ലണ്ടന്‍: ഉയരുന്ന ഊര്‍ജബില്ലുകള്‍ കുറഞ്ഞ വരുമാനമുള്ള കുടുംബങ്ങള്‍ക്ക് സൃഷ്ടിക്കുന്ന സാമ്പത്തികഭാരം ലഘൂകരിക്കാന്‍ പുതിയ സഹായപദ്ധതി പരിഗണിച്ച് ബ്രിട്ടീഷ് സര്‍ക്കാര്‍. ഈ മാസത്തെ ബജറ്റില്‍ ചാന്‍സലര്‍ ജോണ്‍ ഹീലി ഇതിനായി ഒരു ബില്യണ്‍ പൗണ്ടിലധികം നീക്കിവെച്ചേക്കുമെന്നാണ് റിപ്പോര്‍ട്ട്. നിശ്ചിത ക്ഷേമപദ്ധതികളുടെ ഗുണഭോക്താക്കളായ കുടുംബങ്ങള്‍ക്ക് ലഭിക്കുന്ന വാം ഹോംസ് ഡിസ്‌കൗണ്ട് വര്‍ധിപ്പിക്കുന്നതിനാകും തുക പ്രധാനമായും വിനിയോഗിക്കുക. നിലവിലെ 150 പൗണ്ടിന്റെ ഇളവ് 100 പൗണ്ട് കൂടി ഉയര്‍ത്തി 250 പൗണ്ടാക്കാനാണ് നിര്‍ദേശം. അധിക ചെലവ് നികുതിവരുമാനത്തില്‍നിന്ന് കണ്ടെത്താനാണ് ആലോചന.

അതേസമയം, എല്ലാ ഉപഭോക്താക്കള്‍ക്കും ആശ്വാസം ലഭിക്കുന്ന തരത്തില്‍ ഊര്‍ജബില്ലുകളില്‍ ഉള്‍പ്പെടുത്തിയിരിക്കുന്ന വിവിധ ലെവികള്‍ പൂര്‍ണമായി ഒഴിവാക്കണമെന്ന ഊര്‍ജ സെക്രട്ടറി മിയാറ്റ ഫാന്‍ബുള്ളെയുടെ നിര്‍ദേശത്തോട് ഹീലി യോജിക്കുന്നില്ലെന്നാണ് വിവരം. ലെവികള്‍ ഒഴിവാക്കിയാല്‍ ഓരോ ഉപഭോക്താവിനും 120 പൗണ്ട് വരെ ലാഭിക്കാനാകുമെന്നാണ് കണക്കുകൂട്ടല്‍. ഇറാന്‍ യുദ്ധത്തിന്റെ പശ്ചാത്തലത്തില്‍ ജനുവരിയില്‍ ഊര്‍ജവില പരിധിയില്‍ 442 പൗണ്ട് വരെ വര്‍ധനയുണ്ടാകാമെന്ന പ്രവചനം സര്‍ക്കാരിന്റെ ആശങ്ക വര്‍ധിപ്പിച്ചിട്ടുണ്ട്. ഇത്തരമൊരു വര്‍ധനയുണ്ടായാല്‍ പ്രധാനമന്ത്രി ആന്‍ഡി ബേണ്‍ഹാം പ്രഖ്യാപിച്ച വൈദ്യുതിബില്ലിലെ വാറ്റ് ഇളവിലൂടെ ലഭിക്കുന്ന നേട്ടം പൂര്‍ണമായി ഇല്ലാതാകുമെന്നാണ് വിലയിരുത്തല്‍.

പ്രതിരോധച്ചെലവിനായി അധികമായി 4.7 ബില്യണ്‍ പൗണ്ട് കണ്ടെത്തേണ്ടതും സര്‍ക്കാരിന് സാമ്പത്തിക സമ്മര്‍ദമാകുന്നുണ്ട്. ഈ സാഹചര്യത്തില്‍ എല്ലാ ഉപഭോക്താക്കള്‍ക്കുമുള്ള പൊതുവായ ഇളവിനു പകരം കുറഞ്ഞ വരുമാനമുള്ള കുടുംബങ്ങള്‍ക്ക് കൂടുതല്‍ സഹായം നല്‍കുന്ന നിര്‍ദേശത്തിനാണ് പരിഗണന. പദ്ധതിയുടെ അന്തിമരൂപം ബജറ്റ് പ്രഖ്യാപനത്തോടെ വ്യക്തമാകുമെന്നാണ് പ്രതീക്ഷ