ലണ്ടന്: ഇംഗ്ലീഷ് ചാനലിലൂടെ 30 മണിക്കൂറിലേറെ ചെറുബോട്ടില് യാത്ര ചെയ്ത നിരവധി കുടിയേറ്റക്കാരെ കടല്മാര്ഗം ഡോവറിലെത്തിച്ചു. ബോട്ടിലുണ്ടായിരുന്നവരെ ബ്രിട്ടീഷ് രക്ഷാസംഘത്തിന്റെ സഹായത്തോടെ സുരക്ഷിതമായി മാറ്റിയതായി ഗോസ്പോര്ട്ട് കണ്സര്വേറ്റീവ് എംപി കരോളിന് ഡിനെനേജ് അറിയിച്ചു. തിങ്കളാഴ്ച രാവിലെ ഫ്രാന്സിലെ നോര്മന്ഡി തീരത്തുനിന്നാണ് ബോട്ട് യാത്ര തിരിച്ചത്. ഏകദേശം 60 പേര് ബോട്ടിലുണ്ടായിരുന്നുവെന്നും അതീവ അപകടകരമായ സാഹചര്യത്തിലൂടെയാണ് ഇവര് യാത്ര ചെയ്തതെന്നും ഫ്രഞ്ച് കോസ്റ്റ് ഗാര്ഡ് അറിയിച്ചു. യുകെയിലെത്താനുള്ള ശ്രമം തുടരാനാണ് താല്പര്യമെന്ന് വ്യക്തമാക്കിയതിനെ തുടര്ന്ന് ഫ്രഞ്ച് രക്ഷാസംഘത്തിന്റെ സഹായം യാത്രക്കാര് ആദ്യം നിരസിച്ചതായും അധികൃതര് പറഞ്ഞു.
ചൊവ്വാഴ്ച ബ്രിട്ടീഷ് രക്ഷാബോട്ടുകള് ഇവരെ സഹായിക്കാനായി എത്തി. യാത്ര ആരംഭിച്ച് ഏകദേശം 36 മണിക്കൂര് പിന്നിട്ടപ്പോഴാണ് റോയല് നാഷണല് ലൈഫ്ബോട്ട് ഇന്സ്റ്റിറ്റിയൂഷന് (RNLI) രക്ഷാപ്രവര്ത്തനത്തിന് നിര്ദേശം ലഭിച്ചതെന്നാണ് വിവരം. യാത്രക്കാരുടെ സുരക്ഷയും ആരോഗ്യനിലയും പരിഗണിച്ച് ചെറുബോട്ടില് നിന്ന് ഇവരെ മാറ്റണമെന്ന് കോസ്റ്റ് ഗാര്ഡ് നിര്ദേശിച്ചു. തുടര്ന്ന് ബോര്ഡര് ഫോഴ്സ് ഇവരെ ഏറ്റെടുത്ത് ഡോവറിലേക്ക് കൊണ്ടുപോയി. ഇതിനിടെ ബോട്ട് ആദ്യം ഗോസ്പോര്ട്ടിലേക്ക് എത്തിക്കുമെന്ന റിപ്പോര്ട്ടുകള് പുറത്തുവന്നതോടെ ഹാംപ്ഷയറിലെ നഗരത്തില് പ്രതിഷേധം ശക്തമായി. നൂറുകണക്കിന് പ്രതിഷേധക്കാരും പൊലീസും മറീനയ്ക്ക് സമീപം ഒത്തുകൂടി. ചില പ്രതിഷേധക്കാര് കുടിയേറ്റക്കാരെ തിരിച്ചയക്കണമെന്നാവശ്യപ്പെട്ട് മുദ്രാവാക്യം വിളിക്കുകയും ചെയ്തു.
കുടിയേറ്റവിരുദ്ധ പ്രചാരകനായ ഡാനിയല് തോമസ് ചാനലിലൂടെ സഞ്ചരിച്ച ബോട്ടിന്റെ ദൃശ്യങ്ങള് യൂട്യൂബ് ലൈവിലൂടെ പങ്കുവച്ചിരുന്നു. പോര്ട്ട്സ്മൗത്തിലും ഡോവറിലും നേരത്തെ നടന്ന കുടിയേറ്റവിരുദ്ധ പ്രതിഷേധങ്ങളിലും തോമസ് പങ്കെടുത്തിരുന്നു. പ്രതിഷേധത്തിനിടെ ചിലര് പൊലീസിനോട് പ്രകോപനപരമായി പെരുമാറിയതിനെ തുടര്ന്ന് ആറുപേരെ അറസ്റ്റ് ചെയ്തതായി ഹാംപ്ഷയര് ആന്ഡ് ഐല് ഓഫ് വൈറ്റ് പൊലീസ് അറിയിച്ചു. സംഭവവുമായി ബന്ധപ്പെട്ട് കൂടുതല് അന്വേഷണം തുടരുകയാണെന്നും പൊലീസ് വ്യക്തമാക്കി.
