ലണ്ടന്‍: റെക്കോര്‍ഡ് ചൂടും രൂക്ഷമായ മഴക്കുറവും യുകെയിലെ കാര്‍ഷിക മേഖലയെ കടുത്ത പ്രതിസന്ധിയിലാക്കുന്നു. വരണ്ട വസന്തകാലത്തിനും വേനലിനും പിന്നാലെ ഈ വര്‍ഷത്തെ വിളവെടുപ്പ് ചരിത്രത്തിലെ ഏറ്റവും മോശമായ നിലയിലേക്കെത്താമെന്നാണ് വിദഗ്ധരുടെ മുന്നറിയിപ്പ്. കാര്‍ഷിക ഉല്‍പാദനം കുറയുന്നതിന്റെ പ്രതിഫലനമായി വരും ദിവസങ്ങളിലും ആഴ്ചകളിലും സൂപ്പര്‍മാര്‍ക്കറ്റുകളില്‍ എത്തുന്ന പച്ചക്കറികള്‍ സാധാരണയേക്കാള്‍ വലുപ്പം കുറഞ്ഞതാകാനും വില ഉയരാനും സാധ്യതയുണ്ടെന്ന് കര്‍ഷകരും കാര്‍ഷിക മേഖലയിലെ പ്രതിനിധികളും പറയുന്നു. ഇംഗ്ലണ്ടും വെയില്‍സും 190 വര്‍ഷത്തിനിടയിലെ ഏറ്റവും വരണ്ട ജൂലൈയാണ് നേരിട്ടതെന്ന് മെറ്റ് ഓഫിസ് കണക്കുകള്‍ വ്യക്തമാക്കുന്നു. രാജ്യത്തിന്റെ വലിയൊരു ഭാഗത്ത് നിലവില്‍ വരള്‍ച്ച പ്രഖ്യാപിച്ചിരിക്കുകയാണ്. ആവശ്യത്തിന് വെള്ളം ലഭിക്കാത്തതും തുടര്‍ച്ചയായ ഉയര്‍ന്ന താപനിലയും വിളകളുടെ വളര്‍ച്ചയെയും ഗുണനിലവാരത്തെയും കാര്യമായി ബാധിച്ചു.

പച്ചക്കറികള്‍ ചെറുതാകും; വില ഉയര്‍ന്നേക്കും

നിലവിലെ സാഹചര്യം ഇതുവരെ കണ്ടതില്‍ ഏറ്റവും മോശമാണെന്ന് നേഷന്‍വൈഡ് പ്രൊഡ്യൂസ് ചെയര്‍മാന്‍ ടിം ഒ'മാലി പറഞ്ഞു. വിളവ് വന്‍തോതില്‍ കുറയുന്നതിനൊപ്പം പച്ചക്കറികളുടെ ഗുണനിലവാരത്തിലും പ്രശ്‌നങ്ങള്‍ നേരിടുന്നുണ്ട്. സാധാരണ വലുപ്പത്തിലുള്ള പച്ചക്കറികള്‍ക്കു പകരം ചെറിയവ അതേ വിലയ്ക്ക് വില്‍ക്കുന്ന 'ഷ്രിങ്ക്ഫ്‌ലേഷന്‍' സാഹചര്യം സൂപ്പര്‍മാര്‍ക്കറ്റുകളില്‍ രൂപപ്പെട്ടേക്കാമെന്നാണ് മുന്നറിയിപ്പ്. വില പിടിച്ചുനിര്‍ത്താന്‍ വ്യാപാര സ്ഥാപനങ്ങള്‍ പരമാവധി ശ്രമിക്കുമെങ്കിലും ആഭ്യന്തര ഉല്‍പാദനം കുറയുകയും ഇറക്കുമതി വര്‍ധിക്കുകയും ചെയ്താല്‍ വില കൂട്ടേണ്ടിവരുമെന്ന് ഒ'മാലി പറഞ്ഞു. സാധാരണയായി ഓഗസ്റ്റില്‍ ബ്രിട്ടനില്‍ തന്നെ ഉല്‍പാദിപ്പിക്കുന്ന ബ്രോക്കോളിയും ഐസ്ബര്‍ഗ് ലെറ്റിയൂസും ഇപ്പോള്‍ സ്‌പെയിനില്‍നിന്ന് ഇറക്കുമതി ചെയ്യേണ്ടിവരുന്നതായും അദ്ദേഹം ചൂണ്ടിക്കാട്ടി. ഈ സമയത്ത് വിദേശ ഉല്‍പന്നങ്ങളെ ആശ്രയിക്കേണ്ടിവരുന്നത് അസാധാരണമായ സാഹചര്യമാണെന്നും വരും ആഴ്ചകളില്‍ ഇറക്കുമതി കൂടുതല്‍ വര്‍ധിച്ചേക്കാമെന്നും അദ്ദേഹം വ്യക്തമാക്കി.

