ലണ്ടന്‍: ഇംഗ്ലണ്ടില്‍ തെരുവില്‍ കഴിയുന്നവരെ ക്രിസ്മസിന് മുമ്പ് സുരക്ഷിത താമസസൗകര്യങ്ങളിലേക്ക് മാറ്റുകയെന്ന ലക്ഷ്യവുമായി ബ്രിട്ടീഷ് പ്രധാനമന്ത്രി ആന്‍ഡി ബേണെം. തെരുവില്‍ കിടന്നുറങ്ങേണ്ട സാഹചര്യം അവസാനിപ്പിക്കാന്‍ രാജ്യവ്യാപകമായ അടിയന്തര പദ്ധതിയാണ് സര്‍ക്കാര്‍ പ്രഖ്യാപിച്ചിരിക്കുന്നത്. ഇതിനായി മൊത്തം 442 മില്യന്‍ പൗണ്ട് വിനിയോഗിക്കും. നേരത്തെ പ്രഖ്യാപിച്ച 340 മില്യന്‍ പൗണ്ടിന് പുറമെ 102 മില്യന്‍ പൗണ്ട് കൂടി അനുവദിച്ചാണ് പദ്ധതി വിപുലീകരിച്ചത്. തെരുവില്‍ കഴിയുന്നവര്‍ക്ക് അടിയന്തര താമസസൗകര്യം ഒരുക്കുന്നതിനൊപ്പം മാനസികാരോഗ്യ പ്രശ്‌നങ്ങള്‍, മയക്കുമരുന്ന്-മദ്യ ഉപയോഗം, ശാരീരിക ആരോഗ്യ പ്രശ്‌നങ്ങള്‍ തുടങ്ങിയവ നേരിടുന്നവര്‍ക്ക് ആവശ്യമായ പിന്തുണയും നല്‍കും. പ്രാദേശിക കൗണ്‍സിലുകള്‍, സന്നദ്ധ സംഘടനകള്‍, മത-സാമൂഹിക സംഘടനകള്‍, ബിസിനസ് സ്ഥാപനങ്ങള്‍ എന്നിവയുടെ സഹകരണത്തോടെ പദ്ധതി നടപ്പാക്കാനാണ് സര്‍ക്കാര്‍ ലക്ഷ്യമിടുന്നത്.

പദ്ധതിയുടെ ആദ്യഘട്ടത്തില്‍ 1,200 സ്ഥിരതാമസ വീടുകള്‍ ഒരുക്കുകയും കുറഞ്ഞത് 3,000 പേര്‍ക്ക് തീവ്രമായ പിന്തുണ നല്‍കുകയും ചെയ്യുമെന്ന് സര്‍ക്കാര്‍ നേരത്തെ പ്രഖ്യാപിച്ചിരുന്നു. ദീര്‍ഘകാലമായി തെരുവില്‍ കഴിയുന്നവരെ സ്ഥിരമായ താമസത്തിലേക്ക് മാറ്റുന്നതിനൊപ്പം വീണ്ടും തെരുവിലേക്ക് മടങ്ങേണ്ട സാഹചര്യം ഒഴിവാക്കുന്നതിനുള്ള സഹായങ്ങളും പദ്ധതിയുടെ ഭാഗമാകും. ഇംഗ്ലണ്ടില്‍ തെരുവില്‍ കഴിയുന്നവരുടെ എണ്ണം റെക്കോര്‍ഡ് നിലയിലെത്തിയ സാഹചര്യത്തിലാണ് സര്‍ക്കാരിന്റെ പുതിയ നീക്കം. 2025ലെ ശരത്കാലത്തില്‍ നടത്തിയ ഔദ്യോഗിക കണക്കെടുപ്പില്‍ ഒരു രാത്രിയില്‍ 4,793 പേര്‍ തെരുവില്‍ ഉറങ്ങിയതായി കണ്ടെത്തിയിരുന്നു. 2021ല്‍ ഇത് 2,443 ആയിരുന്നു. അതായത് നാലുവര്‍ഷത്തിനിടെ എണ്ണം ഏകദേശം 96 ശതമാനം വര്‍ധിച്ചു. ഒറ്റ രാത്രിയിലെ കണക്കെടുപ്പ് മാത്രമായതിനാല്‍ യഥാര്‍ഥത്തില്‍ ഒരു വര്‍ഷത്തിനിടെ തെരുവില്‍ കഴിയേണ്ടിവരുന്നവരുടെ എണ്ണം ഇതിലും വളരെ കൂടുതലായിരിക്കാമെന്നും ഔദ്യോഗിക വിശദീകരണങ്ങളില്‍ വ്യക്തമാക്കുന്നു.

