150-ലധികം പാകിസ്ഥാനിലെ സിന്ധി സ്വദേശികളായ യുവതികള്‍ വിവാഹത്തിനായി ഇന്ത്യയിലെത്തി. ഇന്ത്യന്‍ യുവാക്കളുമായി നിശ്ചയം കഴിഞ്ഞിരുന്ന ഇവര്‍ക്ക് യാത്രാ തടസ്സങ്ങള്‍ നീങ്ങിയതോടെയാണ് ഒടുവില്‍ രാജ്യത്തേക്ക് എത്താന്‍ കഴിഞ്ഞത്.
പാകിസ്ഥാനിലെ സിന്ധ് പ്രവിശ്യയില്‍ നിന്നുള്ള കുടുംബങ്ങള്‍ തമ്മിലുള്ള വിവാഹബന്ധങ്ങള്‍ക്ക് സാധാരണയായി വാഗാ-അട്ടാരി അതിര്‍ത്തിയിലൂടെയുള്ള തടസ്സമില്ലാത്ത വീസയും യാത്രയുമാണ് സഹായകരമായിരുന്നത്. എന്നാല്‍ ജമ്മു കശ്മീരിലെ പഹല്‍ഗാമിലുണ്ടായ ഭീകരാക്രമണത്തില്‍ 26 സാധാരണക്കാര്‍ കൊല്ലപ്പെട്ടതിനെ തുടര്‍ന്ന് ഇന്ത്യ 'ഓപ്പറേഷന്‍ സിന്ദൂര്‍' ആരംഭിക്കുകയും വാഗാ-അട്ടാരി അതിര്‍ത്തി അടയ്ക്കുകയും കരമാര്‍ഗ്ഗമുള്ള യാത്രകള്‍ റദ്ദാക്കുകയും ചെയ്തു. ഇതോടെ നാഗ്പൂര്‍, റായ്പൂര്‍, ജോധ്പൂര്‍, പൂനെ തുടങ്ങിയ ഇന്ത്യന്‍ നഗരങ്ങളില്‍ വിവാഹം നടക്കേണ്ടിയിരുന്ന 150-ഓളം വധുക്കളുടെ യാത്ര പ്രതിസന്ധിയിലായി.
തുടര്‍ന്ന് പാകിസ്ഥാനിലെ സിന്ധ് പ്രവിശ്യയിലെ ഘോത്കിയിലുള്ള ഷാദാനി ദര്‍ബാര്‍ എന്ന ഹൈന്ദവ ആരാധനാലയത്തിന്റെ ആത്മീയ തലവനായ റായ്പൂര്‍ ആസ്ഥാനമായുള്ള സന്തോഷ് യുധിഷ്ഠിര്‍ലാല്‍ ഷാദാനിയെ ഈ കുടുംബങ്ങള്‍ സമീപിക്കുകയായിരുന്നു. തുടര്‍ന്ന് ക്ഷേത്ര മാനേജ്മെന്റ് കേന്ദ്ര ആഭ്യന്തര മന്ത്രാലയത്തെ സമീപ്പിക്കുകയും ഇവര്‍ക്ക് ഇന്ത്യയിലെത്താന്‍ പ്രത്യേക വീസ അനുവദിക്കണമെന്ന് അഭ്യര്‍ത്ഥിക്കുകയും ചെയ്തു. ഇതിന്റെ അടിസ്ഥാനത്തില്‍ ആഭ്യന്തര മന്ത്രാലയം പ്രത്യേക വിമാന യാത്രാ നിബന്ധനകളോടെയുള്ള വീസകള്‍ അനുവദിക്കുകയായിരുന്നു.