മിഡില്‍സ്ബ്രോ: യുകെയിലെ മിഡില്‍സ്ബ്രോയ്ക്ക് സമീപം എ66 പാതയിലുണ്ടായ വാഹനാപകടത്തില്‍ മരിച്ച യുവാവിന്റെ സ്മരണയ്ക്കായി സംഘടിപ്പിച്ച ബലൂണ്‍ പറത്തല്‍ ചടങ്ങിനിടെ വാഹനങ്ങള്‍ കത്തിക്കുകയും പടക്കങ്ങളും ഫ്‌ലെയറുകളും ഉപയോഗിക്കുകയും ചെയ്ത സംഭവത്തില്‍ വ്യാപക പ്രതിഷേധം. ദുഃഖാചരണത്തിന്റെ പേരില്‍ നിയമവിരുദ്ധ പ്രവര്‍ത്തനങ്ങള്‍ നടത്തുന്നത് അംഗീകരിക്കാനാകില്ലെന്നും ഇത്തരം സംഭവങ്ങള്‍ പ്രദേശവാസികളുടെ സുരക്ഷയ്ക്ക് ഭീഷണിയാണെന്നും ജനപ്രതിനിധികളും പൊലീസും വ്യക്തമാക്കി. കൗണ്ടി ഡര്‍ഹാമിലെ ഹാസ്വെല്ലിന് സമീപമുള്ള സ്വകാര്യ സ്ഥലത്ത് വ്യാഴാഴ്ച വൈകിട്ടാണ് വലിയ സംഘം ആളുകള്‍ ഒത്തുകൂടിയത്. സ്മരണാചരണത്തിനിടെ അഞ്ച് വാഹനങ്ങള്‍ക്ക് തീയിടുകയും ബലൂണുകള്‍ പറത്തുന്നതിനൊപ്പം ഫ്‌ലെയറുകളും പടക്കങ്ങളും ഉപയോഗിക്കുകയും ചെയ്തതായി പൊലീസ് അറിയിച്ചു. സംഭവം പ്രദേശവാസികളില്‍ വലിയ ഭീതിയും പ്രതിഷേധവും സൃഷ്ടിച്ചു. അനധികൃത ബൈക്കുകളും ക്വാഡ് ബൈക്കുകളും പ്രദേശത്ത് അമിതവേഗത്തില്‍ സഞ്ചരിച്ചതും തീയും പടക്കങ്ങളും ഉപയോഗിച്ചതും ജനങ്ങളുടെ സുരക്ഷയെക്കുറിച്ചുള്ള ആശങ്ക വര്‍ധിപ്പിച്ചതായി റെഡ്കാര്‍ എംപി അന്ന ടര്‍ലി പറഞ്ഞു.

മരിച്ചവരെ അനുസ്മരിക്കാനും ആദരാഞ്ജലി അര്‍പ്പിക്കാനും എല്ലാവര്‍ക്കും അവകാശമുണ്ടെങ്കിലും സ്വന്തം വീടുകളിലും പ്രദേശങ്ങളിലും സുരക്ഷിതരായി കഴിയാനുള്ള അവകാശം പ്രദേശവാസികള്‍ക്കുമുണ്ടെന്ന് അന്ന ടര്‍ലി വ്യക്തമാക്കി. ദുഃഖവും വികാരവും നിയമവിരുദ്ധ പ്രവര്‍ത്തനങ്ങള്‍ക്ക് മറയാക്കാന്‍ അനുവദിക്കരുതെന്നും അവര്‍ ആവശ്യപ്പെട്ടു. സംഭവത്തെ ഡര്‍ഹാം പൊലീസ് ശക്തമായി അപലപിച്ചു. ഒരു ദുരന്തത്തെ അക്രമത്തിനുള്ള ന്യായീകരണമായി ഉപയോഗിക്കുന്നത് ഒരിക്കലും അംഗീകരിക്കാനാകില്ലെന്ന് അസിസ്റ്റന്റ് ചീഫ് കോണ്‍സ്റ്റബിള്‍ ജോണ്‍ മക്ആഡം പറഞ്ഞു. വ്യാഴാഴ്ച വൈകിട്ട് 5.30ഓടെയാണ് സംഭവത്തെക്കുറിച്ച് പൊലീസിന് വിവരം ലഭിച്ചത്. സ്ഥലത്ത് ഒത്തുകൂടിയവരില്‍ ഭൂരിഭാഗവും കൗണ്ടി ഡര്‍ഹാമിന് പുറത്തുനിന്നെത്തിയവരായിരുന്നെന്നും നിരവധി വാഹനങ്ങളുമായാണ് സംഘം എത്തിയതെന്നും പൊലീസ് അറിയിച്ചു. സംഭവത്തില്‍ ആര്‍ക്കും പരുക്കേറ്റിട്ടില്ല. ഇതുവരെ ആരെയും അറസ്റ്റ് ചെയ്തിട്ടില്ലെന്നും അന്വേഷണം തുടരുകയാണെന്നും പൊലീസ് വ്യക്തമാക്കി.

