ലണ്ടന്: ബ്രിട്ടനിലെ മുഖ്യപ്രതിപക്ഷമായ കണ്സര്വേറ്റീവ് പാര്ട്ടിയുടെ ഷാഡോ കാബിനറ്റില് അഴിച്ചുപണിക്ക് ഒരുങ്ങി പ്രതിപക്ഷ നേതാവ് കെമി ബേഡനോക്ക്. ഇന്ത്യന് വംശജയായ പ്രീതി പട്ടേലിന് പകരം മുന് ടോറി നേതൃസ്ഥാനാര്ഥിയും മുന് സുരക്ഷാ മന്ത്രിയുമായ ടോം ടുഗന്ഹാറ്റിനെ ഷാഡോ വിദേശകാര്യ സെക്രട്ടറിയായി നിയമിക്കുമെന്നാണ് റിപ്പോര്ട്ട്. അടുത്ത മാസം നടക്കുന്ന ഷാഡോ കാബിനറ്റ് പുനഃസംഘടനയിലായിരിക്കും നിയമനം. കഴിഞ്ഞ രണ്ട് വര്ഷമായി പാര്ലമെന്റിലെ കണ്സര്വേറ്റീവ് പാര്ട്ടിയുടെ വിദേശകാര്യ സംഘത്തെ നയിച്ചുവരുന്ന പ്രീതി പട്ടേല് പുതിയ ചുമതലയിലേക്ക് മാറും. ലോകത്തിന്റെ വിവിധ ഭാഗങ്ങളിലുള്ള സഹോദര കണ്സര്വേറ്റീവ് പാര്ട്ടികളുമായും മധ്യ-വലതുപക്ഷ രാഷ്ട്രീയ പ്രസ്ഥാനങ്ങളുമായും ബന്ധം ശക്തിപ്പെടുത്തുന്നതിനുള്ള ചുമതലയാണ് ഏറ്റെടുക്കുന്നതെന്ന് പട്ടേല് സമൂഹമാധ്യമത്തിലൂടെ അറിയിച്ചു. 2024ലെ കണ്സര്വേറ്റീവ് പാര്ട്ടി നേതൃതിരഞ്ഞെടുപ്പില് നാലാം സ്ഥാനത്തെത്തിയ ടുഗന്ഹാറ്റ് പിന്നീട് ബാക്ക്ബെഞ്ചിലായിരുന്നു. ഷാഡോ വിദേശകാര്യ സെക്രട്ടറിയാകുന്നതോടെ പാര്ട്ടിയുടെ മുന്നിര നേതൃത്വത്തിലേക്കുള്ള അദ്ദേഹത്തിന്റെ തിരിച്ചുവരവായിരിക്കും ഇത്.
രാജ്യാന്തര ബന്ധങ്ങളിലും ദേശീയ സുരക്ഷാ വിഷയങ്ങളിലും ശക്തമായ നിലപാടുകള് സ്വീകരിച്ചിട്ടുള്ള ടുഗന്ഹാറ്റ് മുന് സുരക്ഷാ മന്ത്രിയാണ്. ബോറിസ് ജോണ്സന്റെയും ലിസ് ട്രസിന്റെയും സര്ക്കാരുകളില് അദ്ദേഹം സുരക്ഷാ മന്ത്രിയായി പ്രവര്ത്തിച്ചിട്ടുണ്ട്. അതിനു മുമ്പ് അഞ്ച് വര്ഷത്തോളം പാര്ലമെന്റിന്റെ വിദേശകാര്യ സെലക്ട് കമ്മിറ്റി അധ്യക്ഷനായിരുന്നു. ബ്രിട്ടീഷ് ആര്മി റിസര്വിലും ടെറിറ്റോറിയല് ആര്മിയിലും സേവനമനുഷ്ഠിച്ച അനുഭവവും അദ്ദേഹത്തിനുണ്ട്. 2024ലെ പാര്ട്ടി നേതൃതിരഞ്ഞെടുപ്പില് ആറാം സ്ഥാനത്തെത്തിയതിന് പിന്നാലെയാണ് പ്രീതി പട്ടേലിനെ കെമി ബേഡനോക്ക് ഷാഡോ കാബിനറ്റില് ഉള്പ്പെടുത്തിയത്. ബോറിസ് ജോണ്സണ് പ്രധാനമന്ത്രിയായിരുന്ന കാലത്ത് മൂന്ന് വര്ഷം ആഭ്യന്തര മന്ത്രിയായിരുന്ന പട്ടേല് കണ്സര്വേറ്റീവ് സര്ക്കാരുകളില് നിരവധി സുപ്രധാന ചുമതലകളും വഹിച്ചിട്ടുണ്ട്.
