ലണ്ടന്‍: വേനല്‍ക്കാല ഇടവേളയ്ക്ക് ശേഷം ബ്രിട്ടീഷ് പാര്‍ലമെന്റ് സെപ്റ്റംബര്‍ ഒന്നിന് വീണ്ടും സമ്മേളിക്കുന്നതോടെ പ്രധാനമന്ത്രി ആന്‍ഡി ബേണെത്തിന്റെ പാര്‍ലമെന്ററി പ്രവര്‍ത്തനങ്ങള്‍ സജീവമാകും. പ്രധാനമന്ത്രിയായി അധികാരമേറ്റ ശേഷമുള്ള ആദ്യ പാര്‍ലമെന്ററി സമ്മേളനത്തില്‍ സര്‍ക്കാരിന്റെ മുന്‍ഗണനകളും നയങ്ങളും സംബന്ധിച്ച എംപിമാരുടെ ചോദ്യങ്ങള്‍ക്ക് അദ്ദേഹം മറുപടി നല്‍കും. സെപ്റ്റംബര്‍ രണ്ടിന് നടക്കുന്ന പ്രധാനമന്ത്രിയുടെ ചോദ്യോത്തര വേളയായ പിഎംക്യൂസിലായിരിക്കും ബേണെത്തിന്റെ പ്രധാന പാര്‍ലമെന്ററി സാന്നിധ്യം. അധികാരമേറ്റിട്ട് ആറ് ആഴ്ച പിന്നിടുന്നതിനിടെയാണ് അദ്ദേഹം ആദ്യമായി പിഎംക്യൂസിനെ നേരിടുന്നത്. രാജ്യത്തിന്റെ വിവിധ ഭാഗങ്ങള്‍ സന്ദര്‍ശിക്കുകയും പോഡ്കാസ്റ്റുകള്‍ ഉള്‍പ്പെടെയുള്ള പൊതുവേദികളില്‍ പങ്കെടുക്കുകയും ജീവിതച്ചെലവ് കുറയ്ക്കുന്നതിനുള്ള പദ്ധതികള്‍ പ്രഖ്യാപിക്കുകയും ചെയ്താണ് അധികാരമേറ്റ ശേഷമുള്ള ആദ്യ ആഴ്ചകളില്‍ ബേണെം മുന്നോട്ടുപോയത്. ആദ്യ പിഎംക്യൂസില്‍ കുറിപ്പുകളെ അധികമായി ആശ്രയിക്കാതെ സംസാരിക്കാനും കൂടുതല്‍ സൗഹൃദപരമായ സമീപനം സ്വീകരിക്കാനുമാണ് ബേണെം ആലോചിക്കുന്നതെന്നാണ് റിപ്പോര്‍ട്ടുകള്‍.

അതേസമയം, കണ്‍സര്‍വേറ്റീവ് പാര്‍ട്ടി നേതാവ് കിമി ബാഡനോക്ക് ഉള്‍പ്പെടെയുള്ള പ്രതിപക്ഷ നേതാക്കള്‍ സര്‍ക്കാരിനെ കടുത്ത ചോദ്യങ്ങളിലൂടെ പ്രതിരോധത്തിലാക്കാനുള്ള ഒരുക്കത്തിലാണ്. പ്രതിരോധ ചെലവ്, നികുതി വര്‍ധനയ്ക്കുള്ള സാധ്യത, തടവുകാരുടെ നേരത്തെയുള്ള മോചനം തുടങ്ങിയ വിഷയങ്ങളായിരിക്കും പ്രതിപക്ഷം പ്രധാനമായും ഉയര്‍ത്തിക്കാട്ടുക. എല്ലാവരെയും തൃപ്തിപ്പെടുത്താന്‍ ശ്രമിക്കുന്ന