ലണ്ടന്‍: ബ്രിട്ടിഷ് രാജകുടുംബാംഗമായ ആന്‍ഡ്രൂ മൗണ്ട്ബാറ്റണ്‍-വിന്‍ഡ്‌സറിന്റെ വിവാദ ചിത്രം പുറത്തുവന്നതോടെ വീണ്ടും ചര്‍ച്ചകള്‍ ശക്തമാകുന്നു. തറയില്‍ കിടക്കുന്ന സ്ത്രീയുടെ മുകളില്‍ കുനിഞ്ഞിരിക്കുന്ന ആന്‍ഡ്രൂവിന്റെ ചിത്രം യുഎസ് ജസ്റ്റിസ് ഡിപ്പാര്‍ട്ട്‌മെന്റ് എപ്സ്റ്റീന്‍ ഫയലുകളുടെ ഭാഗമായി പ്രസിദ്ധീകരിച്ചതാണ്. ചിത്രത്തില്‍ ആന്‍ഡ്രൂ സ്ത്രീയുടെ വയറ്റില്‍ കൈവച്ചിരിക്കുന്നതായി കാണാം.
ചിത്രം ജെഫ്രി എപ്സ്റ്റീന്റെ മാന്‍ഹട്ടനിലെ വസതിയിലാണ് എടുത്തതെന്നാണ് കരുതപ്പെടുന്നത്. എന്നാല്‍, ചിത്രം എവിടെ പകര്‍ത്തിയതാണെന്ന് യുഎസ് ജസ്റ്റിസ് ഡിപ്പാര്‍ട്ട്‌മെന്റ് വ്യക്തമാക്കിയിട്ടില്ല. ചിത്രത്തില്‍ സ്ത്രീക്കും ആന്‍ഡ്രൂവിനും പുറമെ മറ്റൊരാളുടെ കാലുകള്‍ മാത്രം കാണപ്പെടുന്നുണ്ട്. അതിനാല്‍, ആ വ്യക്തിയുടെ തിരിച്ചറിയല്‍ സംബന്ധിച്ച് ദുരൂഹത തുടരുന്നു.
വീടിന്റെ അലങ്കാരങ്ങള്‍ വിശകലനം ചെയ്തതിലൂടെ രാജ്യാന്തര മാധ്യമങ്ങള്‍ ഇത് എപ്സ്റ്റീന്റെ മാന്‍ഹട്ടന്‍ വസതിയാണെന്ന് നിഗമനം ചെയ്തു. വലിയ ഡൈനിങ് ടേബിളിനടുത്തുള്ള പുള്ളിപ്പുലി നിറത്തിലുള്ള പ്രിന്റുള്ള കസേരകളും സമീപ മുറിയിലെ ഡയമണ്ട് പാറ്റേണ്‍ ഫ്‌ലോറും ഇതിന് തെളിവായി ചൂണ്ടിക്കാട്ടുന്നു.
ഡിസംബറില്‍ യുഎസ് അധികൃതര്‍ പുറത്തുവിട്ട വുഡി അലന്റെ ചിത്രവും ഇതേ മുറിയില്‍ നിന്നാണെന്ന് കരുതപ്പെടുന്നു. വുഡി അലനും ഭാര്യ സൂണ്‍-യി പ്രെവിനും എപ്സ്റ്റീന്റെ അപ്പര്‍ ഈസ്റ്റ് സൈഡ് ടൗണ്‍ഹൗസില്‍ പതിവ് സന്ദര്‍ശകരായിരുന്നുവെന്ന വിവരവും പുറത്തുവന്നിട്ടുണ്ട്.
ഈ പുതിയ വെളിപ്പെടുത്തലുകള്‍ രാജകുടുംബത്തെയും എപ്സ്റ്റീന്‍ കേസിനെയും ചുറ്റിപ്പറ്റിയുള്ള വിവാദങ്ങള്‍ വീണ്ടും ശക്തമാക്കുകയാണ്
