മാഞ്ചസ്റ്റര്‍: കടുത്ത നെഞ്ചുവേദനയെ ദഹനപ്രശ്നമായി തെറ്റായി വിലയിരുത്തിയ ഡോക്ടര്‍മാരുടെ അനാസ്ഥ മൂലം എന്‍എച്ച്എസില്‍ സേവനമനുഷ്ഠിച്ചിരുന്ന നഴ്സിന് ദാരുണാന്ത്യം. 47-കാരിയായ പോളാ ഇവേഴ്സിന്റെ മരണത്തില്‍ ഗുരുതര വീഴ്ചയുണ്ടായെന്ന് കുടുംബം ആരോപിക്കുന്നു.

വേദനയെ അവഗണിച്ചു, വീട്ടിലേക്ക് മടക്കി

2024 മാര്‍ച്ച് 8-ന് ഗ്രേറ്റര്‍ മാഞ്ചസ്റ്ററിലെ ഡെന്റണിലെ വീട്ടില്‍ കുഴഞ്ഞുവീണ നിലയില്‍ ഇവേഴ്സിനെ മകള്‍ കണ്ടെത്തുകയായിരുന്നു. മൂന്ന് ദിവസം മുന്‍പ് കടുത്ത നെഞ്ചുവേദനയുമായി ടെയിംസൈഡ് ഹോസ്പിറ്റലിലെ എമര്‍ജന്‍സി വിഭാഗത്തില്‍ എത്തിയ ഇവര്‍ പ്രസവവേദനയേക്കാള്‍ കടുത്ത വേദന അനുഭവപ്പെടുന്നുവെന്ന് പറഞ്ഞെങ്കിലും ഡോക്ടര്‍മാര്‍ ദഹനപ്രശ്നമാണെന്ന് വിധിച്ച് വീട്ടിലേക്ക് മടക്കി അയച്ചു.

ഹൃദയാര്‍ട്ടറിയില്‍ കീറല്‍; പോസ്റ്റ്മോര്‍ട്ടം വെളിപ്പെടുത്തല്‍

മരണാനന്തര പരിശോധനയില്‍ മനുഷ്യശരീരത്തിലെ പ്രധാന ആര്‍ട്ടറിയായ എയോര്‍ട്ടയില്‍ കീറലുണ്ടായിരുന്നുവെന്ന് കണ്ടെത്തി. ഓക്സിജന്‍ നിറച്ച രക്തം ശരീരത്തിലേക്ക് എത്തിക്കുന്ന ഈ ആര്‍ട്ടറിയിലെ കേടുപാട് കാര്‍ഡിയാക് അറസ്റ്റിന് കാരണമായതായി റിപ്പോര്‍ട്ട് വ്യക്തമാക്കുന്നു. ആശുപത്രിയില്‍ ഇത് കണ്ടെത്താനാകാതിരുന്നത് ഞെട്ടിക്കുന്നതാണെന്ന് കുടുംബം പറയുന്നു.

പരിചരണത്തില്‍ വീഴ്ച; കുടുംബത്തിന്റെ ആരോപണം

ഒരു എന്‍എച്ച്എസ് നഴ്സിന് ആവശ്യമായ പരിചരണവും കൃത്യമായ രോഗനിര്‍ണയവും ലഭിച്ചിരുന്നെങ്കില്‍ ഈ ദുരന്തം ഒഴിവാക്കാമായിരുന്നുവെന്ന് കുടുംബം ആരോപിക്കുന്നു. ഡോക്ടര്‍മാര്‍ അവളെ കൈവിട്ട് കളഞ്ഞുവെന്നും അതാണ് മരണത്തിലേക്ക് തള്ളിയതെന്നും കുടുംബാംഗങ്ങള്‍ പറഞ്ഞു.

നഴ്സുമാരുടെ ജോലി സമ്മര്‍ദ്ദം ഗുരുതരം

റോയല്‍ കോളജ് ഓഫ് നഴ്സിങ് നടത്തിയ പഠനത്തില്‍ 66% നഴ്സുമാര്‍ അസുഖം അനുഭവപ്പെട്ടിട്ടും ജോലി ചെയ്യേണ്ടിവന്നതായി വ്യക്തമാക്കുന്നു. 65% പേര്‍ ആരോഗ്യപ്രശ്നങ്ങള്‍ക്ക് ജോലി സമ്മര്‍ദ്ദമാണ് പ്രധാന കാരണമെന്നു പറയുന്നു. രോഗികളുടെ എണ്ണം കൂടുന്നതും ജോലി സമയം വര്‍ധിക്കുന്നതും പ്രശ്നങ്ങള്‍ രൂക്ഷമാക്കുന്നു.

ആരോഗ്യപ്രവര്‍ത്തകരുടെ സുരക്ഷയും മാനസികാരോഗ്യവും ഉറപ്പാക്കുന്ന നടപടികള്‍ അടിയന്തിരം ആവശ്യമാണെന്ന് ഈ സംഭവം വീണ്ടും ഓര്‍മ്മിപ്പിക്കുന്നു.