ന്യൂഡല്‍ഹി: റോള്‍സ് റോയ്സ്, ലാന്‍ഡ് റോവര്‍, ആസ്റ്റണ്‍ മാര്‍ട്ടിന്‍, മക്ലാരന്‍ തുടങ്ങിയ ബ്രിട്ടീഷ് ആഡംബര കാറുകള്‍ ഇന്ത്യയില്‍ കൂടുതല്‍ വിലക്കുറവില്‍ ലഭ്യമാകും. ജൂലൈ 15 മുതല്‍ പ്രാബല്യത്തില്‍ വരുന്ന ഇന്ത്യ-യുകെ സ്വതന്ത്ര വ്യാപാര കരാറിന്റെ ഭാഗമായി ബ്രിട്ടനില്‍ നിര്‍മിച്ച് ഇന്ത്യയിലേക്ക് പൂര്‍ണമായി ഇറക്കുമതി ചെയ്യുന്ന കാറുകളുടെ കസ്റ്റംസ് തീരുവ കുറയുന്നതാണ് ഉപഭോക്താക്കള്‍ക്ക് നേട്ടമാകുന്നത്. നിലവില്‍ 110 ശതമാനം വരെ ഈടാക്കുന്ന ഇറക്കുമതി തീരുവ, കരാറിന്റെ ആദ്യവര്‍ഷത്തില്‍ നിശ്ചിത വിലവിഭാഗങ്ങളിലുള്ള കാറുകള്‍ക്ക് 30 ശതമാനമായി കുറയും. തുടര്‍ന്നുള്ള വര്‍ഷങ്ങളില്‍ നിശ്ചിത ഇറക്കുമതി ക്വാട്ടയ്ക്കുള്ളില്‍ തീരുവ ഘട്ടംഘട്ടമായി 10 ശതമാനംവരെ താഴ്ത്താനാണ് കരാറില്‍ വ്യവസ്ഥ ചെയ്തിരിക്കുന്നത്. ആദ്യവര്‍ഷം ബ്രിട്ടനില്‍ നിര്‍മിച്ച ഏകദേശം 20,000 വാഹനങ്ങള്‍ക്കാണ് കുറഞ്ഞ തീരുവയുടെ പ്രയോജനം ലഭിക്കുകയെന്നാണ് റിപ്പോര്‍ട്ടുകള്‍. എന്നാല്‍ എല്ലാ ബ്രിട്ടീഷ് കാറുകള്‍ക്കും സ്വാഭാവികമായി ഇളവ് ലഭിക്കില്ല. നിര്‍ദിഷ്ട ഇറക്കുമതി ക്വാട്ട, വാഹനത്തിന്റെ വില, ഉത്ഭവരാജ്യവുമായി ബന്ധപ്പെട്ട മാനദണ്ഡങ്ങള്‍ എന്നിവ പാലിക്കുന്ന മോഡലുകള്‍ക്കാണ് ആനുകൂല്യം ലഭിക്കുക.

തീരുവയിലെ കുറവ് പൂര്‍ണമായി ഉപഭോക്താക്കള്‍ക്ക് കൈമാറിയാല്‍ വിവിധ മോഡലുകളുടെ വിലയില്‍ 20 മുതല്‍ 25 ശതമാനംവരെ കുറവുണ്ടാകാമെന്നാണ് വാഹനവിപണി വിദഗ്ധരുടെ വിലയിരുത്തല്‍. വിലകൂടിയ അള്‍ട്രാ ലക്ഷ്വറി മോഡലുകളില്‍ ഒരു കോടി മുതല്‍ മൂന്ന് കോടി രൂപവരെ ലാഭമുണ്ടാകാനുള്ള സാധ്യതയുമുണ്ട്. എന്നാല്‍ കമ്പനികളുടെ വിലനിര്‍ണയ നയം, വിനിമയനിരക്ക്, ചരക്കുനീക്കച്ചെലവ്, സംസ്ഥാന നികുതികള്‍ തുടങ്ങിയ ഘടകങ്ങളെ ആശ്രയിച്ചായിരിക്കും യഥാര്‍ഥ വിലക്കുറവ്.

റേഞ്ച് റോവര്‍ മോഡലുകളുടെ വില ഇതിനകം കുറച്ചു

ഇന്ത്യ-യുകെ വ്യാപാര കരാര്‍ നടപ്പാകുന്നതിന് മുന്നോടിയായി ജാഗ്വാര്‍ ലാന്‍ഡ് റോവര്‍ ഇന്ത്യ, പൂര്‍ണമായി ഇറക്കുമതി ചെയ്യുന്ന റേഞ്ച് റോവര്‍ എസ്വി, റേഞ്ച് റോവര്‍ സ്പോര്‍ട്ട് എസ്വി മോഡലുകളുടെ വില ഇതിനകം കുറച്ചിട്ടുണ്ട്. റേഞ്ച് റോവര്‍ എസ്വിയുടെ എക്സ്ഷോറൂം വില 4.25 കോടി രൂപയില്‍നിന്ന് 3.50 കോടി രൂപയായാണ് കുറച്ചത്. റേഞ്ച് റോവര്‍ സ്പോര്‍ട്ട് എസ്വിയുടെ വില 2.75 കോടി രൂപയില്‍നിന്ന് 2.35 കോടി രൂപയായും താഴ്ത്തി. ഇതോടെ ഉപഭോക്താക്കള്‍ക്ക് മോഡലിനെ ആശ്രയിച്ച് 40 ലക്ഷം മുതല്‍ 75 ലക്ഷം രൂപവരെ ലാഭിക്കാനാകും.

റോള്‍സ് റോയ്സ്, ആസ്റ്റണ്‍ മാര്‍ട്ടിന്‍, മക്ലാരന്‍ തുടങ്ങിയ കമ്പനികളും നികുതി ഇളവ് പരിഗണിച്ചുള്ള പുതുക്കിയ വിലകള്‍ പ്രഖ്യാപിക്കുമെന്നാണ് വാഹനവിപണി പ്രതീക്ഷിക്കുന്നത്. എന്നാല്‍ മിക്ക കമ്പനികളും ഇതുവരെ ഔദ്യോഗികമായി പുതിയ വിലപ്പട്ടിക പുറത്തുവിട്ടിട്ടില്ല. ഇറക്കുമതി തീരുവ കുറയുന്നത് ഇന്ത്യയിലെ അള്‍ട്രാ പ്രീമിയം കാര്‍ വിപണിയില്‍ മത്സരം വര്‍ധിപ്പിക്കുകയും ബ്രിട്ടീഷ് മോഡലുകളുടെ വില്‍പ്പന ഉയര്‍ത്തുകയും ചെയ്യുമെന്നാണ് വിലയിരുത്തല്‍. അതേസമയം, ക്വാട്ടയ്ക്ക് പുറത്തുള്ള വാഹനങ്ങള്‍ക്ക് നിലവിലുള്ള ഉയര്‍ന്ന തീരുവ തുടരുന്നതിനാല്‍ എല്ലാ മോഡലുകളിലും ഒരേ തോതിലുള്ള വിലക്കുറവ് പ്രതീക്ഷിക്കാനാവില്ല.