ലണ്ടന്: സിറിയന് പ്രസിഡന്റ് അഹമ്മദ് അല്-ഷറയ്ക്കും ആഭ്യന്തര മന്ത്രി അനസ് ഖത്താബിനുമെതിരായ ഉപരോധം ബ്രിട്ടന് പിന്വലിച്ചു. തിങ്കളാഴ്ച അല്-ഷറയും യുഎസ് പ്രസിഡന്റ് ഡൊണള്ഡ് ട്രംപും തമ്മിലുള്ള കൂടിക്കാഴ്ച നടക്കാനിരിക്കെയാണ് ഈ നീക്കം.
ഐക്യരാഷ്ട്രസഭയുടെ സുരക്ഷാ കൗണ്സില് നേരത്തെ തന്നെ സിറിയയ്ക്കെതിരായ നിയന്ത്രണങ്ങള് നീക്കാനുള്ള തീരുമാനം കൈക്കൊണ്ടിരുന്നു. അസ്ഥിരത അനുഭവിക്കുന്ന മേഖലയിലെ രാജ്യങ്ങള് തമ്മിലുള്ള ബന്ധങ്ങള് പുനഃക്രമീകരിക്കാനുള്ള അന്താരാഷ്ട്ര ശ്രമങ്ങളുടെ ഭാഗമായാണ് ബ്രിട്ടന്റെ പുതിയ നിലപാട് എന്നാണു വിലയിരുത്തല്.
ഇസ്ലാമിക് സ്റ്റേറ്റ്, അല് ഖ്വയ്ദ തുടങ്ങിയ തീവ്രവാദ ഗ്രൂപ്പുകളുമായുള്ള സംശയാസ്പദമായ ബന്ധം മുന്കൂട്ടി കാണിച്ചാണ് അല്-ഷറയും ഖത്താബും നേരത്തെ ഉപരോധത്തിന് വിധേയരായത്. എന്നാല്, മാര്ച്ചില് തന്നെ സിറിയയുടെ സെന്ട്രല് ബാങ്കിനും എണ്ണക്കമ്പനികള്ക്കുമെതിരായ ഉപരോധങ്ങള് ബ്രിട്ടീഷ് സര്ക്കാര് പിന്വലിച്ചിരുന്നു.
അന്താരാഷ്ട്ര തലത്തില് സിറിയയുമായി ബന്ധം പുനഃസ്ഥാപിക്കാനുള്ള നീക്കങ്ങള് ശക്തമാകുന്നതിനിടയിലാണ് പുതിയ തീരുമാനം.