നേതാവാണ് ബേണെമെന്ന് ബാഡനോക്ക് ഇതിനകം വിമര്‍ശനം ഉന്നയിച്ചിട്ടുണ്ട്. പൊലീസ് കോണ്‍സ്റ്റബിള്‍ ആന്‍ഡ്രൂ ഹാര്‍പ്പറെ കൊലപ്പെടുത്തിയ കേസിലെ പ്രതികള്‍ ഉള്‍പ്പെടെയുള്ള ഗുരുതര കുറ്റകൃത്യങ്ങളില്‍ ശിക്ഷിക്കപ്പെട്ടവര്‍ നേരത്തെ ജയില്‍ മോചിതരാകുന്നത് തടയുന്നതിനുള്ള നടപടികളും സര്‍ക്കാരിന് മുന്നിലുള്ള പ്രധാന വിഷയമാണ്. ഇതുമായി ബന്ധപ്പെട്ട പുതിയ നടപടികള്‍ ജസ്റ്റിസ് സെക്രട്ടറി അലക്‌സ് നോറിസ് പാര്‍ലമെന്റില്‍ പ്രഖ്യാപിക്കുമെന്നാണ് വിവരം. ജയിലുകളിലെ ശേഷി വര്‍ധിപ്പിക്കുന്നതിനൊപ്പം ചില വിഭാഗം തടവുകാര്‍ക്ക് നേരത്തെയുള്ള മോചനാനുകൂല്യം ലഭിക്കാതിരിക്കാനുള്ള നിയമവ്യവസ്ഥകളും സര്‍ക്കാര്‍ പരിഗണിക്കുന്നുണ്ട്.

നികുതി നയവും ബേണെം സര്‍ക്കാരിന് രാഷ്ട്രീയ വെല്ലുവിളിയായി തുടരുകയാണ്. 2024ലെ ലേബര്‍ പാര്‍ട്ടി തിരഞ്ഞെടുപ്പ് പ്രകടനപത്രികയില്‍ നല്‍കിയ ആദായനികുതി, വാറ്റ്, നാഷനല്‍ ഇന്‍ഷുറന്‍സ് എന്നിവ വര്‍ധിപ്പിക്കില്ലെന്ന വാഗ്ദാനം പാലിക്കുമെന്ന് പ്രധാനമന്ത്രി ആവര്‍ത്തിച്ചിട്ടുണ്ട്. എന്നാല്‍ നികുതി നയത്തില്‍ മാറ്റങ്ങള്‍ക്ക് സാധ്യതയുണ്ടെന്ന അദ്ദേഹത്തിന്റെ പരാമര്‍ശം പ്രതിപക്ഷത്തിന് വിമര്‍ശനത്തിനുള്ള പുതിയ ആയുധമായിട്ടുണ്ട്. ഒക്ടോബര്‍ 28ന് ചാന്‍സലര്‍ ജോണ്‍ ഹീലി അവതരിപ്പിക്കുന്ന ബജറ്റും സര്‍ക്കാരിന്റെ നിര്‍ണായക പരീക്ഷണമായിരിക്കും. മുന്‍ സര്‍ക്കാരിന്റെ ബജറ്റ് പ്രഖ്യാപനങ്ങളുമായി ബന്ധപ്പെട്ട വിവരങ്ങള്‍ ഔദ്യോഗിക പ്രഖ്യാപനത്തിന് മുമ്പ് മാധ്യമങ്ങളില്‍ പുറത്തുവന്നത് രാഷ്ട്രീയ തിരിച്ചടിക്ക് കാരണമായ പശ്ചാത്തലത്തില്‍ ഇത്തവണ ബജറ്റിന്റെ രഹസ്യസ്വഭാവം കര്‍ശനമായി സംരക്ഷിക്കാനാണ് ട്രഷറിയുടെ തീരുമാനം.

