ലണ്ടന്‍: വെറും 90 സെക്കന്‍ഡ് നീണ്ട വൈദ്യുതി മുടക്കം വടക്കുപടിഞ്ഞാറന്‍ ഇംഗ്ലണ്ടിലും ഗ്രേറ്റര്‍ മാഞ്ചസ്റ്റര്‍ മേഖലയിലും ആയിരക്കണക്കിന് യാത്രക്കാരുടെ യാത്ര താറുമാറാക്കി. വ്യാഴാഴ്ച വ്യാപകമായ ട്രെയിന്‍ റദ്ദാക്കലുകള്‍ക്കും മണിക്കൂറുകള്‍ നീണ്ട വൈകലുകള്‍ക്കും കാരണമായ പ്രതിസന്ധിക്കു പിന്നാലെ ഇന്ന് ഭൂരിഭാഗം സര്‍വീസുകളും സാധാരണ നിലയിലേക്ക് മടങ്ങിയതായി നെറ്റ്വര്‍ക്ക് റെയില്‍ അറിയിച്ചു. വ്യാഴാഴ്ച ഉച്ചയ്ക്ക് 1.40ഓടെയാണ് മാഞ്ചസ്റ്ററില്‍ വൈദ്യുതി വിതരണം തടസപ്പെട്ടത്. 90 സെക്കന്‍ഡ് മാത്രമാണ് വൈദ്യുതി മുടങ്ങിയതെങ്കിലും 400ലേറെ പോസ്റ്റ്കോഡ് മേഖലകളിലെ ഏകദേശം 5,000 ഉപഭോക്താക്കളെ ഇത് ബാധിച്ചു. വടക്കുപടിഞ്ഞാറന്‍ ഇംഗ്ലണ്ടിലെ റെയില്‍ ഗതാഗതം നിയന്ത്രിക്കുന്ന നെറ്റ്വര്‍ക്ക് റെയിലിന്റെ പ്രധാന ഓപ്പറേഷന്‍സ് സെന്ററിലും വൈദ്യുതി തടസ്സപ്പെട്ടു.

വൈദ്യുതി മുടങ്ങിയതിനു പിന്നാലെ ഓപ്പറേഷന്‍സ് സെന്ററിലെ ബാക്ക്-അപ്പ് വൈദ്യുതി സംവിധാനം പ്രതീക്ഷിച്ച വേഗത്തില്‍ പ്രവര്‍ത്തിക്കാതിരുന്നതാണ് സ്ഥിതി രൂക്ഷമാക്കിയത്. ഇതോടെ സിഗ്‌നലിങ് സംവിധാനങ്ങള്‍ തകരാറിലാവുകയും നിരവധി ട്രെയിനുകള്‍ വഴിയില്‍ നിര്‍ത്തിവയ്‌ക്കേണ്ടിവരികയും ചെയ്തു. ചില സിഗ്‌നലിങ് ഉപകരണങ്ങള്‍ക്ക് കേടുപാടുകള്‍ സംഭവിച്ചതിനാല്‍ അവ മാറ്റി സ്ഥാപിക്കേണ്ടിവന്നു. എന്‍ജിനീയര്‍മാര്‍ രാത്രി മുഴുവന്‍ നടത്തിയ അറ്റകുറ്റപ്പണികള്‍ക്കൊടുവിലാണ് സിഗ്‌നലിങ് സംവിധാനം പൂര്‍ണമായി പുനഃസ്ഥാപിക്കാനായത്. ഇന്ന് രാവിലെ മാഞ്ചസ്റ്റര്‍ പിക്കഡിലി, പ്രസ്റ്റണ്‍, ബര്‍മിങ്ങാം ന്യൂ സ്ട്രീറ്റ്, ലിവര്‍പൂള്‍ ലൈം സ്ട്രീറ്റ് തുടങ്ങിയ പ്രധാന സ്റ്റേഷനുകളിലെ സ്ഥിതി ഏറെ മെച്ചപ്പെട്ടു. പ്രസ്റ്റണിലും ബര്‍മിങ്ങാമിലും ഭൂരിഭാഗം ട്രെയിനുകളും സമയക്രമം പാലിച്ചു. വ്യാഴാഴ്ച വലിയ തിരക്കും അനിശ്ചിതത്വവും അനുഭവപ്പെട്ട ലിവര്‍പൂള്‍ ലൈം സ്ട്രീറ്റിലും സ്ഥിതി സാധാരണ നിലയിലായി.

എന്നാല്‍ വ്യാഴാഴ്ചത്തെ പ്രതിസന്ധിയുടെ തുടര്‍പ്രശ്‌നങ്ങള്‍ ചില സര്‍വീസുകളെ ഇപ്പോഴും ബാധിക്കുന്നുണ്ട്. ട്രെയിനുകളും ജീവനക്കാരും നിശ്ചിത സ്ഥാനങ്ങളില്‍ എത്താതിരുന്നതിനെ തുടര്‍ന്ന് ട്രാന്‍സ്പെന്നൈന്‍ എക്‌സ്പ്രസിന്റെ ചില സര്‍വീസുകളില്‍ വൈകലും റദ്ദാക്കലും തുടരുകയാണ്. യാത്ര പുറപ്പെടുന്നതിനു മുന്‍പ് ഏറ്റവും പുതിയ സര്‍വീസ് വിവരങ്ങള്‍ പരിശോധിക്കണമെന്ന് യാത്രക്കാര്‍ക്ക് നിര്‍ദേശം നല്‍കിയിട്ടുണ്ട്. സംഭവത്തില്‍ യാത്രക്കാര്‍ക്കുണ്ടായ ബുദ്ധിമുട്ടിന് നെറ്റ്വര്‍ക്ക് റെയില്‍ നോര്‍ത്ത് വെസ്റ്റ് റൂട്ട് ഡയറക്ടര്‍ ക്രിസ് റൈറ്റ് ക്ഷമ ചോദിച്ചു. സമാനമായ സംഭവം ആവര്‍ത്തിക്കാതിരിക്കാനായി സിഗ്‌നലിങ് സംവിധാനങ്ങളുടെ പ്രതിരോധശേഷി വര്‍ധിപ്പിക്കുന്നതിനുള്ള നടപടികള്‍ സ്വീകരിച്ചതായും അദ്ദേഹം അറിയിച്ചു. വൈദ്യുതി മുടക്കം എങ്ങനെയുണ്ടായി, ബാക്ക്-അപ്പ് വൈദ്യുതി സംവിധാനം യഥാസമയം പ്രവര്‍ത്തിക്കാതിരുന്നതിന്റെ കാരണം എന്ത് എന്നിവ കണ്ടെത്താന്‍ വിശദമായ അന്വേഷണം നടത്തുമെന്ന് നെറ്റ്വര്‍ക്ക് റെയില്‍ വ്യക്തമാക്കി. സംഭവത്തില്‍നിന്ന് പാഠം പഠിക്കേണ്ടതുണ്ടെന്നും കൂടുതല്‍ മെച്ചപ്പെട്ട സംവിധാനങ്ങള്‍ ഒരുക്കണമെന്നും ക്രിസ് റൈറ്റ് പറഞ്ഞു. വൈകലോ റദ്ദാക്കലോ മൂലം യാത്ര തടസ്സപ്പെട്ടവര്‍ക്ക് ബന്ധപ്പെട്ട ട്രെയിന്‍ കമ്പനികളുടെ നിബന്ധനകള്‍ അനുസരിച്ച് നഷ്ടപരിഹാരത്തിന് അര്‍ഹതയുണ്ടാകാമെന്നും അധികൃതര്‍ അറിയിച്ചു.