ലണ്ടന്: വാഹനങ്ങളുടെ നമ്പര് പ്ലേറ്റുകള് തിരിച്ചറിയുന്ന ക്യാമറ സംവിധാനങ്ങളെ കബളിപ്പിക്കാന് നിയമവിരുദ്ധമായി മാറ്റം വരുത്തിയ ആയിരക്കണക്കിന് നമ്പര് പ്ലേറ്റുകള് യുകെയില് കണ്ടെത്തി. തെക്കുകിഴക്കന് ഇംഗ്ലണ്ടിലെ മോട്ടോര്വേകളില് പരീക്ഷണാടിസ്ഥാനത്തില് സ്ഥാപിച്ച പുതിയ ക്യാമറ സംവിധാനമാണ് നിയമലംഘനങ്ങള് കണ്ടെത്തിയത്. ഓട്ടോമാറ്റിക് നമ്പര് പ്ലേറ്റ് റെക്കഗ്നിഷന് (എഎന്പിആര്) സംവിധാനങ്ങള്ക്ക് തിരിച്ചറിയാനാകാത്തവിധമാണ് പ്ലേറ്റുകളില് മാറ്റം വരുത്തിയിരിക്കുന്നത്. വേഗപരിധി ലംഘനങ്ങള് കണ്ടെത്താനും കുറഞ്ഞ മലിനീകരണ മേഖലകളിലെ നിയന്ത്രണങ്ങള് നിരീക്ഷിക്കാനും കുറ്റകൃത്യങ്ങളുമായി ബന്ധപ്പെട്ട വാഹനങ്ങള് തിരിച്ചറിയാനുമാണ് ഇത്തരം ക്യാമറകള് ഉപയോഗിക്കുന്നത്.
നിയമവിരുദ്ധ നമ്പര് പ്ലേറ്റുകള് പൊതുസുരക്ഷയ്ക്ക് ഭീഷണിയാണെന്ന് മുന് സര്ക്കാര് ഉപദേഷ്ടാവ് മുന്നറിയിപ്പ് നല്കി. ഇവ വളരെ എളുപ്പത്തില് ലഭ്യമാകുന്നുണ്ടെന്നും അദ്ദേഹം ചൂണ്ടിക്കാട്ടി. മതിയായ പരിശോധനകളോ ആവശ്യമായ വിവരശേഖരണമോ ഇല്ലാതെ കുറഞ്ഞ വിലയ്ക്ക് ഇത്തരം പ്ലേറ്റുകള് വാങ്ങാനാകുമെന്ന് ബിബിസി പനോരമയുടെ രഹസ്യാന്വേഷണത്തിലും കണ്ടെത്തി. ഇത്തരം നമ്പര് പ്ലേറ്റുകള് ഘടിപ്പിച്ച വാഹനങ്ങള് ഉള്പ്പെട്ട അപകടങ്ങളില് കുടുംബാംഗങ്ങളെ നഷ്ടപ്പെട്ടവരുമായും പനോരമ സംസാരിച്ചു. ലോകത്തിലെ ഏറ്റവും വലിയ എഎന്പിആര് ക്യാമറ ശൃംഖലകളിലൊന്നാണ് യുകെയിലുള്ളത്. 14,000 കേന്ദ്രങ്ങളിലായി പ്രതിദിനം ഏകദേശം 10 കോടി തവണ വാഹന നമ്പര് പ്ലേറ്റുകളുടെ ദൃശ്യങ്ങള് ക്യാമറകള് പകര്ത്തുന്നു. എന്നാല് തിരിച്ചറിയല് ഒഴിവാക്കാന് ചില ഡ്രൈവര്മാര് നമ്പര് പ്ലേറ്റുകളില് വരുത്തുന്ന മാറ്റങ്ങള് ഈ നിരീക്ഷണ സംവിധാനത്തിന്റെ ഫലപ്രാപ്തിക്ക് വെല്ലുവിളിയാകുകയാണ്.