അതേസമയം, ഷാഡോ ഭവനകാര്യ സെക്രട്ടറി ജെയിംസ് ക്ലെവര്ലി ലണ്ടന് മേയര് സ്ഥാനത്തേക്ക് മത്സരിക്കാനുള്ള തയ്യാറെടുപ്പിന്റെ ഭാഗമായി ഷാഡോ കാബിനറ്റില്നിന്ന് രാജിവച്ചിട്ടുണ്ട്. ഇതോടെ അദ്ദേഹത്തിന് പകരക്കാരനെയും ബേഡനോക്കിന് കണ്ടെത്തേണ്ടിവരും. ഷാഡോ ഊര്ജകാര്യ സെക്രട്ടറി ക്ലെയര് കൗട്ടിന്ഹോയുടെ വരാനിരിക്കുന്ന പ്രസവാവധിയും കണക്കിലെടുത്താണ് പാര്ട്ടിയില് വ്യാപകമായ അഴിച്ചുപണി പ്രതീക്ഷിക്കുന്നത്. ഷാഡോ ധനമന്ത്രി മെല് സ്ട്രൈഡിനെയും മാറ്റിയേക്കുമെന്ന അഭ്യൂഹങ്ങളുണ്ടെങ്കിലും ഇതുസംബന്ധിച്ച് ഇതുവരെ ഔദ്യോഗിക സൂചനകളൊന്നുമില്ല. ക്ലെയര് കൗട്ടിന്ഹോയെ ഭാവിയിലെ ഷാഡോ ധനമന്ത്രിയായി പരിഗണിക്കാവുന്ന നേതാവായി പാര്ട്ടിയിലെ ചിലര് കാണുന്നുണ്ട്. എന്നാല് പ്രസവാവധിയിലായിരിക്കെ അവരെ ആ സ്ഥാനത്തേക്ക് നിയമിക്കാനുള്ള സാധ്യത കുറവാണെന്നാണ് വിലയിരുത്തല്.
2028 മേയില് നടക്കുന്ന ലണ്ടന് മേയര് തിരഞ്ഞെടുപ്പില് മത്സരിക്കാനുള്ള തയ്യാറെടുപ്പിനായാണ് ക്ലെവര്ലി ഷാഡോ ഭവനകാര്യ സെക്രട്ടറി സ്ഥാനം ഒഴിഞ്ഞത്. എന്നാല് കണ്സര്വേറ്റീവ് പാര്ട്ടിയുടെ ഔദ്യോഗിക മേയര് സ്ഥാനാര്ഥിയായി അദ്ദേഹത്തെ ഇതുവരെ പ്രഖ്യാപിച്ചിട്ടില്ല. ബ്രെയിന്ട്രീ മണ്ഡലത്തിലെ എംപി സ്ഥാനവും ക്ലെവര്ലി രാജിവച്ചിട്ടില്ല. ഭരണകക്ഷിയുടെ മന്ത്രിസഭയ്ക്ക് സമാന്തരമായി മുഖ്യപ്രതിപക്ഷം രൂപീകരിക്കുന്ന മുതിര്ന്ന നേതാക്കളുടെ സംഘമാണ് ഷാഡോ കാബിനറ്റ്. സര്ക്കാരിലെ ഓരോ പ്രധാന മന്ത്രാലയത്തിനും സമാനമായ ചുമതലയുള്ള ഷാഡോ മന്ത്രിമാരാണ് ഇതില് ഉള്പ്പെടുന്നത്. സര്ക്കാരിന്റെ നയങ്ങളും തീരുമാനങ്ങളും നിരീക്ഷിക്കുകയും വിമര്ശിക്കുകയും ബദല് നയങ്ങള് മുന്നോട്ടുവയ്ക്കുകയും ചെയ്യുന്നതാണ് ഷാഡോ കാബിനറ്റിന്റെ പ്രധാന ചുമതല.