കോവിഡ് കാലത്ത് നടപ്പാക്കിയ 'എവരിവണ്‍ ഇന്‍' പദ്ധതിയുടെ മാതൃകയിലാണ് പുതിയ നീക്കം. കോവിഡ് വ്യാപനം ആരംഭിച്ചപ്പോള്‍ തെരുവില്‍ കഴിയുന്നവരെ ഹോട്ടലുകളിലേക്കും മറ്റ് അടിയന്തര താമസകേന്ദ്രങ്ങളിലേക്കും മാറ്റിയ പദ്ധതിയിലൂടെ 37,000ത്തിലധികം പേര്‍ക്ക് താമസസൗകര്യം ലഭിച്ചിരുന്നു. ഇവരില്‍ 26,000ത്തിലധികം പേരെ പിന്നീട് ദീര്‍ഘകാല താമസസൗകര്യങ്ങളിലേക്ക് മാറ്റിയതായി സര്‍ക്കാര്‍ കണക്കുകള്‍ വ്യക്തമാക്കുന്നു. തെരുവില്‍ കിടന്നുറങ്ങുന്നത് സമൂഹത്തിന്റെ സ്വാഭാവിക ഭാഗമായി അംഗീകരിക്കാനാകില്ലെന്നാണ് ബേണെത്തിന്റെ നിലപാട്. വാതില്‍പ്പടികളിലും റെയില്‍വേ സ്റ്റേഷനുകള്‍ക്ക് പുറത്തും ആളുകള്‍ രാത്രികള്‍ ചെലവഴിക്കേണ്ട അവസ്ഥ അവസാനിപ്പിക്കേണ്ടത് സര്‍ക്കാരിന്റെയും സമൂഹത്തിന്റെയും ഉത്തരവാദിത്തമാണെന്ന് അദ്ദേഹം വ്യക്തമാക്കി. സര്‍ക്കാര്‍ പണം മാത്രം ഉപയോഗിച്ച് പ്രശ്‌നം പൂര്‍ണമായി പരിഹരിക്കാനാകില്ലെന്നും പ്രാദേശിക ഭരണകൂടങ്ങളുടെയും സന്നദ്ധ സംഘടനകളുടെയും സമൂഹത്തിന്റെയും സജീവ പങ്കാളിത്തം അനിവാര്യമാണെന്നും ബേണെം പറഞ്ഞു.

അതേസമയം, ക്രിസ്മസിനകം തെരുവില്‍ കഴിയുന്ന എല്ലാവരെയും താമസസ്ഥലങ്ങളിലേക്ക് മാറ്റുകയെന്ന ലക്ഷ്യം പ്രായോഗികമായി എത്രത്തോളം നടപ്പാക്കാനാകുമെന്ന ചോദ്യവും ഉയരുന്നുണ്ട്. താല്‍ക്കാലിക താമസസൗകര്യങ്ങള്‍ മാത്രം നല്‍കിയാല്‍ പ്രശ്‌നത്തിന് ദീര്‍ഘകാല പരിഹാരമാകില്ലെന്നും കുറഞ്ഞ ചെലവിലുള്ള വീടുകളുടെ ലഭ്യത, മാനസികാരോഗ്യ സേവനങ്ങള്‍, ലഹരിവിമുക്ത ചികിത്സ, സാമ്പത്തിക സഹായം എന്നിവയും ഒരേസമയം ശക്തിപ്പെടുത്തണമെന്നും ഭവനരഹിതര്‍ക്കായി പ്രവര്‍ത്തിക്കുന്ന സംഘടനകളും വിദഗ്ധരും ആവശ്യപ്പെടുന്നു. പുതിയ പദ്ധതിയെ ഭവനരഹിതര്‍ക്കായി പ്രവര്‍ത്തിക്കുന്ന സംഘടനകള്‍ പൊതുവില്‍ സ്വാഗതം ചെയ്തിട്ടുണ്ടെങ്കിലും തെരുവിലേക്കെത്തുന്ന സാഹചര്യം തന്നെ തടയുന്ന ദീര്‍ഘകാല നയങ്ങള്‍ വേണമെന്ന ആവശ്യവും ശക്തമാണ്. അടിയന്തര താമസസൗകര്യത്തില്‍ ഒതുങ്ങാതെ സ്ഥിരമായ വീടുകളും ആരോഗ്യ-സാമൂഹിക പിന്തുണയും ഉറപ്പാക്കിയാല്‍ മാത്രമേ തെരുവ് ജീവിതം അവസാനിപ്പിക്കാനുള്ള സര്‍ക്കാര്‍ നീക്കം സ്ഥിരമായ ഫലം നല്‍കുകയുള്ളൂവെന്നാണ് ഈ മേഖലയിലെ സംഘടനകളുടെ വിലയിരുത്തല്‍.