|
ഇന്ത്യ- യുകെ സ്വതന്ത്ര വ്യാപാര കരാര് യാഥാര്ത്ഥ്യത്തിലേക്ക്. കരാര് സംബന്ധിച്ച ചര്ച്ചകള് വിജയകരമായി പൂര്ത്തിയാക്കിയതായി ഇന്ത്യന് പ്രധാനമന്ത്രി നരേന്ദ്ര മോദിയും യുകെ പ്രധാനമന്ത്രി കെയ്ര് സ്റ്റാര്മറും അറിയിച്ചു. ബ്രിട്ടീഷ് പ്രധാനമന്ത്രി കെയ്ര് സ്റ്റാര്മറുമായി സംസാരിച്ചുവെന്നും മോദി 'എക്സ്' പോസ്റ്റില് വ്യക്തമാക്കി. കരാര് ഒപ്പിടാന് യു കെ പ്രധാനമന്ത്രി ഇന്ത്യയിലെത്തുമെന്നാണ് വിവരം.
'ഇന്ത്യയും യുകെയും തമ്മിലുള്ള സ്വതന്ത്ര വ്യാപാര കരാറിനുള്ള ചര്ച്ചകള് വിജയകരമായി പൂര്ത്തിയായി. ഇരുരാജ്യങ്ങള്ക്കും പ്രയോജനം ചെയ്യുന്ന കരാറിലൂടെ ബന്ധം മെച്ചപ്പെടും. വ്യാപാരവും തൊഴിലും നിക്ഷേപവും വര്ധിക്കും.' എക്സ് പോസ്റ്റില് നരേന്ദ്ര മോദി പറഞ്ഞു. സ്വതന്ത്ര വ്യാപാര കരാറിന് വേണ്ടി ഇരുരാജ്യങ്ങളും തമ്മില് വര്ഷങ്ങളായി നടത്തിയ ചര്ച്ചകളാണ് പൂര്ത്തിയായിരിക്കുന്നത്.
''പ്രധാനമന്ത്രി നരേന്ദ്ര മോദിയും ബ്രിട്ടീഷ് പ്രധാനമന്ത്രി കെയ്ര് സ്റ്റാര്മറും ടെലിഫോണ് സംഭാഷണം നടത്തി. അഭിലാഷകരവും പരസ്പരം പ്രയോജനകരവുമായ ഇന്ത്യ-യുകെ സ്വതന്ത്ര വ്യാപാര കരാറിന്റെ വിജയകരമായ സമാപനത്തെ ഇരു നേതാക്കളും സ്വാഗതം ചെയ്തു,'' സര്ക്കാര് പുറത്തിറക്കിയ പ്രസ്താവനയില് പറഞ്ഞു. |