ധാന്യവിളവില്‍ റെക്കോര്‍ഡ് ഇടിവിന് സാധ്യത

എനര്‍ജി ആന്‍ഡ് ക്ലൈമറ്റ് ഇന്റലിജന്‍സ് യൂണിറ്റിന്റെ കണക്കനുസരിച്ച് യുകെയിലെ ധാന്യ-എണ്ണക്കുരു വിളവെടുപ്പ് നേരത്തെ കണക്കാക്കിയതിനേക്കാള്‍ ഏകദേശം 25 ലക്ഷം ടണ്‍ കുറയാം. ബാര്‍ലി, ഓട്‌സ്, റേപ്സീഡ് തുടങ്ങിയ വിളകളുടെ ആകെ ഉല്‍പാദനം 19.5 ദശലക്ഷം ടണ്ണിലേക്ക് ഇടിയുമെന്നാണ് വിലയിരുത്തല്‍. 1984ല്‍ രേഖകള്‍ ആരംഭിച്ചതിന് ശേഷമുള്ള ഏറ്റവും കുറഞ്ഞ വിളവായിരിക്കും ഇത്. 2020ല്‍ രേഖപ്പെടുത്തിയ 19.8 ദശലക്ഷം ടണ്ണാണ് നിലവിലെ ഏറ്റവും കുറഞ്ഞ നിരക്ക്. വിളവ് കുറയുന്നതിലൂടെ കര്‍ഷകര്‍ക്ക് ഏകദേശം 390 മില്യന്‍ പൗണ്ടിന്റെ വരുമാന നഷ്ടമുണ്ടാകാമെന്നും കണക്കാക്കുന്നു. ബിയര്‍, ബ്രേക്ക്ഫാസ്റ്റ് സീരിയല്‍, വെജിറ്റബിള്‍ ഓയില്‍ എന്നിവയുടെ നിര്‍മാണത്തിനൊപ്പം കന്നുകാലികളുടെ തീറ്റയ്ക്കും ഈ വിളകള്‍ വ്യാപകമായി ഉപയോഗിക്കുന്നതിനാല്‍ ഭക്ഷ്യവിതരണ ശൃംഖലയിലാകെ പ്രത്യാഘാതം അനുഭവപ്പെട്ടേക്കാം.

ഇംഗ്ലണ്ടിന്റെ പകുതിയും വെയില്‍സ് മുഴുവനും വരള്‍ച്ചയില്‍

ഇംഗ്ലണ്ടിന്റെ പകുതിയോളം പ്രദേശങ്ങളും വെയില്‍സ് മുഴുവനും വരള്‍ച്ചാ സാഹചര്യത്തിലാണെന്നാണ് എന്‍വയണ്‍മെന്റ് ഏജന്‍സിയുടെ വിലയിരുത്തല്‍. ഈ മാസം ഇതുവരെ വെയില്‍സില്‍ സാധാരണ ലഭിക്കേണ്ട മഴയുടെ എട്ട് ശതമാനവും ഇംഗ്ലണ്ടില്‍ ഏഴ് ശതമാനവും മാത്രമാണ് ലഭിച്ചത്. തെക്കന്‍ ഇംഗ്ലണ്ടിലെ ചില പ്രദേശങ്ങളില്‍ സാധാരണ മഴയുടെ ഒരു ശതമാനം മാത്രമാണ് ലഭിച്ചത്. മഴക്കുറവിനൊപ്പം ആവര്‍ത്തിച്ചുള്ള ഉഷ്ണതരംഗങ്ങള്‍ ജലത്തിന്റെ ബാഷ്പീകരണം വര്‍ധിപ്പിക്കുകയും നദികളിലെയും അരുവികളിലെയും ജലനിരപ്പ് താഴാന്‍ കാരണമാകുകയും ചെയ്തു. നദികള്‍, അരുവികള്‍, ഭൂഗര്‍ഭജല സ്രോതസ്സുകള്‍ എന്നിവയില്‍നിന്ന് കൃഷിക്കായി വെള്ളമെടുക്കുന്നതിനും ജലക്ഷാമം തടസ്സമാകുന്നുണ്ട്. ഇതോടെ കര്‍ഷകര്‍ക്ക് വിളകള്‍ സംരക്ഷിക്കുന്നതിനുള്ള ജലസേചനം പോലും നടത്താനാകാത്ത സാഹചര്യം രൂപപ്പെട്ടിരിക്കുകയാണ്.

ഭക്ഷ്യവിലയിലും പ്രത്യാഘാതമുണ്ടാകും

കാലാവസ്ഥാ വ്യതിയാനത്തിന്റെ ഫലമായി വരും വര്‍ഷങ്ങളില്‍ യുകെയിലെ വേനല്‍ക്കാലങ്ങളില്‍ കൂടുതല്‍ ശക്തവും ദീര്‍ഘവുമായ ഉഷ്ണതരംഗങ്ങള്‍ ആവര്‍ത്തിക്കാമെന്ന് വിദഗ്ധര്‍ മുന്നറിയിപ്പ് നല്‍കുന്നു. ഇതോടെ കാര്‍ഷിക മേഖലയിലെ ജലക്ഷാമം കൂടുതല്‍ രൂക്ഷമാകാനും വിളനാശം പതിവാകാനും സാധ്യതയുണ്ട്. തുടര്‍ച്ചയായ മൂന്നാം വര്‍ഷവും മോശം വിളവെടുപ്പിലേക്ക് നീങ്ങുന്നത് ബ്രിട്ടിഷ് കര്‍ഷകരുടെ സാമ്പത്തിക നിലയെ ഗുരുതരമായി ബാധിക്കുമെന്നാണ് ആശങ്ക. ആഭ്യന്തര ഉല്‍പാദനം കുറയുന്നതും ഇറക്കുമതി ചെലവ് വര്‍ധിക്കുന്നതും സാധാരണക്കാരുടെ ഭക്ഷ്യച്ചെലവ് ഉയരുന്നതിനും കാരണമായേക്കും.