ലണ്ടന്‍: ഒരു പാസ്വേഡ് അത്ര വലിയ കാര്യമാണോ എന്ന് ചിന്തിച്ചേക്കാം. എന്നാല്‍ അതേ എന്നതിനുള്ള തെളിവാണ് യു.കെയില്‍ നിന്നുള്ള വാര്‍ത്ത. 158 വര്‍ഷം പഴക്കമുള്ള യു.കെ കമ്പനിയുടെ തകര്‍ച്ചയ്ക്ക് കാരണമായത് ദുര്‍ബലമായ പാസ്വേഡ്. 700 പേരുടെ തൊഴിലും നഷ്ടമായി. 158 വര്‍ഷം പഴക്കമുള്ള യുകെ ട്രാന്‍സ്പോര്‍ട്ട് കമ്പനിയായ കെഎന്‍പി ലോജിസ്റ്റിക്സിലെ 700 പേര്‍ക്കാണ് തൊഴില്‍ നഷ്ടമായത്. ഒരു ജീവനക്കാരന്റെ പാസ്വേഡ് ഊഹിച്ച്, പിന്നീട് ഡാറ്റ എന്‍ക്രിപ്റ്റ് ചെയ്യുകയും ഇന്റേണല്‍ നെറ്റ് വര്‍ക്ക് ലോക്ക് ചെയ്യുകയും ചെയ്ത് ഹാക്കര്‍മാര്‍ കമ്പനിയുടെ കമ്പ്യൂട്ടര്‍ സിസ്റ്റത്തിലേക്ക് പ്രവേശിച്ചതാണ് കാര്യങ്ങള്‍ സങ്കീര്‍ണമാക്കിയതെന്ന് ബിബിസി റിപ്പോര്‍ട്ട് ചെയ്യുന്നു. ഐടി മാനദണ്ഡങ്ങള്‍ പാലിച്ചിട്ടും സൈബര്‍ ആക്രമണ ഇന്‍ഷുറന്‍സ് ഉണ്ടായിരുന്നിട്ടും കമ്പനി സൈബര്‍ ആക്രമണത്തിന് ഇരയാവുകയായിരുന്നു.

കെഎന്‍പിയുടെ സിസ്റ്റത്തിലേക്ക് അനധികൃത ആക്സസ് നേടിയ ഹാക്കര്‍മാര്‍ ഡാറ്റ എന്‍ക്രിപ്റ്റ് ചെയ്യുകയും നിര്‍ണായക ബിസിനസ്സ് വിവരങ്ങളിലേക്കുള്ള ജീവനക്കാരുടെ പ്രവേശനം നിയന്ത്രിക്കുകയും ചെയ്തു. ആക്സസ് വീണ്ടെടുക്കാന്‍, ഡീക്രിപ്ഷന്‍ കീയ്ക്ക് പകരമായി ഹാക്കര്‍മാര്‍ ഒരു മോചനദ്രവ്യം ആവശ്യപ്പെടുകയും ചെയ്തു. എന്നാല്‍ ഹാക്കര്‍മാര്‍ ആവശ്യപ്പെട്ട കനത്ത തുക കമ്പനിക്ക് നല്‍കാന്‍ സാധിക്കാതെ വന്നതോടെ പൂര്‍ണമായ ഡാറ്റ നഷ്ടത്തിലേക്കും ഒടുവില്‍ കമ്പനിയുടെ നഷ്ടത്തിലേക്കും നയിക്കുകയായിരുന്നു.മറ്റ് പ്രമുഖ യുകെ കമ്പനികളായ M&S, Co-op, Harrods എന്നിവയും സമാനമായ ആക്രമണങ്ങള്‍ക്ക് വിധേയമായിട്ടുണ്ട്. , 6.5 ദശലക്ഷം അംഗങ്ങളുടെ ഡാറ്റകളാണ് മോഷ്ടിക്കപ്പെട്ടത്.

ദുര്‍ബലമായ സംവിധാനങ്ങളാണ് ഹാക്കര്‍മാര്‍ നിരന്തരം മുതലെടുക്കാന്‍ ശ്രമിക്കുന്നതെന്ന് നാഷണല്‍ സൈബര്‍ സെക്യൂരിറ്റി സെന്റര്‍ (എന്‍സിഎസ്സി) പ്രതിനിധി ചൂണ്ടിക്കാട്ടുന്നു. അടുത്തകാലത്തായി ഹാക്കിങ് വര്‍ധിച്ചുവരുന്നതായും നാഷണല്‍ ക്രൈം ഏജന്‍സി വിലയിരുത്തുന്നു. നൂതന സാങ്കേതിക വൈദഗ്ധ്യം ആവശ്യമില്ലാത്ത ടൂളുകളുടെയും സേവനങ്ങളുടെയും ലഭ്യതയും ഹാക്കിങ് കൂടുതല്‍ ആക്സസ് ചെയ്യുന്നത് ഇടവരുത്തുന്നുണ്ട്. സിസ്റ്റങ്ങളിലേക്ക് അനധികൃത ആക്സസ് നേടുന്നതിന് ഹാക്കര്‍മാര്‍ ഐടി ഹെല്‍പ്പ്ഡെസ്‌കുകളെ വിളിക്കുന്ന ഫോണ്‍ സ്‌കാമുകള്‍ പോലുള്ള തന്ത്രങ്ങളും ഇതില്‍ ഉള്‍പ്പെടുന്നു.