ലണ്ടന്: ഇംഗ്ലണ്ടില് എല്ലാവര്ക്കും സേവനം ലഭിക്കുന്ന സമയത്ത് സൗജന്യമായി സോഷ്യല് കെയര് ലഭ്യമാക്കുന്ന സംവിധാനം നടപ്പാക്കാന് പദ്ധതിയുമായി പ്രധാനമന്ത്രി ആന്ഡി ബേണെം. എന്എച്ച്എസ് തത്വങ്ങളെ അടിസ്ഥാനമാക്കിയുള്ള പദ്ധതി അടുത്ത പൊതുതെരഞ്ഞെടുപ്പില് ജനങ്ങള്ക്ക് മുന്നില് അവതരിപ്പിച്ച് പിന്തുണ തേടുമെന്ന് അദ്ദേഹം വ്യക്തമാക്കി. ധനസമാഹരണത്തിനായി നികുതി വര്ധന ഉള്പ്പെടെയുള്ള സാധ്യതകള് തള്ളിക്കളഞ്ഞിട്ടില്ലെന്നും ബേണെം പറഞ്ഞു. എല്ലാവരും സംഭാവന ചെയ്യുകയും എല്ലാവര്ക്കും പരിരക്ഷ ലഭിക്കുകയും ചെയ്യുന്ന സംവിധാനമാണ് ലക്ഷ്യമിടുന്നത്. സ്കോട്ട്ലന്ഡില് പരിചരണം ആവശ്യമുള്ള മുതിര്ന്നവര്ക്ക് വ്യക്തിഗത പരിചരണസേവനങ്ങള് സൗജന്യമായി ലഭിക്കുന്ന മാതൃക ചൂണ്ടിക്കാട്ടിയ ബേണെം, ഇംഗ്ലണ്ടിലെ ജനങ്ങള്ക്കും സമാനമായ സൗകര്യം ലഭിക്കണമെന്ന് അഭിപ്രായപ്പെട്ടു.
നിലവില് ഇംഗ്ലണ്ടിലെ സോഷ്യല് കെയര് സേവനങ്ങള് പൂര്ണമായും സൗജന്യമല്ല. 23,250 പൗണ്ടില് കൂടുതല് സമ്പാദ്യമുള്ളവര്ക്ക് സാധാരണയായി പരിചരണച്ചെലവിനുള്ള കൗണ്സില് സഹായത്തിന് അര്ഹതയില്ല. നിര്ദിഷ്ട സംവിധാനം നടപ്പായാല് നിലവിലെ രീതിയില് വലിയ മാറ്റമുണ്ടാകും. പദ്ധതിക്ക് പ്രതിവര്ഷം 18 ബില്യന് പൗണ്ട് വരെ ചെലവാകുമെന്ന കണക്കിനെക്കുറിച്ചുള്ള ചോദ്യത്തിന്, ചെലവ് അത്ര ഉയരില്ലെന്നായിരുന്നു ബേണെത്തിന്റെ പ്രതികരണം. ആവശ്യമായ പരിചരണസൗകര്യം ലഭ്യമല്ലാത്തതിനാല് ആശുപത്രിവാസം അവസാനിപ്പിച്ച് വീട്ടിലേക്ക് മടങ്ങാനാകാതെ നിരവധി പേര് തുടരുന്നുണ്ടെന്ന് അദ്ദേഹം ചൂണ്ടിക്കാട്ടി. ഇത് എന്എച്ച്എസിന് വലിയ സാമ്പത്തിക സമ്മര്ദമുണ്ടാക്കുന്നു. നിലവിലെ സംവിധാനത്തിലെ പോരായ്മകള് ഏറ്റവും കൂടുതല് ബാധിക്കുന്നത് സമൂഹത്തിലെ ദുര്ബല വിഭാഗങ്ങളെയാണെന്നും അദ്ദേഹം പറഞ്ഞു.
