ബ്രിസ്റ്റള്‍/ലണ്ടന്‍: 2016ല്‍ ആശുപത്രിയില്‍ ചികിത്സയിലിരിക്കെ മരിച്ച ഓട്ടിസ്റ്റിക് യുവാവിന്റെ മെഡിക്കല്‍ രേഖകള്‍ മരണത്തിന് ശേഷവും അനുമതിയില്ലാതെ പരിശോധിച്ചെന്ന സംശയത്തില്‍ ബ്രിസ്റ്റളിലെ എന്‍എച്ച്എസ് ജീവനക്കാര്‍ക്കെതിരെ അന്വേഷണം. 18 വയസ്സുകാരനായ ഒലിവര്‍ മക്‌ഗോവന്റെ മെഡിക്കല്‍ രേഖകളിലേക്കുള്ള ജീവനക്കാരുടെ പ്രവേശനമാണ് ബ്രിസ്റ്റള്‍ എന്‍എച്ച്എസ് ട്രസ്റ്റ് പരിശോധിക്കുന്നത്. ഓട്ടിസം, നേരിയ പഠനവൈകല്യം, അപസ്മാരം എന്നിവ ഉണ്ടായിരുന്ന ഒലിവര്‍ 2016ല്‍ ബ്രിസ്റ്റളിലെ സൗത്ത്മീഡ് ആശുപത്രിയില്‍ ചികിത്സയിലിരിക്കെയാണ് മരിച്ചത്. കുടുംബം നേരത്തെ എതിര്‍പ്പ് അറിയിച്ചിരുന്ന ആന്റി-സൈക്കോട്ടിക് മരുന്ന് നല്‍കിയതിന് പിന്നാലെയായിരുന്നു മരണം. 2020ല്‍ നടന്ന ഇന്‍ക്വസ്റ്റില്‍ ഒലിവറിന്റെ മരണം ഒഴിവാക്കാന്‍ കഴിയുമായിരുന്ന സാഹചര്യമുണ്ടായിരുന്നുവെന്ന് കണ്ടെത്തിയിരുന്നു.

മകന്റെ മെഡിക്കല്‍ രേഖകള്‍ ആരെല്ലാം പരിശോധിച്ചുവെന്ന വിവരം അമ്മ പോള മക്‌ഗോവന്‍ ആവശ്യപ്പെട്ടതോടെയാണ് പുതിയ വിഷയം പുറത്തുവന്നത്. ഒലിവറിന്റെ മരണത്തിന് ശേഷം 38 പേര്‍ മെഡിക്കല്‍ രേഖകള്‍ പരിശോധിച്ചതായും ആകെ 637 രേഖകള്‍ തുറന്നുനോക്കിയതായും 67 രേഖകള്‍ പ്രിന്റ് ചെയ്തതായും കുടുംബത്തെ അറിയിച്ചു. ഇവയില്‍ ഭൂരിഭാഗം പ്രവേശനങ്ങളും പരാതികള്‍, നിയമനടപടികള്‍, കൊറോണറുടെ ഇന്‍ക്വസ്റ്റ് തുടങ്ങിയ ഔദ്യോഗിക ആവശ്യങ്ങളുമായി ബന്ധപ്പെട്ടതായിരുന്നുവെന്ന് ട്രസ്റ്റ് വ്യക്തമാക്കി. എന്നാല്‍ ഒലിവറിന്റെ ചികിത്സയില്‍ നേരിട്ട് പങ്കാളികളല്ലാത്ത മൂന്ന് നഴ്‌സുമാര്‍ക്ക് മെഡിക്കല്‍ രേഖകള്‍ പരിശോധിക്കാന്‍ സാധുവായ തൊഴില്‍പരമായ കാരണമുണ്ടായിരുന്നുവെന്ന് സ്ഥിരീകരിക്കാനായിട്ടില്ല. ഇവര്‍ക്കെതിരെ ഔദ്യോഗിക അന്വേഷണം ആരംഭിച്ചിട്ടുണ്ട്. മറ്റൊരു ജീവനക്കാരന്റെ കേസും പ്രത്യേകം പരിശോധിക്കുന്നുണ്ട്. ആശുപത്രിയില്‍ ഇപ്പോള്‍ ജോലി ചെയ്യാത്ത ഒരു ഡോക്ടര്‍ സംഭവവുമായി ബന്ധപ്പെട്ട് ജനറല്‍ മെഡിക്കല്‍ കൗണ്‍സിലില്‍ (GMC) സ്വയം റിപ്പോര്‍ട്ട് ചെയ്തതായും റിപ്പോര്‍ട്ടുകളുണ്ട്.

