ലണ്ടന്: രണ്ടാഴ്ചയായി തുടരുന്ന ഉഷ്ണതരംഗത്തെ തുടര്ന്ന് ബ്രിട്ടന് 30 വര്ഷത്തിനിടയിലെ ഏറ്റവും ദൈര്ഘ്യമേറിയ വരണ്ട കാലാവസ്ഥയിലേക്ക് നീങ്ങുന്നു. ഇംഗ്ലണ്ടില് തുടര്ച്ചയായി 15 ദിവസം അളക്കാവുന്ന മഴ ലഭിച്ചിട്ടില്ലെന്നാണ് റിപ്പോര്ട്ട്. 1996 ജൂണിനുശേഷമുള്ള ഏറ്റവും നീണ്ട മഴരഹിത കാലയളവാണിതെന്ന് കാലാവസ്ഥാ വിദഗ്ധര് വ്യക്തമാക്കി. ഹെറിഫോര്ഡ്ഷയറിലെ റോസ്-ഓണ്-വൈ നഗരത്തില് തുടര്ച്ചയായി 14 ദിവസം താപനില 27 ഡിഗ്രി സെല്ഷ്യസിന് മുകളിലായിരുന്നു. രാജ്യത്ത് 30 ഡിഗ്രിക്ക് മുകളിലുള്ള താപനില തുടര്ച്ചയായി 13 ദിവസം രേഖപ്പെടുത്തിയതും 2006നുശേഷമുള്ള ഏറ്റവും നീണ്ട ഉഷ്ണകാലയളവായി. എന്നാല് 1976ല് രേഖപ്പെടുത്തിയ 16 ദിവസത്തെ റെക്കോര്ഡ് ഇത്തവണ മറികടക്കാന് സാധ്യതയില്ലെന്നാണ് വിലയിരുത്തല്. തുടര്ച്ചയായ വരണ്ട കാലാവസ്ഥയെ തുടര്ന്ന് ഇംഗ്ലണ്ടിലെ കൂടുതല് പ്രദേശങ്ങളില് ഹോസ്പൈപ്പ് ഉപയോഗത്തിന് വിലക്കേര്പ്പെടുത്തി. ലക്ഷക്കണക്കിന് ആളുകളോട് വെള്ളം മിതമായി ഉപയോഗിക്കാന് ജലവിതരണ കമ്പനികള് നിര്ദേശിച്ചിട്ടുണ്ട്. മഴ ലഭിക്കാത്തത് ജലസംഭരണികളിലെ ജലനിരപ്പിനുമേല് കടുത്ത സമ്മര്ദം സൃഷ്ടിക്കുന്നതായി അധികൃതര് മുന്നറിയിപ്പ് നല്കി.
വരണ്ട കാലാവസ്ഥയില് പുല്ലും മരങ്ങളും അതിവേഗം ഉണങ്ങുന്നതിനാല് കാട്ടുതീ ഭീഷണിയും വര്ധിച്ചിട്ടുണ്ട്. യൂറോപ്പിലെ വിവിധ രാജ്യങ്ങളില് ഇതിനകം വലിയ കാട്ടുതീയും കടുത്ത വരള്ച്ചയും റിപ്പോര്ട്ട് ചെയ്തിട്ടുണ്ട്. സ്പെയിന്, ഫ്രാന്സ്, ജര്മനി എന്നിവിടങ്ങളില് ആയിരക്കണക്കിന് ഹെക്ടര് വനപ്രദേശം കത്തിനശിച്ചു. ബ്രിട്ടനില് ഉഷ്ണതരംഗങ്ങള് കൂടുതല് പതിവാകുകയും ദൈര്ഘ്യവും തീവ്രതയും വര്ധിക്കുകയും ചെയ്യുന്നതായി മെറ്റ് ഓഫീസിന്റെ പുതിയ റിപ്പോര്ട്ടില് പറയുന്നു. കാലാവസ്ഥാ വ്യതിയാനത്തിന്റെ വ്യക്തമായ സൂചനയാണിതെന്നാണ് വിദഗ്ധരുടെ വിലയിരുത്തല്. 2026ല് മേയ്, ജൂണ്, ജൂലൈ മാസങ്ങളില് 35 ഡിഗ്രിക്ക് മുകളിലുള്ള താപനില രേഖപ്പെടുത്തിയത് രാജ്യത്തിന്റെ കാലാവസ്ഥാ ചരിത്രത്തില് ആദ്യമാണെന്നും റിപ്പോര്ട്ടില് പറയുന്നു. വാരാന്ത്യത്തോടെ വടക്കുനിന്നുള്ള തണുത്ത കാറ്റ് വീശിത്തുടങ്ങുന്നതിനാല് സ്കോട്ട്ലന്ഡിലും വടക്കന് ഇംഗ്ലണ്ടിലും ചൂടിന് നേരിയ ശമനമുണ്ടാകുമെന്നാണ് പ്രവചനം. എന്നാല് തെക്കന് ഇംഗ്ലണ്ടിലും വെയില്സിലും താപനില 24 മുതല് 29 ഡിഗ്രി സെല്ഷ്യസ് വരെ തുടര്ന്നേക്കും. ജൂലൈ അവസാനത്തോടെ ഒറ്റപ്പെട്ട മഴയ്ക്ക് സാധ്യതയുണ്ടെങ്കിലും രാജ്യത്തിന്റെ ഭൂരിഭാഗം പ്രദേശങ്ങളിലും വരണ്ട കാലാവസ്ഥ തുടരുമെന്നാണ് നിലവിലെ വിലയിരുത്തല്.
