ലണ്ടന്: യുകെയിലെ വീടുകളുടെ വിലയില് മാര്ച്ച് മാസത്തില് 0.5% ഇടിവ് രേഖപ്പെടുത്തിയതായി ഹാലിഫാക്സ് പുറത്തുവിട്ട കണക്കുകള് വ്യക്തമാക്കുന്നു. ഫെബ്രുവരിയില് 0.3% വര്ധനവ് രേഖപ്പെടുത്തിയതിന് പിന്നാലെയാണ് വിലയില് ഇടിവ് ഉണ്ടായത്. മോര്ട്ട്ഗേജ് നിരക്കുകളുടെ ഉയര്ച്ചയാണ് പ്രധാന കാരണം. യുഎസ്-ഇറാന് സംഘര്ഷത്തിന്റെ പശ്ചാത്തലത്തില് ധനവിപണിയില് ഉണ്ടായ അനിശ്ചിതത്വം പലിശനിരക്കുകളില് പ്രതിഫലിക്കുകയും, വീടുവാങ്ങുന്നവരുടെ ചെലവ് വര്ധിക്കുകയും ചെയ്തു.
കുറഞ്ഞ പലിശനിരക്കില് ലഭ്യമായ നൂറുകണക്കിന് മോര്ട്ട്ഗേജ് ഓഫറുകള് വിപണിയില് നിന്ന് പിന്വലിക്കപ്പെട്ടതും വലിയ സ്വാധീനം ചെലുത്തി. 2022-ല് ലിസ് ട്രസ് അവതരിപ്പിച്ച മിനി ബജറ്റിന് ശേഷമാണ് ഇത്തരത്തില് വലിയ തോതില് മോര്ട്ട്ഗേജ് ഡീലുകള് വിപണിയില് നിന്ന് ഇല്ലാതാകുന്നത് വീണ്ടും കാണുന്നത്. എങ്കിലും, നിലവിലെ മോര്ട്ട്ഗേജ് നിരക്കുകളുടെ ഉയര്ച്ച നാല് വര്ഷം മുമ്പുണ്ടായതിനെ അപേക്ഷിച്ച് അത്ര അധികമല്ലെന്ന് ഹാലിഫാക്സ് വ്യക്തമാക്കുന്നു. അതിനാല് വിപണിയില് ചില മാറ്റങ്ങള് ഉണ്ടായാലും, വീടുകളുടെ വിലയില് വലിയ ഇടിവ് സംഭവിക്കുമെന്ന് കരുതേണ്ടതില്ലെന്നാണ് വിദഗ്ധരുടെ വിലയിരുത്തല്
