|
തിന്മയ്ക്കെതിരെ യുദ്ധം ചെയ്യുമ്പോള് ദൈവത്തിന്റെ ആയുധങ്ങളായ രക്ഷയും വചനവും സത്യവും നീതിയും സമാധാനവും ധരിക്കാത്തവരാണ് പരാജയപ്പെടുന്നതെന്ന് ഗ്രേറ്റ് ബ്രിട്ടണ് രൂപതാധ്യക്ഷന് മാര് ജോസഫ് സ്രാമ്പിക്കല്. ഗ്രേറ്റ് ബ്രിട്ടണ് സീറോ മലബാര് രൂപതയുടെ മൂന്നാമത് ബൈബിള് കണ്വെന്ഷനില് കവെന്ട്രി റീജിയണില് ദിവ്യബലിയര്പ്പിച്ചു വചനസന്ദേശം നല്കുകയായിരുന്നു അദ്ദേഹം. രൂപതയുടെ വികാരി ജനറാള് വെരി റെവ. ഫാ. ജോര്ജ്ജ് തോമസ് ചേലക്കല് ഉള്പ്പെടെ പത്തിലധികം വൈദികര് ദിവ്യബലിയിലും മറ്റു ശുശ്രുഷകളിലും സഹകാര്മ്മികരരായി. ബെര്മിംഗ്ഹാമിലെ ന്യൂ ബിങ്ലി ഹാളിലായിരുന്നു ശുശ്രുഷകള്.
വി. കുര്ബ്ബാനയ്ക്ക് മുന്പായി ഈ വര്ഷത്തെ ബൈബിള് കണ്വെന്ഷന്റെ മുഖ്യ പ്രഭാഷകനും വിഖ്യാത ധ്യാനഗുരുവുമായ റെവ. ഫാ. ജോര്ജ്ജ് പനക്കല് വചനസന്ദേശം നല്കി. ക്രിസ്തുവിനോടുകൂടി കുടുംബജീവിതം ആരംഭിച്ചവര് വിജയത്തിലേക്കാണ് നടന്നടുക്കുന്നതെന്നു അദ്ദേഹം സന്ദേശത്തില് ഓര്മ്മിപ്പിച്ചു. ദൈവത്തോടുകൂടി ജീവിതം തുടങ്ങുന്നവരുടെ ജീവിതത്തെക്കുറിച്ചു ദൈവത്തിനു വ്യക്തമായ പദ്ധതിയുണ്ടന്നും അത് വിജയത്തില് എത്തിക്കാന് ദൈവം സഹായിക്കുമെന്നും അദ്ദേഹം ദമ്പതികളെ ഓര്മ്മിപ്പിച്ചു. ഇതിനായി ഓരോരുത്തര്ക്കും ഈശോയുമായി വ്യക്തിപരമായ ബന്ധവും അടുപ്പവും ഉണ്ടാകണമെന്നും അദ്ദേഹം പറഞ്ഞു.
കൊവെന്ട്രി റീജിയണല് ഡയറക്ടര് റെവ . ഫാ. ടെറിന് മുള്ളക്കര, റെവ. ഫാ. ജോജോ മാരിപ്പാട്ട് വി. സി., റെവ. ഫാ. ആന്റണി പറങ്കിമാലില് വി. സി., റെവ. ഫാ. ജോസ് പള്ളിയില് വി സി., റെവ. ഫാ. ജോസഫ് എടാട്ട് വി സി, കാവെന്ട്രി റീജിയനിലെ വിവിധ ദേവാലയങ്ങളില് ശുശ്രുഷ ചെയ്യുന്ന വൈദികര്, വോളണ്ടിയേഴ്സ് തുടങ്ങിയവര് ഏകദിന ശുശ്രുഷകള്ക്കു നേതൃത്വം നല്കി. കുട്ടികള്ക്കായി പ്രത്യേക ശുശ്രുഷകളും കുമ്പസാരത്തിനുള്ള സൗകര്യങ്ങളും ഒരുക്കിയിരുന്നു.
ബ്രിസ്റ്റോള്കാര്ഡിഫ് റീജിയണിലെ ഏകദിന ബൈബിള് കണ്വെന്ഷന് ഇന്ന് നടക്കും. ബ്രിസ്റ്റോള് ഫെയര്ഫീല്ഡ് സ്കൂളില് (BS7 9NL) രാവിലെ ഒന്പതു മുതല് വൈകിട്ട് അഞ്ചു വരെയാണ് ശുശ്രുഷകള്. രൂപതാധ്യക്ഷന് മാര് ജോസഫ് സ്രാമ്പിക്കല്, റെവ. ഫാ. ജോര്ജ്ജ് പനക്കല്, റീജിയണല് ഡയറക്ടര് ഫാ. പോള് വെട്ടിക്കാട്ട് CST, റീജിയണിലെ വൈദികര്, മറ്റു ധ്യാനശുശ്രുഷകര്, വോളണ്ടിയേഴ്സ് തുടങ്ങിയവര് നേതൃത്വം നല്കും. എല്ലാ വിശ്വാസികളെയും ഈ ഏകദിന ധ്യാനത്തിലേക്കു സ്വാഗതം ചെയ്യുന്നു |
