ലണ്ടന്‍: ബ്രിട്ടന്‍ ചാന്‍സലര്‍ റേച്ചല്‍ റീവ്സ് അവതരിപ്പിച്ച നികുതി വര്‍ദ്ധന പദ്ധതികള്‍ രാജ്യത്ത് ഭക്ഷ്യവിലക്കയറ്റം വര്‍ദ്ധിപ്പിക്കുമെന്ന് പ്രമുഖ സൂപ്പര്‍മാര്‍ക്കറ്റുകള്‍ മുന്നറിയിപ്പ് നല്‍കി. ചെലവ് സമ്മര്‍ദ്ദം ഗ്രോസറി വിലകളില്‍ നേരിയതല്ലാത്ത ഉയര്‍ച്ചയ്ക്ക് കാരണമാകുമെന്ന് ഒന്‍പത് പ്രമുഖ ഗ്രോസര്‍ സ്ഥാപനങ്ങള്‍ ചാന്‍സലറോട് കത്തില്‍ ചൂണ്ടിക്കാട്ടി.
കഴിഞ്ഞ ഒരു വര്‍ഷമായി ഈ സമ്മര്‍ദ്ദം വര്‍ദ്ധിച്ചുവരികയാണെന്നും, വരാനിരിക്കുന്ന കാലയളവില്‍ ഇത് കൂടുതല്‍ കടുപ്പമാകുമെന്നുമാണ് കത്തില്‍ സൂപ്പര്‍മാര്‍ക്കറ്റുകള്‍ വ്യക്തമാക്കിയിരിക്കുന്നത്. സാധാരണ ജനങ്ങള്‍ നേരിടുന്ന ജീവിതച്ചെലവ് പ്രതിസന്ധി കൂടി പരിഗണിക്കേണ്ടതാണെന്നും അവര്‍ ചാന്‍സലറോട് ആവശ്യപ്പെട്ടു.
ബ്രിട്ടീഷ് റീട്ടെയില്‍ കണ്‍സോര്‍ഷ്യം തയ്യാറാക്കിയ കത്തില്‍ ആസ്ദ, ടെസ്‌കോ, ആല്‍ഡീ, ഐസ്ലാന്‍ഡ്, ലിഡില്‍, മാര്‍ക്‌സ് & സ്പെന്‍സര്‍, മോറിസണ്‍സ്, സെയിന്‍സ്ബറീസ്, വെയ്റ്റ്റോസ് എന്നീ സ്ഥാപനങ്ങളുടെ എക്സിക്യൂട്ടീവുമാര്‍ ഒപ്പുവെച്ചിട്ടുണ്ട്.
ഇതിനിടെ ലേബര്‍ സര്‍ക്കാരിന്റെ രണ്ടാം ബജറ്റില്‍ ഒരു വിഷയവും സുരക്ഷിതമല്ലെന്ന മുന്നറിയിപ്പും പുറത്തുവന്നിട്ടുണ്ട്. 2 മില്ല്യണ്‍ പൗണ്ട് മൂല്യമുള്ള പ്രോപ്പര്‍ട്ടികള്‍ക്ക് 1 ശതമാനം ചാര്‍ജ് ഈടാക്കാന്‍ ചാന്‍സലര്‍ തയ്യാറാകുന്നുവെന്ന റിപ്പോര്‍ട്ടും പുറത്തുവന്നിട്ടുണ്ട്.