അഞ്ച് വാഹനങ്ങള്‍ക്ക് തീയിട്ടിട്ടും അവ ഉടന്‍ അണയ്ക്കാതിരുന്നത് സ്ഥലത്തെ സാഹചര്യം വിലയിരുത്തിയ ശേഷമാണെന്നും അധികൃതര്‍ വിശദീകരിച്ചു. സ്വകാര്യ സ്ഥലത്തിനുള്ളിലായിരുന്ന തീ നിയന്ത്രണവിധേയമാണെന്നും പൊതുജനങ്ങള്‍ക്ക് അടിയന്തര ഭീഷണിയില്ലെന്നും വിലയിരുത്തിയതിനെ തുടര്‍ന്നാണ് അഗ്‌നിശമനസേനയുടെ ഇടപെടല്‍ പരിമിതപ്പെടുത്തിയത്. പ്രദേശത്ത് പൊലീസ് സാന്നിധ്യം ശക്തമാക്കിയിട്ടുണ്ട്. കഴിഞ്ഞ ശനിയാഴ്ച മിഡില്‍സ്ബ്രോയ്ക്ക് സമീപം എ66 പാതയിലുണ്ടായ വാഹനാപകടത്തില്‍ രണ്ട് പൊലീസ് ഉദ്യോഗസ്ഥര്‍ ഉള്‍പ്പെടെ ഏഴ് പേരാണ് മരിച്ചത്. പിസി മാത്യു ബ്ലേഡ്സ്, പിസി ടോം ക്ലഫ് എന്നിവരാണ് മരിച്ച പൊലീസ് ഉദ്യോഗസ്ഥര്‍. തെറ്റായ ദിശയില്‍ സഞ്ചരിച്ച വോക്സ്വാഗണ്‍ പസാറ്റ് പൊലീസ് വാഹനവുമായി കൂട്ടിയിടിക്കുകയായിരുന്നു. പസാറ്റിലുണ്ടായിരുന്ന അഞ്ച് യുവാക്കളും അപകടത്തില്‍ മരിച്ചു. അപകടത്തില്‍ മരിച്ച അഞ്ച് യുവാക്കളില്‍ ഒരാളുടെ സ്മരണയ്ക്കായാണ് ഹാസ്വെല്ലില്‍ ചടങ്ങ് സംഘടിപ്പിച്ചതെന്നാണ് വിവരം. അപകടത്തിന് മുമ്പുണ്ടായ സംഭവങ്ങളുമായി ബന്ധപ്പെട്ട അന്വേഷണത്തിന്റെ ഭാഗമായി ടെസൈഡ് മേഖലയില്‍ 16നും 61നും ഇടയില്‍ പ്രായമുള്ള 17 പേരെ പൊലീസ് അറസ്റ്റ് ചെയ്തിട്ടുണ്ട്.

അതേസമയം, ബുധനാഴ്ച ഗ്രാന്‍ജ്ടൗണിലുണ്ടായ വീടുതീയില്‍ 34കാരിയായ നതാലി മക്‌ഡൊണാള്‍ഡും ഏഴ് വയസ്സുകാരിയായ അനന്തരവള്‍ വാലന്റീന ഫോസ്റ്ററും മരിച്ചിരുന്നു. തുടര്‍ച്ചയായ ദുരന്തങ്ങളില്‍ പ്രദേശം ദുഃഖത്തിലായിരിക്കെയാണ് സ്മരണാചരണത്തിനിടെ അക്രമസംഭവങ്ങള്‍ അരങ്ങേറിയത്. എ66 അപകടത്തില്‍ മരിച്ച രണ്ട് പൊലീസ് ഉദ്യോഗസ്ഥരുടെ കുടുംബങ്ങളെ സഹായിക്കുന്നതിനായി ആരംഭിച്ച ധനസമാഹരണത്തില്‍ 10 ലക്ഷം പൗണ്ടിലധികം ലഭിച്ചതായും പൊലീസ് ഫെഡറേഷന്‍ അറിയിച്ചു.