പുതിയ സംവിധാനത്തില് എല്ലാവരും ഏതെങ്കിലും രീതിയില് സംഭാവന ചെയ്യേണ്ടിവരുമെങ്കിലും ധനസമാഹരണം എന്എച്ച്എസിന്റെ നിലവിലെ രീതിക്ക് സമാനമായിരിക്കണമെന്നില്ല. പണം എങ്ങനെ കണ്ടെത്തും, ഏതെല്ലാം സേവനങ്ങള് ലഭിക്കും, അര്ഹതാ മാനദണ്ഡങ്ങള് എന്തായിരിക്കും തുടങ്ങിയ കാര്യങ്ങളില് വിശദാംശങ്ങള് പുറത്തുവന്നിട്ടില്ല. സോഷ്യല് കെയര് പരിഷ്കരണത്തെക്കുറിച്ച് ബാരനസ് ലൂയിസ് കേസി അധ്യക്ഷയായ സ്വതന്ത്ര കമ്മിഷന്റെ പഠനം അടുത്ത വേനല്ക്കാലത്തേക്ക് നേരത്തെയാക്കാനും തീരുമാനിച്ചിട്ടുണ്ട്. കമ്മിഷന്റെ വിലയിരുത്തലിന്റെ അടിസ്ഥാനത്തില് വിശദമായ പദ്ധതി തയാറാക്കി വിവിധ രാഷ്ട്രീയകക്ഷികളുമായി ചര്ച്ച നടത്താനാണ് നീക്കം. പരിഷ്കരണം നടപ്പാക്കുന്നതിന് കക്ഷികള്ക്കിടയില് ധാരണ അനിവാര്യമാണെന്നും ബേണെം വ്യക്തമാക്കി. അതേസമയം, കൂടുതല് നികുതി വര്ധന അംഗീകരിക്കില്ലെന്ന് കണ്സര്വേറ്റീവ് ഷാഡോ ഹോം സെക്രട്ടറി ക്രിസ് ഫില്പ് പ്രതികരിച്ചു. സോഷ്യല് കെയറിനോ പ്രതിരോധത്തിനോ അധിക പണം ആവശ്യമുണ്ടെങ്കില് മറ്റ് മേഖലകളിലെ ചെലവ് കുറച്ച് കണ്ടെത്തണമെന്നാണ് പാര്ട്ടിയുടെ നിലപാട്. പരിഷ്കരണവുമായി ബന്ധപ്പെട്ട സര്വകക്ഷി ചര്ച്ചകള് വേഗത്തിലാക്കണമെന്ന് ലിബറല് ഡെമോക്രാറ്റ് നേതാവ് സര് എഡ് ഡേവി ആവശ്യപ്പെട്ടു. ജനങ്ങള്ക്ക് അധിക സാമ്പത്തിക ബാധ്യതയുണ്ടാകാനുള്ള സാധ്യതയെ റിഫോം യുകെയുടെ റോബര്ട്ട് ജെന്റിക്കും വിമര്ശിച്ചു.
ഗോര്ഡന് ബ്രൗണ് പ്രധാനമന്ത്രിയായിരുന്ന കാലത്ത് ഹെല്ത്ത് സെക്രട്ടറിയായിരിക്കെ ബേണെം നാഷനല് കെയര് സര്വീസ് എന്ന ആശയം മുന്നോട്ടുവച്ചിരുന്നു. നിര്ബന്ധിത സംഭാവനയും മരണാനന്തര സ്വത്തില്നിന്നുള്ള സംഭാവനയും ഉള്പ്പെട്ട ആശയത്തെ എതിരാളികള് അന്ന് 'ഡെത്ത് ടാക്സ്' എന്നാണ് വിശേഷിപ്പിച്ചത്. 2010ലെ പൊതുതെരഞ്ഞെടുപ്പിന് ശേഷം പദ്ധതി മുന്നോട്ടുപോയില്ല.
