എസെക്സ്: ഇംഗ്ലണ്ടിലെ എസെക്സില് റെട്ടന്ഡണ് ഗ്രാമത്തിനു സമീപമുള്ള വ്യവസായ സമുച്ചയത്തിലുണ്ടായ വന് തീപിടിത്തവും സ്ഫോടനവും പ്രദേശത്തെ നടുക്കി. ഒരു കെട്ടിടത്തില് സൂക്ഷിച്ചിരുന്ന രാസവളം പൊട്ടിത്തെറിച്ചതിനെത്തുടര്ന്ന് കൂണ്മേഘത്തിന്റെ ആകൃതിയില് കൂറ്റന് അഗ്നിഗോളം ആകാശത്തേക്ക് ഉയര്ന്നു. സംഭവത്തെത്തുടര്ന്ന് അഗ്നിശമനസേന 'മേജര് ഇന്സിഡന്റ്' പ്രഖ്യാപിച്ചു. നൂറിലേറെ അഗ്നിശമനസേനാംഗങ്ങളെയാണ് തീയണയ്ക്കുന്നതിനും രക്ഷാപ്രവര്ത്തനത്തിനുമായി വിന്യസിച്ചത്. സ്ഫോടനത്തിന്റെ ദൃശ്യങ്ങള് സമൂഹമാധ്യമങ്ങളില് വ്യാപകമായി പ്രചരിച്ചു. 'ബോംബ് പൊട്ടിയതുപോലെയുള്ള ശബ്ദം', 'ഭൂമി കുലുങ്ങി', 'സോണിക് ബൂം കേട്ടതുപോലെ' എന്നിങ്ങനെയാണ് ദൃക്സാക്ഷികള് സംഭവത്തെ വിശേഷിപ്പിച്ചത്. നിരവധി കിലോമീറ്റര് അകലെയുള്ള പ്രദേശങ്ങളില്പ്പോലും സ്ഫോടനത്തിന്റെ പ്രകമ്പനം അനുഭവപ്പെട്ടതായി നാട്ടുകാര് പറഞ്ഞു. തീപിടിത്തത്തില് നിരവധി വ്യവസായ യൂണിറ്റുകളും കൃഷിയിടങ്ങളില് സൂക്ഷിച്ചിരുന്ന വാഹനങ്ങളും പൂര്ണമായി കത്തിനശിച്ചു. പുക വ്യാപിച്ചതിനെത്തുടര്ന്ന് സമീപവാസികളോട് വീടുകളുടെ വാതിലുകളും ജനലുകളും അടച്ചിടാന് നിര്ദേശിച്ചു. സുരക്ഷാ മുന്കരുതലിന്റെ ഭാഗമായി ചില പ്രദേശങ്ങളില്നിന്ന് ആളുകളെ ഒഴിപ്പിക്കുകയും ചെയ്തു.
ആംബുലന്സ് സേവനം, പൊലീസ്, അപകടസാധ്യതയുള്ള മേഖലകളില് പ്രവര്ത്തിക്കുന്ന പ്രത്യേക രക്ഷാസംഘങ്ങള് എന്നിവയും സ്ഥലത്തെത്തി. രാവിലെയോടെ തീ നിയന്ത്രണവിധേയമാക്കിയെങ്കിലും പുക ഉയരുന്നത് തുടരുന്നതിനാല് പ്രത്യേക സംഘങ്ങള് സ്ഥലത്ത് തുടരുകയാണ്. തീ പൂര്ണമായി അണയ്ക്കാനുള്ള ശ്രമങ്ങള് ദിവസം മുഴുവന് തുടരുമെന്ന് അധികൃതര് അറിയിച്ചു. ''ആദ്യം കനത്ത പുകയാണ് കണ്ടത്. നോക്കിനില്ക്കുന്നതിനിടെയാണ് ഭീമന് സ്ഫോടനമുണ്ടായത്. ഓറഞ്ചും മഞ്ഞയും നിറത്തിലുള്ള കൂറ്റന് അഗ്നിഗോളം കൂണ്മേഘംപോലെ ഉയര്ന്നു. എല്ലാം കുലുങ്ങി. ഭയാനകമായ അനുഭവമായിരുന്നു,'' സംഭവസ്ഥലത്തിനു സമീപം താമസിക്കുന്ന ജാക്കി ഹെഡ് പറഞ്ഞു. ''സ്ഫോടനത്തില് പറന്നെത്തിയ ലോഹക്കഷണങ്ങള് സമീപത്തെ വയലില് വീണ് പുല്ലിന് തീപിടിച്ചു. എല്ലാം ഏതാനും നിമിഷങ്ങള്ക്കുള്ളിലാണ് സംഭവിച്ചത്,'' ജാക്കിയുടെ ഭര്ത്താവ് ഫില് ഹെഡ് പറഞ്ഞു. ''ഭൂമി കുലുങ്ങി; വീടുകളും ജനലുകളും വിറച്ചു. ഇത്ര ശക്തമായ ശബ്ദം മുമ്പ് കേട്ടിട്ടില്ല,'' പതിനഞ്ച് മൈല് അകലെയുള്ള ആഷിംഗ്ഡണില് താമസിക്കുന്ന അഡ്രിയന് വാക്കര് പറഞ്ഞു.
''രക്ഷാപ്രവര്ത്തനത്തിനിടെ ഒരു യൂണിറ്റില് സൂക്ഷിച്ചിരുന്ന രാസവളം പൊട്ടിത്തെറിക്കുകയായിരുന്നു. അതിന്റെ പ്രകമ്പനം കൗണ്ടിയുടെ വിവിധ ഭാഗങ്ങളില് അനുഭവപ്പെട്ടു. അതിനാലാണ് 'മേജര് ഇന്സിഡന്റ്' പ്രഖ്യാപിച്ചത്. സംഭവസ്ഥലത്തുണ്ടായിരുന്ന എല്ലാവരും സുരക്ഷിതരാണ്. നിലവില് പൊതുജനങ്ങള്ക്ക് കൂടുതല് അപകടസാധ്യതയില്ല,'' അഗ്നിശമനസേനാ പ്രതിനിധി ഡേവ് ബോണ്ട് അറിയിച്ചു. പ്രദേശത്തേക്ക് അനാവശ്യമായി ആരും എത്തരുതെന്നും നിയന്ത്രണങ്ങള് പൂര്ണമായി പിന്വലിക്കുന്നതുവരെ ജാഗ്രത പാലിക്കണമെന്നും അധികൃതര് നിര്ദേശിച്ചു. തീപിടിത്തത്തിന്റെ യഥാര്ഥ കാരണം കണ്ടെത്തുന്നതിനുള്ള അന്വേഷണവും ആരംഭിച്ചിട്ടുണ്ട്.
