ലണ്ടന്‍: കുടുംബവീടുകള്‍ മക്കള്‍ക്കും കൊച്ചുമക്കള്‍ക്കും കൈമാറുമ്പോള്‍ ഈടാക്കുന്ന അനന്തരാവകാശ നികുതി ഒഴിവാക്കുമെന്ന വാഗ്ദാനവുമായി കണ്‍സര്‍വേറ്റീവ് പാര്‍ട്ടി നേതാവ് കെമി ബേഡനോക്ക്. ബുധനാഴ്ച നടന്ന പാര്‍ട്ടി സമ്മേളനത്തിലാണ് പുതിയ നികുതിയിളവ് പദ്ധതി പ്രഖ്യാപിച്ചത്. വീടിന്റെ മൂല്യം എത്രയായാലും അടുത്ത തലമുറയിലേക്ക് കൈമാറുമ്പോള്‍ ഇന്‍ഹെറിറ്റന്‍സ് ടാക്‌സ് ഈടാക്കില്ലെന്നാണ് നിര്‍ദേശം. ഇതിനു പുറമെ, ദമ്പതികള്‍ക്ക് വീടൊഴികെയുള്ള 10 ലക്ഷം പൗണ്ട് വരെയുള്ള ആസ്തികളും നികുതിയില്ലാതെ കൈമാറാന്‍ അവസരമൊരുക്കും. പദ്ധതി നടപ്പാക്കിയാല്‍ അനന്തരാവകാശ നികുതി നല്‍കേണ്ടിവരുന്നവരുടെ എണ്ണം പകുതിയിലധികം കുറയുമെന്നാണ് പാര്‍ട്ടിയുടെ വിലയിരുത്തല്‍.
ഏകദേശം ആറു ബില്യണ്‍ പൗണ്ട് ചെലവ് പ്രതീക്ഷിക്കുന്ന പദ്ധതിക്കുള്ള പണം ക്ഷേമപദ്ധതികളിലെ ചെലവ് വെട്ടിക്കുറച്ച് കണ്ടെത്തുമെന്ന് ബേഡനോക്ക് വ്യക്തമാക്കി. വീട് വാങ്ങുമ്പോഴുള്ള സ്റ്റാമ്പ് ഡ്യൂട്ടി ഒഴിവാക്കുക, താമസിക്കുന്ന വീടിന് മാന്‍ഷന്‍ ടാക്‌സ് ചുമത്താതിരിക്കുക, മക്കള്‍ക്കോ കൊച്ചുമക്കള്‍ക്കോ വീട് കൈമാറുമ്പോള്‍ അനന്തരാവകാശ നികുതി ഒഴിവാക്കുക എന്നിവയാണ് പാര്‍ട്ടിയുടെ നികുതിനയത്തിലെ പ്രധാന വാഗ്ദാനങ്ങളെന്ന് അവര്‍ വിശദീകരിച്ചു. സ്വന്തമായി വീട് വാങ്ങുന്നതിനെയും അധ്വാനത്തിലൂടെ സമ്പത്ത് നേടുന്നതിനെയും കണ്‍സര്‍വേറ്റീവ് പാര്‍ട്ടി പ്രോത്സാഹിപ്പിക്കുന്നുവെന്ന് ബേഡനോക്ക് പറഞ്ഞു. സമ്പാദിച്ച സ്വത്ത് അടുത്ത തലമുറയ്ക്ക് കൈമാറാനുള്ള ആഗ്രഹത്തെ സ്വാര്‍ഥതയായി കാണാനാകില്ലെന്നും അവര്‍ കൂട്ടിച്ചേര്‍ത്തു.
അതേസമയം, അനന്തരാവകാശ നികുതിയുടെ പരിധി 2031 വരെ മാറ്റമില്ലാതെ നിലനിര്‍ത്താനുള്ള ലേബര്‍ സര്‍ക്കാരിന്റെ തീരുമാനത്തെ കണ്‍സര്‍വേറ്റീവുകള്‍ വിമര്‍ശിച്ചു. ഉയര്‍ന്ന മൂല്യമുള്ള വീടുകള്‍ക്ക് മാന്‍ഷന്‍ ടാക്‌സ് ഏര്‍പ്പെടുത്താനുള്ള നീക്കത്തെയും ബേഡനോക്ക് എതിര്‍ത്തു. സ്റ്റാമ്പ് ഡ്യൂട്ടി പൂര്‍ണമായി ഒഴിവാക്കുമെന്ന മുന്‍ വാഗ്ദാനത്തിനു പിന്നാലെയാണ് കുടുംബവീടുകളെ അനന്തരാവകാശ നികുതിയില്‍നിന്ന് ഒഴിവാക്കുമെന്ന പ്രഖ്യാപനം. ഇത് കണ്‍സര്‍വേറ്റീവ് പാര്‍ട്ടിയുടെ നയവാഗ്ദാനമാണ്; നിലവില്‍ പ്രാബല്യത്തിലുള്ള നികുതിയിളവല്ല.