മുന്‍ ജീവനക്കാരുള്‍പ്പെടെ 13 പേരുമായി ബന്ധപ്പെട്ട മറ്റ് കേസുകളും ബ്രിസ്റ്റള്‍ എന്‍എച്ച്എസ് ട്രസ്റ്റ് പരിശോധിച്ചുവരികയാണ്. ഡോക്ടര്‍മാര്‍, നഴ്‌സുമാര്‍, ക്ലറിക്കല്‍ ജീവനക്കാര്‍ എന്നിവരുമായി ബന്ധപ്പെട്ട കേസുകളാണിവ. മകന്റെ മെഡിക്കല്‍ രേഖകളില്‍ അതീവ വ്യക്തിപരമായ വിവരങ്ങളുണ്ടായിരുന്നുവെന്നും ആവശ്യകതയില്ലാതെ മറ്റുള്ളവര്‍ അവ പരിശോധിച്ചിരിക്കാമെന്ന വിവരം ഏറെ വേദനിപ്പിക്കുന്നതാണെന്നും പോള മക്‌ഗോവന്‍ പറഞ്ഞു. ഡിജിറ്റല്‍, ക്ലൗഡ് അധിഷ്ഠിത സംവിധാനങ്ങളില്‍ രോഗികളുടെ കൂടുതല്‍ വിവരങ്ങള്‍ സൂക്ഷിക്കുന്ന സാഹചര്യത്തില്‍ അനധികൃത പ്രവേശനം തടയുന്നതിനുള്ള സുരക്ഷാ സംവിധാനങ്ങളും നിയന്ത്രണങ്ങളും കൂടുതല്‍ ശക്തമാക്കണമെന്ന് ഒലിവറിന്റെ പിതാവ് ടോം മക്‌ഗോവനും ആവശ്യപ്പെട്ടു.

സംഭവത്തില്‍ വിശദമായ അന്വേഷണം തുടരുകയാണെന്നും അന്വേഷണം പൂര്‍ത്തിയാകുന്നതിന് മുമ്പ് അന്തിമ നിഗമനത്തിലെത്തുന്നത് ശരിയല്ലെന്നും ബ്രിസ്റ്റള്‍ എന്‍എച്ച്എസ് ട്രസ്റ്റ് പ്രതികരിച്ചു. രോഗികളുടെയും കുടുംബങ്ങളുടെയും വ്യക്തിഗത വിവരങ്ങള്‍ ശ്രദ്ധയോടെയും ബഹുമാനത്തോടെയും രഹസ്യമായും കൈകാര്യം ചെയ്യപ്പെടേണ്ടതാണെന്ന നിലപാടാണ് ട്രസ്റ്റിനുള്ളതെന്നും അധികൃതര്‍ അറിയിച്ചു. സാധുവായ തൊഴില്‍പരമായ ആവശ്യമില്ലാതെ രോഗികളുടെ മെഡിക്കല്‍ രേഖകള്‍ പരിശോധിക്കുന്നത് ഗുരുതരമായ ലംഘനമാണെന്ന് എന്‍എച്ച്എസ് ഇംഗ്ലണ്ട് നേരത്തെ വ്യക്തമാക്കിയിട്ടുണ്ട്. ഇത്തരം കേസുകളില്‍ ജോലി നഷ്ടപ്പെടുന്നതുള്‍പ്പെടെയുള്ള അച്ചടക്ക നടപടികളും സാഹചര്യത്തിനനുസരിച്ച് ക്രിമിനല്‍ നടപടികളും നേരിടേണ്ടിവരുമെന്നും മുന്നറിയിപ്പുണ്ട്.