ലണ്ടന്‍: 90ല്‍ അധികം സ്ത്രീകളെ ലൈംഗികമായി പീഡിപ്പിച്ചതായി ആരോപിക്കപ്പെടുന്ന ബ്രിട്ടനിലെ കുപ്രസിദ്ധ കുറ്റവാളി കെവിന്‍ ലേക്ക്മാനെ 30 വര്‍ഷത്തെ തടവിന് ശേഷവും ജയിലില്‍ തന്നെ പാര്‍പ്പിക്കാന്‍ പരോള്‍ ബോര്‍ഡ് തീരുമാനിച്ചു. സ്ത്രീകള്‍ക്ക് ഇപ്പോഴും വലിയ അപകടകാരിയാണെന്ന വിലയിരുത്തലിലാണ് ബോര്‍ഡ് പ്രതിയുടെ മോചനം തടഞ്ഞത്.

1995 ഏപ്രിലിലാണ് കെവിന്‍ ലേക്ക്മാന്‍ ലൈംഗികാതിക്രമങ്ങളുടെ പേരില്‍ ജയിലിലടയ്ക്കപ്പെട്ടത്. തുടക്കത്തില്‍ 30 ഗുരുതരമായ കേസുകളാണ് ഇയാളിനെതിരെ രജിസ്റ്റര്‍ ചെയ്തത്. പിന്നീട് 90ല്‍ അധികം സ്ത്രീകള്‍ പീഡനാരോപണവുമായി മുന്നോട്ട് വന്നു. മദ്യത്തിന്റെയും ലഹരിമരുന്നിന്റെയും സ്വാധീനത്തിലായിരുന്നു ഇയാളുടെ ആക്രമണങ്ങള്‍.

'ഒരു ഓപ്ഷനും സുരക്ഷിതമല്ല'

കെവിനെ ലൈസന്‍സില്‍ വിട്ടയക്കുന്നത് സുരക്ഷിതമാണോ എന്ന് പരിശോധിക്കാനാണ് കേസ് പരോള്‍ ബോര്‍ഡിന് റഫര്‍ ചെയ്തത്. മോചനം സാധ്യമല്ലെങ്കില്‍ തുറന്ന ജയിലിലേക്ക് മാറ്റാമോ എന്നും പരിഗണിച്ചു. എന്നാല്‍, നിലവില്‍ ഒരു ഓപ്ഷനും സുരക്ഷിതമല്ലെന്ന് ബോര്‍ഡ് വ്യക്തമാക്കി. തെളിയിക്കപ്പെടാത്ത മറ്റ് ആരോപണങ്ങള്‍ ശരിയായിരിക്കാനുള്ള സാധ്യതയുണ്ടെന്നും, ഗുരുതരമായ അപകടസാധ്യതയുള്ള വ്യക്തിയാണ് പ്രതിയെന്നും ബോര്‍ഡ് നിരീക്ഷിച്ചു.

വിചാരണയിലെ രംഗങ്ങള്‍

ഒക്ടോബര്‍ 29ന് വിഡിയോ ലിങ്ക് വഴി വിചാരണയില്‍ പങ്കെടുത്ത കെവിന്‍, ആദ്യം സ്വതന്ത്രനാകുമെന്ന പ്രതീക്ഷ പ്രകടിപ്പിച്ചെങ്കിലും പിന്നീട് തുറന്ന ജയിലിലേക്ക് മാറാന്‍ താല്‍പര്യമില്ലെന്നും അടച്ച സാഹചര്യങ്ങളില്‍ തുടരാനാണ് താല്‍പര്യമെന്നും അറിയിച്ചു. 1995 ഏപ്രില്‍ 7ന് മൂന്ന് പീഡന കേസുകളിലും ഒരു പീഡനശ്രമത്തിനും കുറ്റക്കാരനായി ന്യൂകാസില്‍ ക്രൗണ്‍ കോടതി ജീവപര്യന്തം തടവിന് ശിക്ഷിച്ചിരുന്നു.

'മറ്റ് ആരോപണങ്ങള്‍ ശരിയായിരിക്കാം'

നവംബര്‍ 12ന് പുറത്തിറക്കിയ പരോള്‍ ബോര്‍ഡ് തീരുമാനത്തില്‍ തെളിയിക്കപ്പെടാത്ത ആരോപണങ്ങള്‍ക്കുറിച്ച് നിര്‍ണായകമായ പരാമര്‍ശങ്ങള്‍ ഉണ്ടായിരുന്നു. മുന്‍പ് ചെയ്ത കുറ്റകൃത്യങ്ങളുമായി സാമ്യമുള്ളതിനാല്‍, ലേക്ക്മാനെതിരായ മിക്ക ആരോപണങ്ങളും ശരിയായിരിക്കാനുള്ള സാധ്യതയുണ്ടെന്ന് ബോര്‍ഡ് ചൂണ്ടിക്കാട്ടി.

2006 ജനുവരിയോടെ ശിക്ഷാ കാലാവധി അവസാനിച്ചെങ്കിലും, 2012-2015 കാലയളവില്‍ തുറന്ന ജയിലിലേക്ക് മാറ്റാനുള്ള ശ്രമം മോശം പെരുമാറ്റവും ലഹരിമരുന്ന് പരിശോധനയിലെ പോസിറ്റീവ് ഫലവും കാരണം പരാജയപ്പെട്ടു. 2019ല്‍ ലൈസന്‍സില്‍ വിട്ടയച്ചെങ്കിലും, പോളിഗ്രാഫ് പരിശോധനയില്‍ നിബന്ധനകള്‍ പാലിക്കുന്നില്ലെന്ന് തെളിഞ്ഞതിനെ തുടര്‍ന്ന് രണ്ട് മാസത്തിനകം വീണ്ടും കസ്റ്റഡിയിലെടുത്തു.

ഇരകളുടെ പ്രതികരണം

ശിക്ഷ വിധിക്കുമ്പോള്‍ അതിജീവിതമാരില്‍ ചിലര്‍ പൊതു ഗാലറിയിലുണ്ടായിരുന്നു. വിധി പ്രഖ്യാപിച്ചപ്പോള്‍ പലരും കരയുകയും ആഹ്ലാദം പ്രകടിപ്പിക്കുകയും ചെയ്തു. 1982ലെ പുതുവത്സര ദിനത്തില്‍ നടന്ന രണ്ട് പീഡനങ്ങളും ഒരു ശ്രമവും, 1994ലെ പുതുവത്സര ദിനത്തില്‍ 18 വയസ്സുള്ള പെണ്‍കുട്ടിയെ പീഡിപ്പിച്ച കേസും ഉള്‍പ്പെടെ നിരവധി കേസുകളിലാണ് കെവിന്‍ കുറ്റക്കാരനാണെന്ന് കോടതി കണ്ടെത്തിയത്.