ലണ്ടന്‍: ബ്രിട്ടീഷ് രാജകുടുംബാംഗമായ പ്രിന്‍സസ് യൂജിനിക്കും ഭര്‍ത്താവ് ജാക്ക് ബ്രൂക്‌സ്ബാങ്കിനും മൂന്നാമത്തെ കുഞ്ഞ് പിറന്നു. 'അഡലൈഡ് എലിസബത്ത് അന്നിന ബ്രൂക്‌സ്ബാങ്ക്' എന്നാണ് പെണ്‍കുഞ്ഞിന് പേരിട്ടിരിക്കുന്നത്. അന്തരിച്ച എലിസബത്ത് രണ്ടാമന്‍ രാജ്ഞിയോടുള്ള ആദരസൂചകമായാണ് കുഞ്ഞിന്റെ പേരില്‍ 'എലിസബത്ത്' ഉള്‍പ്പെടുത്തിയതെന്ന് യൂജിനി വ്യക്തമാക്കി. ''ഞങ്ങളുടെ ഹൃദയത്തോട് ഏറെ ചേര്‍ന്നുനില്‍ക്കുന്ന മുത്തശ്ശിയും ഈ പേരിലുണ്ട്,'' കുഞ്ഞിന്റെ ചിത്രങ്ങള്‍ പങ്കുവച്ചുകൊണ്ട് യൂജിനി സമൂഹമാധ്യമത്തില്‍ കുറിച്ചു. ഇംഗ്ലിഷ്, പോര്‍ച്ചുഗീസ് രാജകീയ ചരിത്രങ്ങളുമായും കുഞ്ഞിന്റെ പേരിന് ബന്ധമുണ്ടെന്നും ബ്രിട്ടനും പോര്‍ച്ചുഗലും തങ്ങള്‍ ഏറെ സ്‌നേഹിക്കുകയും വീടായി കാണുകയും ചെയ്യുന്ന സ്ഥലങ്ങളാണെന്നും അവര്‍ വ്യക്തമാക്കി. പോര്‍ച്ചുഗല്‍ തലസ്ഥാനമായ ലിസ്ബണിലെ ആശുപത്രിയില്‍ ഓഗസ്റ്റ് മൂന്നിനാണ് കുഞ്ഞ് ജനിച്ചത്. ജനിക്കുമ്പോള്‍ ആറു പൗണ്ട് ഒന്‍പത് ഔണ്‍സ്, ഏകദേശം മൂന്ന് കിലോഗ്രാം ആയിരുന്നു ഭാരം.

2021ല്‍ ജനിച്ച ഓഗസ്റ്റ് ഫിലിപ്പ് ഹോക്ക് ബ്രൂക്‌സ്ബാങ്കും 2023ല്‍ ജനിച്ച ഏണസ്റ്റ് ജോര്‍ജ് റോണി ബ്രൂക്‌സ്ബാങ്കുമാണ് യൂജിനി-ജാക്ക് ദമ്പതികളുടെ മൂത്ത മക്കള്‍. നവജാത ശിശുവിനെ ഓഗസ്റ്റും ഏണസ്റ്റും ചേര്‍ത്തുപിടിക്കുന്ന ചിത്രവും യൂജിനി പങ്കുവച്ചു. ഇരുവരും ഇതിനകം തന്നെ മികച്ച വലിയ സഹോദരന്മാരായി മാറിയെന്നും യൂജിനി പറഞ്ഞു.

പേരിന് പിന്നില്‍ രാജകീയ ചരിത്രം

'അഡലൈഡ്' എന്ന പേരിന് ബ്രിട്ടീഷ്, പോര്‍ച്ചുഗീസ് രാജകീയ ചരിത്രവുമായി ബന്ധമുണ്ട്. ബ്രിട്ടിഷ് രാജാവായ വില്യം നാലാമന്റെ ഭാര്യ ക്വീന്‍ അഡലൈഡിനോടും പോര്‍ച്ചുഗലിലെ സാന്ത മരിയ അഡലൈഡിനോടും ഈ പേര് ബന്ധപ്പെട്ടിരിക്കുന്നതായാണ് റിപ്പോര്‍ട്ടുകള്‍. 'എലിസബത്ത്' എന്ന പേര് യൂജിനിയുടെ മുത്തശ്ശിയും ബ്രിട്ടന്റെ അന്തരിച്ച രാജ്ഞിയുമായ എലിസബത്ത് രണ്ടാമന്റെ സ്മരണയ്ക്കായാണ് നല്‍കിയിരിക്കുന്നത്. 'അന്നിന' എന്ന പേരിന്റെ പിന്നിലെ പ്രചോദനം കുടുംബം വ്യക്തമാക്കിയിട്ടില്ല. എന്നാല്‍ കുടുംബവുമായി അടുത്ത വ്യക്തിപരമായ ബന്ധമുള്ള പേരാണെന്നാണ് റിപ്പോര്‍ട്ടുകള്‍.

സിംഹാസനാവകാശ പട്ടികയില്‍ 15-ാം സ്ഥാനം

പുതിയ കുഞ്ഞ് ബ്രിട്ടിഷ് സിംഹാസനാവകാശ പട്ടികയില്‍ 15-ാം സ്ഥാനത്താണ്. കുഞ്ഞിന്റെ ജനനത്തോടെ യൂജിനിയുടെ അമ്മാവനായ പ്രിന്‍സ് എഡ്വേഡ് പട്ടികയില്‍ ഒരു സ്ഥാനം പിന്നിലായി. അതേസമയം, കുഞ്ഞിന് 'ഹെര്‍ റോയല്‍ ഹൈനെസ്' (HRH) പദവി ഉണ്ടായിരിക്കില്ല. കുഞ്ഞിന്റെ ജനനവാര്‍ത്ത അറിഞ്ഞതില്‍ രാജാവും രാജ്ഞിയും രാജകുടുംബത്തിലെ മറ്റ് അംഗങ്ങളും സന്തോഷം പ്രകടിപ്പിച്ചതായി ബക്കിങ്ങാം പാലസ് അറിയിച്ചിരുന്നു.

പോര്‍ച്ചുഗലിലും ലണ്ടനിലുമായി കുടുംബജീവിതം

പ്രിന്‍സസ് യൂജിനിയും ജാക്ക് ബ്രൂക്‌സ്ബാങ്കും 2018 ഒക്ടോബറിലാണ് വിവാഹിതരായത്. കുടുംബം പോര്‍ച്ചുഗലിലും ലണ്ടനിലെ കെന്‍സിങ്ടണ്‍ പാലസ് വളപ്പിലുള്ള ഐവി കോട്ടേജിലുമായി മാറിമാറിയാണ് താമസിക്കുന്നത്. താന്‍ മൂന്നാമത്തെ കുഞ്ഞിനെ പ്രതീക്ഷിക്കുന്ന വിവരം കഴിഞ്ഞ മേയിലാണ് യൂജിനി പുറത്തുവിട്ടത്. മൂത്ത മക്കളായ ഓഗസ്റ്റും ഏണസ്റ്റും കുഞ്ഞിന്റെ സ്‌കാന്‍ ചിത്രം പിടിച്ചുനില്‍ക്കുന്ന ചിത്രം പങ്കുവച്ചായിരുന്നു ഗര്‍ഭധാരണവാര്‍ത്ത അറിയിച്ചത്. പുതിയ അംഗത്തിന്റെ വരവോടെ യൂജിനി-ജാക്ക് കുടുംബത്തില്‍ മൂന്ന് കുട്ടികളായി.