ലണ്ടന്‍: രാജ്യത്തിന്റെ സാമ്പത്തിക പ്രതിസന്ധി പരിഹരിക്കാനുള്ള ശ്രമങ്ങളുടെ ഭാഗമായി, യുകെ ചാന്‍സലര്‍ റേച്ചല്‍ റീവ്സ് നികുതി വര്‍ദ്ധിപ്പിക്കാന്‍ നീക്കം ആരംഭിച്ചു. കഴിഞ്ഞ വര്‍ഷം ബില്യണ്‍ പൗണ്ടിന്റെ നികുതിവേട്ട നടത്തിയ റീവ്സ്, ഇനിയത്ര കഠിനമാകില്ലെന്ന് വാഗ്ദാനം നല്‍കിയിരുന്നെങ്കിലും, വളര്‍ച്ച മുരടിച്ചതോടെ ബജറ്റ് വിഹിതം കണ്ടെത്താന്‍ സര്‍ക്കാര്‍ പാടുപെടുകയാണ്.

20 മുതല്‍ 30 ബില്യണ്‍ പൗണ്ട് വരെ അധിക വരുമാനം കണ്ടെത്തേണ്ട അവസ്ഥയിലാണ്. ഇതോടെ ഇന്‍കം ടാക്സ് ഉള്‍പ്പെടെയുള്ള നികുതികള്‍ ഉയര്‍ത്താനുള്ള സാധ്യതയും ശക്തമായി ഉയര്‍ന്നിട്ടുണ്ട്.

വളര്‍ച്ചാ മന്ദഗതിയും നികുതി വര്‍ദ്ധനവും മൂലം ബ്രിട്ടീഷ് പൗണ്ടിന്റെ മൂല്യവും ഇടിഞ്ഞിരിക്കുകയാണ്. ഡോളറിനെതിരെ പൗണ്ട് 1.32 ഡോളറിലേക്കും യൂറോയോട് 1.3 യൂറോയിലേക്കുമാണ് താഴ്ന്നത്. കഴിഞ്ഞ രണ്ടുവര്‍ഷത്തിനിടെ ഏറ്റവും കുറഞ്ഞ നിലയിലേക്കാണ് ഇത്. ചെറിയ തോതില്‍ പിന്നീട് ഉണര്‍വുണ്ടായെങ്കിലും നിലവില്‍ 1.14 യൂറോയില്‍ സ്ഥിതര കൈവരിച്ചിരിക്കുകയാണ്.

വിപണിയില്‍ കൂടുതല്‍ ഇടിവ് ഉണ്ടാകാനുള്ള സാധ്യതയുണ്ടെന്ന് സാമ്പത്തിക വിദഗ്ധര്‍ മുന്നറിയിപ്പ് നല്‍കുന്നു. നികുതി വര്‍ദ്ധനയും സര്‍ക്കാരിന്റെ നിലവിലെ ധനകാര്യ നയവും തുടരുകയാണെങ്കില്‍ പൗണ്ട് വീണ്ടും ദുര്‍ബലമാകുമെന്ന ആശങ്കയും ഉയര്‍ന്നിട്ടുണ്ട്.