ലണ്ടന്‍: ബ്രിട്ടനിലെ തപാല്‍ സേവന സ്ഥാപനമായ റോയല്‍ മെയില്‍ പുനഃസംഘടനയുടെ ഭാഗമായി 2027 അവസാനത്തോടെ 2,500 വരെ തസ്തികകള്‍ കുറയ്ക്കാന്‍ പദ്ധതിയിടുന്നു. പ്രധാന ഓഫീസിലെയും അനുബന്ധ സഹായ വിഭാഗങ്ങളിലെയും ജീവനക്കാരെയാണ് നിര്‍ദേശം ബാധിക്കുക. ഏകദേശം 1.31 ലക്ഷം ജീവനക്കാരുള്ള സ്ഥാപനത്തിന്റെ ആകെ തൊഴിലാളികളില്‍ രണ്ടു ശതമാനത്തില്‍ താഴെയാണ് ഈ കുറവ്.
നിര്‍ബന്ധിത പിരിച്ചുവിടല്‍ ഒഴിവാക്കി, സ്വമേധയാ ജോലി വിടുന്നതിനുള്ള പദ്ധതിയിലൂടെയും വിരമിക്കല്‍ ഉള്‍പ്പെടെയുള്ള സ്വാഭാവിക ഒഴിവുകള്‍ നികത്താതെയുമാണ് ജീവനക്കാരുടെ എണ്ണം കുറയ്ക്കാന്‍ ഉദ്ദേശിക്കുന്നത്. തപാല്‍ വിതരണക്കാര്‍, ഡ്രൈവര്‍മാര്‍, തപാല്‍ സംസ്‌കരണ വിഭാഗത്തിലെ മുന്‍നിര ജീവനക്കാര്‍ എന്നിവരുടെ തസ്തികകള്‍ കുറയ്ക്കില്ലെന്ന് കമ്പനി വ്യക്തമാക്കി. കത്തുകളുടെ എണ്ണം കുത്തനെ കുറഞ്ഞതും വേഗത്തിലുള്ള പാര്‍സല്‍ വിതരണത്തിനുള്ള ആവശ്യം വര്‍ധിച്ചതുമാണ് പുനഃസംഘടനയുടെ പശ്ചാത്തലം. ഏറ്റവും ഉയര്‍ന്ന നിലയുമായി താരതമ്യപ്പെടുത്തുമ്പോള്‍ കത്തുകളുടെ എണ്ണത്തില്‍ 70 ശതമാനത്തിലേറെ ഇടിവുണ്ടായതായി കമ്പനി അറിയിച്ചു.
ചെലവ് നിയന്ത്രിക്കുക, പ്രവര്‍ത്തനങ്ങളിലെ ആവര്‍ത്തനം ഒഴിവാക്കുക, നടപടിക്രമങ്ങള്‍ ലളിതമാക്കുക എന്നിവയാണ് മാറ്റങ്ങളിലൂടെ ലക്ഷ്യമിടുന്നത്. ഇതുവഴി ഉപഭോക്തൃസേവനം മെച്ചപ്പെടുത്താന്‍ കൂടുതല്‍ നിക്ഷേപം നടത്താനാകുമെന്ന് ചീഫ് എക്‌സിക്യൂട്ടീവ് അലിസ്റ്റര്‍ കോക്രേന്‍ പറഞ്ഞു. നിര്‍ദേശങ്ങളില്‍ തൊഴിലാളി സംഘടനകളുമായി കൂടിയാലോചന നടത്തും. നടപടികളിലുടനീളം ജീവനക്കാരോട് നീതിപൂര്‍വവും മാന്യവുമായ സമീപനം സ്വീകരിക്കുമെന്നും കമ്പനി അറിയിച്ചു.