പ്രതിരോധ മേഖലയ്ക്കായി അധികമായി 4.7 ബില്യന്‍ പൗണ്ട് കണ്ടെത്തേണ്ട സാഹചര്യവും സര്‍ക്കാരിന് മുന്നിലുണ്ട്. പ്രതിരോധ ചെലവ് ജിഡിപിയുടെ മൂന്ന് ശതമാനമായി ഉയര്‍ത്തുന്നതിനുള്ള വിശദമായ പദ്ധതി ഒക്ടോബര്‍ ബജറ്റില്‍ പ്രഖ്യാപിക്കുന്നതിന് പകരം അടുത്ത വസന്തകാലത്തെ ചെലവ് അവലോകനത്തില്‍ അവതരിപ്പിക്കാനാണ് സര്‍ക്കാര്‍ ആലോചിക്കുന്നത്. സര്‍ക്കാര്‍ നയരൂപീകരണത്തില്‍ ട്രഷറിയുടെ പരമ്പരാഗത സ്വാധീനം കുറയ്ക്കാനുള്ള നീക്കവും ബേണെം ആരംഭിച്ചിട്ടുണ്ട്. പ്രാദേശിക സാമ്പത്തിക വളര്‍ച്ചയുമായി ബന്ധപ്പെട്ട ചില നയങ്ങളുടെ നിയന്ത്രണം ട്രഷറിയില്‍നിന്ന് മാറ്റി മാഞ്ചസ്റ്റര്‍ ആസ്ഥാനമായ പുതിയ 'നമ്പര്‍ 10 നോര്‍ത്ത്' സംവിധാനത്തിലേക്ക് കൊണ്ടുവരാനുള്ള പദ്ധതിയും പ്രഖ്യാപിച്ചിട്ടുണ്ട്. ആഭ്യന്തര വിഷയങ്ങള്‍ക്കൊപ്പം വിദേശനയവും വരും ദിവസങ്ങളില്‍ പ്രധാനമന്ത്രിയുടെ അജന്‍ഡയില്‍ ഇടംപിടിക്കും. ഫ്രഞ്ച് പ്രസിഡന്റ് ഇമ്മാനുവല്‍ മാക്രോയുടെ ഡൗണിങ് സ്ട്രീറ്റ് സന്ദര്‍ശനം ഉള്‍പ്പെടെയുള്ള നയതന്ത്ര പരിപാടികളിലും ബേണെം ശ്രദ്ധ കേന്ദ്രീകരിക്കും.

സ്വന്തം പാര്‍ട്ടിയിലെ എംപിമാരുമായുള്ള ബന്ധം ശക്തിപ്പെടുത്തുന്നതും പുതിയ പ്രധാനമന്ത്രിയുടെ പ്രധാന ലക്ഷ്യമാണ്. മുന്‍ പ്രധാനമന്ത്രി കിയ സ്റ്റാര്‍മര്‍ പാര്‍ലമെന്റിലെ ലേബര്‍ എംപിമാരുടെ അഭിപ്രായങ്ങള്‍ക്ക് വേണ്ടത്ര പരിഗണന നല്‍കിയില്ലെന്ന വിമര്‍ശനം നേരിട്ട സാഹചര്യത്തില്‍ എംപിമാരുമായി കൂടുതല്‍ നേരിട്ടുള്ള ആശയവിനിമയം നടത്താനാണ് ബേണെത്തിന്റെ നീക്കം. സാമ്പത്തിക സമ്മര്‍ദം തുടരുന്നതിനിടെ സര്‍ക്കാരിന്റെ മുന്‍ഗണനകളെക്കുറിച്ച് ലേബര്‍ എംപിമാര്‍ക്കിടയിലും വ്യത്യസ്ത നിലപാടുകളുണ്ട്. ജനങ്ങളുടെ പ്രതീക്ഷകള്‍ ഉയര്‍ന്ന നിലയിലാണെന്നും അവ നിറവേറ്റേണ്ടത് സര്‍ക്കാരിന്റെ ഉത്തരവാദിത്തമാണെന്നും ഡൗണിങ് സ്ട്രീറ്റ് വ്യക്തമാക്കുന്നു. പാര്‍ലമെന്റ് വീണ്ടും സമ്മേളിക്കുന്നതോടെ പ്രഖ്യാപിച്ച നയങ്ങള്‍ എത്രത്തോളം നടപ്പാക്കാന്‍ കഴിയുമെന്നതും പ്രതിപക്ഷത്തിന്റെ ചോദ്യങ്ങളെ ബേണെം എങ്ങനെ നേരിടുമെന്നതുമാണ് ബ്രിട്ടീഷ് രാഷ്ട്രീയത്തില്‍ ഇനി ശ്രദ്ധാകേന്ദ്രമാകുക.