ലണ്ടന്‍: കുറ്റാന്വേഷണത്തിന് സഹായകരമായ മുഖം തിരിച്ചറിയല്‍ സാങ്കേതികവിദ്യയുടെ തെറ്റായ ഉപയോഗം നിരപരാധികളുടെ അറസ്റ്റിലേക്ക് നയിച്ചേക്കാമെന്ന് ഔദ്യോഗിക റിപ്പോര്‍ട്ട്. വംശീയ ന്യൂനപക്ഷ വിഭാഗങ്ങളില്‍പ്പെട്ടവരെ തെറ്റായി സംശയിക്കുന്നതിനും അറസ്റ്റ് ചെയ്യുന്നതിനും സാധ്യതയുണ്ടെന്നും റിപ്പോര്‍ട്ട് മുന്നറിയിപ്പ് നല്‍കുന്നു. ബുധനാഴ്ച പുറത്തുവിട്ട ഹിസ് മജസ്റ്റീസ് ഇന്‍സ്പെക്ടറേറ്റ് ഓഫ് കോണ്‍സ്റ്റബുലറിയുടെ റിപ്പോര്‍ട്ടിലാണ് കണ്ടെത്തലുകള്‍. കുറ്റകൃത്യങ്ങള്‍ കണ്ടെത്താന്‍ സാങ്കേതികവിദ്യ സഹായിക്കുമ്പോഴും അതിലെ പിഴവുകള്‍ ഗൗരവമായി പരിഗണിക്കണമെന്ന് റിപ്പോര്‍ട്ട് ചൂണ്ടിക്കാട്ടുന്നു.
നിലവിലുള്ള ചിത്രങ്ങളുമായി താരതമ്യം ചെയ്ത് വ്യക്തികളെ തിരിച്ചറിയുന്ന 'റെട്രോസ്പെക്ടീവ് ഫേഷ്യല്‍ റെക്കഗ്നിഷന്‍' സംവിധാനമാണ് പരിശോധനയ്ക്ക് വിധേയമാക്കിയത്. ഈ സംവിധാനം നല്‍കുന്ന ഫലം മാത്രം അറസ്റ്റിന് അടിസ്ഥാനമാക്കരുതെന്നും ഇതിന്റെ ഉപയോഗത്തെക്കുറിച്ച് ചില ഉദ്യോഗസ്ഥര്‍ക്ക് വ്യക്തമായ ധാരണയില്ലെന്നും റിപ്പോര്‍ട്ടില്‍ പറയുന്നു. ചില കേസുകളില്‍ അധിക പരിശോധനകള്‍ നടത്താതെ സാങ്കേതികവിദ്യ നല്‍കിയ ഫലത്തെ മാത്രം ആശ്രയിച്ച് പൊലീസ് നടപടിയെടുത്തതായി കണ്ടെത്തി. മങ്ങിയ ചിത്രങ്ങളും ഒന്നിലധികം മുഖങ്ങള്‍ ഉള്‍പ്പെട്ട ചിത്രങ്ങളും സംവിധാനത്തില്‍ അപ്ലോഡ് ചെയ്തതും തെറ്റായ തിരിച്ചറിയലിന് കാരണമായിട്ടുണ്ട്. മുഖം തിരിച്ചറിയല്‍ സംവിധാനത്തിന്റെ ഫലങ്ങള്‍ കൂടുതല്‍ പരിശോധനകളിലൂടെ ഉറപ്പാക്കേണ്ടതിന്റെ ആവശ്യകതയാണ് ഈ കണ്ടെത്തലുകള്‍ വ്യക്തമാക്കുന്നത്.
