|
യുകെ കേംബ്രിഡ്ജ്: വിശുദ്ധ ഗ്രന്ഥത്തെ അടുത്തറിയാനും ക്രൈസ്തവ വിശ്വാസമൂല്യങ്ങള് ജീവിതത്തില് പകര്ത്താനും കുട്ടികള്ക്ക് അവസരമൊരുക്കി മലങ്കര സുറിയാനി കത്തോലിക്കാ സഭയുടെ യുകെയിലെ കേംബ്രിഡ്ജ് സെന്റ് ജോണ് ഹെന്റി ന്യൂമാന് മലങ്കര കത്തോലിക്കാ മിഷനും ഇപ്സ്വിച്ച് മാര് ഇവാനിയോസ് മലങ്കര കത്തോലിക്കാ മിഷനും സംയുക്തമായി സംഘടിപ്പിച്ച മലങ്കര ബൈബിള് ഓറിയന്റേഷന് ക്യാമ്പ്-2026 ശ്രദ്ധേയമായി.
കേംബ്രിഡ്ജിന് സമീപമുള്ള സോസ്റ്റണിലെ ഔര് ലേഡി ഓഫ് ലൂര്ദ്സ് റോമന് കത്തോലിക്കാ ദൈവാലയത്തില് നടന്ന ഏകദിന ക്യാമ്പില് കേംബ്രിഡ്ജ്, ഇപ്സ്വിച്ച് മിഷനുകളിലെ കുട്ടികളും മാതാപിതാക്കളും സജീവമായി പങ്കെടുത്തു. വിശുദ്ധ കുര്ബാനയോടെയായിരുന്നു ക്യാമ്പിന് തുടക്കം.
തുടര്ന്ന് ബൈബിള് പഠനം, തിരുവചന വിചിന്തനം, ബൈബിള് കഥകളുടെ അവതരണം, ബൈബിള് ക്വിസ്, ആക്ഷന് സോങ്, ഗ്രൂപ്പ് പ്രവര്ത്തനങ്ങള് തുടങ്ങി കുട്ടികളുടെ പ്രായത്തിനും ആത്മീയ വളര്ച്ചയ്ക്കും അനുയോജ്യമായ വിവിധ പരിപാടികള് നടന്നു. ദൈവവചനത്തോടുള്ള സ്നേഹവും പ്രാര്ത്ഥനാജീവിതവും ക്രൈസ്തവ മൂല്യങ്ങളോടുള്ള പ്രതിബദ്ധതയും വളര്ത്തുക എന്ന ലക്ഷ്യത്തോടെയായിരുന്നു ക്യാമ്പ് ക്രമീകരിച്ചത്.
മിഷന് വികാരി ഫാ. ജോര്ജ് വലിയപറമ്പിലും ഔര് ലേഡി ഓഫ് ലൂര്ദ്സ് റോമന് കത്തോലിക്കാ ദൈവാലയ വികാരി ഫാ. ജോണ് മിന്ഹും ക്ലാസുകള് നയിച്ചു. കുട്ടികളുടെ വിശ്വാസരൂപീകരണത്തില് കുടുംബത്തിന്റെയും ഇടവക സമൂഹത്തിന്റെയും പങ്ക് നിര്ണായകമാണെന്നും ദൈവവചനം ജീവിതത്തിന്റെ യഥാര്ത്ഥ വഴികാട്ടിയാകണമെന്നും അവര് ഓര്മിപ്പിച്ചു.
ക്യാമ്പ് കോര്ഡിനേറ്റര് സുബീഷ് ജോസിന്റെ നേതൃത്വത്തില് ട്രസ്റ്റിമാരായ പ്രദീപ് മാത്യു, വര്ഗീസ് മാത്യു, സെക്രട്ടറി സോജി പാപ്പച്ചന്, സേഫ്ഗാര്ഡിംഗ് ലീഡ് അജു വര്ഗീസ് എന്നിവര് ക്യാമ്പിന്റെ ഏകോപനത്തിന് നേതൃത്വം നല്കി. ഗ്ലോബി മാത്യു, ദീപ്തി ജോമോന്, റേച്ചല് ജേക്കബ്, ബിനിത വര്ഗീസ്, ലിജി വര്ഗീസ്, സീനിയ ജോസഫ്, ലിഷ കിളീക്കല് സാമുവല്, മിനി ഷിനു എന്നിവരുള്പ്പെടെയുള്ള കാറ്റെക്കിസം അധ്യാപകരും നിരവധി മാതാപിതാക്കളും ക്യാമ്പിന്റെ വിജയത്തിനായി പ്രവര്ത്തിച്ചു.
ക്യാമ്പില് പങ്കെടുത്ത എല്ലാ കുട്ടികള്ക്കും സര്ട്ടിഫിക്കറ്റുകളും സമ്മാനങ്ങളും വിതരണം ചെയ്തു. കുട്ടികളുടെ ആത്മീയ വളര്ച്ചയ്ക്കും വിശ്വാസരൂപീകരണത്തിനും ഇത്തരത്തിലുള്ള സംരംഭങ്ങള് വലിയ പ്രചോദനമാണെന്ന് മാതാപിതാക്കള് അഭിപ്രായപ്പെട്ടു. വരും വര്ഷങ്ങളിലും കൂടുതല് വിപുലമായ രീതിയില് മലങ്കര ബൈബിള് ഓറിയന്റേഷന് ക്യാമ്പ് സംഘടിപ്പിക്കുമെന്ന് സംഘാടകര് അറിയിച്ചു. |
