ലണ്ടന്‍: ബ്രിട്ടീഷ് പ്രതിരോധ സംവിധാനങ്ങളില്‍ ചൈനീസ് സാങ്കേതികവിദ്യയുടെ ഉപയോഗം വീണ്ടും സുരക്ഷാ ആശങ്ക ഉയര്‍ത്തുന്നു. റോയല്‍ മറൈന്‍സ് ഉപയോഗിക്കുന്ന നിരീക്ഷണ ഡ്രോണുകളില്‍ ഘടിപ്പിച്ചിരുന്ന ക്യാമറകള്‍ ചൈനയിലെ ഒരു ഐപി വിലാസവുമായി ആശയവിനിമയം നടത്തിയതായി കണ്ടെത്തിയതിനെ തുടര്‍ന്ന് ബ്രിട്ടീഷ് പ്രതിരോധ മന്ത്രാലയം ക്യാമറകളുടെ ഇന്റര്‍നെറ്റ് കണക്ഷന്‍ വിച്ഛേദിച്ചതായി റിപ്പോര്‍ട്ട്. 'ദി ഡെയിലി ടെലിഗ്രാഫ്' റിപ്പോര്‍ട്ട് പ്രകാരം, റോയല്‍ മറൈന്‍സ് ഉപയോഗിക്കുന്ന കെ3 സ്‌കൗട്ട് (K3 Scout) നിരീക്ഷണ ഡ്രോണിലാണ് വിവാദമായ ക്യാമറകള്‍ ഘടിപ്പിച്ചിരുന്നത്. ഡ്രോണിന്റെ വിവിധ ഘടകങ്ങള്‍ പ്രതിരോധ കരാറുകാരായ ക്രാക്കന്‍ ടെക്നോളജി ഗ്രൂപ്പാണ് വാങ്ങിയതെന്നാണ് വിവരം. ക്യാമറകള്‍ ചൈനയില്‍ നിര്‍മ്മിച്ചതാണെന്നും റിപ്പോര്‍ട്ടില്‍ പറയുന്നു. പതിവ് സൈബര്‍ സുരക്ഷാ പരിശോധനയ്ക്കിടെയാണ് ക്യാമറകള്‍ ചൈനീസ് ഐപി വിലാസവുമായി ആശയവിനിമയം നടത്തുന്ന വിവരം കണ്ടെത്തിയത്. തുടര്‍ന്ന് മുന്‍കരുതലിന്റെ ഭാഗമായി അവയുടെ ഇന്റര്‍നെറ്റ് കണക്റ്റിവിറ്റി വിച്ഛേദിക്കാന്‍ പ്രതിരോധ മന്ത്രാലയം നടപടി സ്വീകരിച്ചു.

'ഹാര്‍ട്ട്ബീറ്റ്' സിഗ്നലുകളെന്ന് കണ്ടെത്തല്‍

ക്യാമറകള്‍ അയച്ചിരുന്നത് 'ഹാര്‍ട്ട്ബീറ്റ് കമ്മ്യൂണിക്കേഷന്‍സ്' എന്നറിയപ്പെടുന്ന സിഗ്നലുകളാണെന്നാണ് അന്വേഷണത്തില്‍ കണ്ടെത്തിയതെന്ന് റിപ്പോര്‍ട്ടില്‍ പറയുന്നു. ഒരു ഉപകരണം പ്രവര്‍ത്തനക്ഷമമാണെന്നും സാധാരണ നിലയില്‍ പ്രവര്‍ത്തിക്കുന്നുണ്ടെന്നും അറിയിക്കാന്‍ വിവിധ നെറ്റ്വര്‍ക്ക് സംവിധാനങ്ങള്‍ ഇത്തരം സിഗ്നലുകള്‍ ഉപയോഗിക്കാറുണ്ട്. അതേസമയം, നിര്‍ണായകമായ സൈനിക വിവരങ്ങളോ ഡാറ്റയോ കൈമാറിയതായി തെളിവില്ലെന്നാണ് ബ്രിട്ടീഷ് പ്രതിരോധ മന്ത്രാലയത്തിന്റെ നിലപാട്. ഏതെങ്കിലും ഡാറ്റയിലേക്കോ സിസ്റ്റങ്ങളിലേക്കോ അനധികൃത പ്രവേശനം നടന്നതായി കണ്ടെത്തിയിട്ടില്ലെന്നും മന്ത്രാലയം വ്യക്തമാക്കി.

പതിവ് സൈബര്‍ പരിശോധനയ്ക്കിടെ കണ്ടെത്തിയ പ്രശ്‌നം

റോയല്‍ നേവി ഉപയോഗിക്കുന്ന ക്രാക്കന്‍ സംവിധാനത്തിലെ ഒരു സബ്-സിസ്റ്റത്തെ ബാധിക്കുന്ന പ്രശ്‌നമാണ് പതിവ് സൈബര്‍ സുരക്ഷാ പരിശോധനയ്ക്കിടെ കണ്ടെത്തിയതെന്ന് പ്രതിരോധ മന്ത്രാലയ വക്താവ് സ്ഥിരീകരിച്ചു. സൈനിക ഉപകരണങ്ങള്‍, നെറ്റ്വര്‍ക്കുകള്‍, ഡാറ്റ എന്നിവയുടെ സുരക്ഷ അതീവ ഗൗരവത്തോടെയാണ് പരിഗണിക്കുന്നതെന്ന് മന്ത്രാലയം വ്യക്തമാക്കി. സുരക്ഷാ വീഴ്ചകള്‍ പ്രാരംഭഘട്ടത്തില്‍ തന്നെ കണ്ടെത്തുന്ന തരത്തിലാണ് യുകെയുടെ പരിശോധനാ സംവിധാനങ്ങള്‍ രൂപകല്‍പ്പന ചെയ്തിരിക്കുന്നതെന്നും വക്താവ് പറഞ്ഞു. ചൈനീസ് സാങ്കേതികവിദ്യയുമായി ബന്ധപ്പെട്ട സുരക്ഷാ ആശങ്കകള്‍ ബ്രിട്ടനില്‍ നേരത്തെയും ചര്‍ച്ചയായ സാഹചര്യത്തില്‍, റോയല്‍ മറൈന്‍സ് ഉപയോഗിക്കുന്ന സൈനിക ഡ്രോണുകളുമായി ബന്ധപ്പെട്ട പുതിയ കണ്ടെത്തല്‍ പ്രതിരോധ സംവിധാനങ്ങളിലെ വിതരണ ശൃംഖലയുടെ സുരക്ഷയെക്കുറിച്ചുള്ള ചര്‍ച്ചകള്‍ വീണ്ടും ശക്തമാക്കുകയാണ്.