിധാനത്തിലുള്ള പൊതുജന വിശ്വാസത്തെ ബാധിക്കുമെന്നാണ് ജേക്ക് റിച്ചാര്‍ഡ്‌സിന്റെ നിലപാട്. അതേസമയം, ക്രിമിനല്‍ ഉത്തരവാദിത്തത്തിനുള്ള കുറഞ്ഞ പ്രായം 14 വയസ്സായി ഉയര്‍ത്തണമെന്ന് ബാര്‍ കൗണ്‍സില്‍ ആവശ്യപ്പെട്ടിട്ടുണ്ട്. ഐക്യരാഷ്ട്ര സംഘടനയും കുറഞ്ഞ പ്രായപരിധി 14 വയസ്സാക്കണമെന്ന് നേരത്തെ ശുപാര്‍ശ ചെയ്തിരുന്നു.

സൗത്ത്പോര്‍ട്ട് ആക്രമണവും പരിഷ്‌കരണത്തിന് പശ്ചാത്തലം

യുവജന നീതിന്യായ സംവിധാനത്തില്‍ മാറ്റങ്ങള്‍ കൊണ്ടുവരാനുള്ള നീക്കങ്ങള്‍ക്ക് 2024ലെ സൗത്ത്പോര്‍ട്ട് ആക്രമണവുമായി ബന്ധപ്പെട്ട അന്വേഷണത്തിലെ കണ്ടെത്തലുകളും പശ്ചാത്തലമായിട്ടുണ്ട്. കേസിലെ പ്രതിയായ ആക്‌സല്‍ റുഡകുബാനയുടെ മാതാപിതാക്കളുടെയും ബന്ധപ്പെട്ട വിവിധ ഏജന്‍സികളുടെയും ഭാഗത്തുനിന്നുണ്ടായ വീഴ്ചകള്‍ നിര്‍ണായക ഇടപെടലുകള്‍ക്കുള്ള അവസരങ്ങള്‍ നഷ്ടപ്പെടാന്‍ കാരണമായതായി അന്വേഷണത്തിന്റെ ആദ്യഘട്ട റിപ്പോര്‍ട്ടില്‍ കണ്ടെത്തിയിരുന്നു. കുട്ടികളുടെ കുറ്റകൃത്യങ്ങള്‍ തടയുന്നതില്‍ കുടുംബത്തിന്റെ പങ്ക് വര്‍ധിപ്പിക്കുന്നതിനൊപ്പം രക്ഷിതാക്കളെ കൂടുതല്‍ ഉത്തരവാദിത്തമുള്ളവരാക്കുകയാണ് പുതിയ പരിഷ്‌കരണ നിര്‍ദേശങ്ങളിലൂടെ സര്‍ക്കാര്‍ ലക്ഷ്യമിടുന്നത്.