നോര്‍ത്തേണ്‍ അയര്‍ലന്‍ഡില്‍ മദ്യപിച്ച് വാഹനമോടിച്ച് അപകടമുണ്ടാക്കിയ സംഭവത്തില്‍ മലയാളിയ്ക്ക് 20 മാസം ഡ്രൈവിംഗ് വിലക്ക് ശിക്ഷ. ബെല്‍ഫാസ്റ്റ് മജിസ്ട്രേറ്റ് കോടതി 20 മാസം ഡ്രൈവിംഗ് വിലക്കും 80 മണിക്കൂര്‍ സാമൂഹിക സേവനവും ആണ് ശിക്ഷ വിധിച്ചത് . ബെല്‍ഫാസ്റ്റ് കോസ്ഗ്രേവ് കോര്‍ട്ടില്‍ താമസിക്കുന്ന 46 കാരനാണ് കോടതി ശിക്ഷ വിധിച്ചത്. പൊലീസ് പിടിയിലായപ്പോള്‍ ത്രോട്ട് ഇന്‍ഫെക്ഷന്‍ മരുന്നായാണ് മദ്യപിച്ചതെന്നായിരുന്നു മലയാളിയുടെ വാദം. പിന്നാലെ പരിശോധനയില്‍ അനുവദനീയമായതിന്റെ മൂന്നിരട്ടി മദ്യ അളവു ശരീരത്തില്‍ കണ്ടെത്തുകയായിരുന്നു.

ഏപ്രില്‍ 27ന് നോര്‍ത്ത് ബെല്‍ഫാസ്റ്റിലെ ചര്‍ച്ച് സ്ട്രീറ്റില്‍ വച്ചാണ് അപകടം. ഇവിടെ സ്‌കൂളിന് സമീപം പാര്‍ക്ക് ചെയ്തിരുന്ന വാഹനത്തില്‍ മലയാളി ഓടിച്ചിരുന്ന കാര്‍ ഇടിക്കുകയായിരുന്നു. സംഭവ സമയത്ത് കാറില്‍ മൂന്നു വയസും 11 വയസ്സുമുള്ള രണ്ടു കുട്ടികളുണ്ടായിരുന്നത് കുറ്റത്തിന്റെ വ്യാപ്തി വര്‍ധിച്ചതായി പ്രോസിക്യൂഷന്‍ കോടതിയെ അറിയിച്ചു.

വാഹനം അപകടത്തില്‍പെട്ടതിന് പിന്നാലെ കാറില്‍ നിന്നു മുങ്ങി സ്‌കൂളിലേക്ക് കയറിയ ഇയാളെ നാട്ടുകാര്‍ അറിയിച്ചതിനെ തുടര്‍ന്ന് പൊലീസെത്തി പിടികൂടുകയായിരുന്നു.