പോര്‍ട്ട്‌സ്മൗത്ത്: അമ്മയും ഇളയ സഹോദരിയും വാഹനാപകടത്തില്‍ മരിച്ചതിന്റെ ദുഃഖത്തില്‍ കഴിയുന്നതിനിടെ അച്ഛനും മരണപ്പെട്ടതോടെ രണ്ട് യുവാക്കള്‍ അനാഥരായി. പോര്‍ട്ട്‌സ്മൗത്തിലെ മേസണ്‍ (20), ബെയ്ലി (18) എന്നിവരാണ് ദുരന്തങ്ങളുടെ പരമ്പരയ്ക്ക് പിന്നാലെ ഒറ്റപ്പെട്ടത്. ഫെബ്രുവരി 22-ന് സറേയിലെ ഹിന്‍ഡ്‌ഹെഡ് തുരങ്കത്തിനടുത്തുള്ള കാരേജ് വേയില്‍ നടന്ന വാഹനാപകടത്തിലാണ് മിഷേല്‍ ഡിവൈന്‍ (43)യും മകള്‍ തിയ പാപ്വര്‍ത്ത് (7)യും മരിച്ചത്. ചുവന്ന ഫോര്‍ഡ് ഫിയസ്റ്റ കാര്‍ ഉള്‍പ്പെട്ട അപകടത്തിലാണ് ഇരുവരും കൊല്ലപ്പെട്ടത്.

ഈ ദുരന്തത്തില്‍ നിന്ന് കുടുംബം കരകയറാന്‍ ശ്രമിക്കുന്നതിനിടെയാണ് മിഷേലിന്റെ ഭര്‍ത്താവും കുട്ടികളുടെ പിതാവുമായ ടെഡ് പാപ്വര്‍ത്ത് ഉറക്കത്തിനിടെ മരിച്ചത്. സംഭവത്തെ തുടര്‍ന്ന് കുടുംബം വീണ്ടും ദുഃഖത്തിലാഴ്ന്നിരിക്കുകയാണ്. ഇതോടെ മേസണും ബെയ്ലിയും മാതാപിതാക്കളെയും സഹോദരിയെയും നഷ്ടപ്പെട്ട അവസ്ഥയിലാണ്. കുടുംബത്തിന് താമസിക്കുന്ന വീട് പോലും നഷ്ടപ്പെടാനുള്ള സാഹചര്യമുണ്ടെന്നാണ് റിപ്പോര്‍ട്ട്. ടെഡിന്റെ പേരിലുള്ള സ്‌പെയിനിലെ സ്വത്തുക്കള്‍ വില്‍പത്രമില്ലാത്തതിനാല്‍ അധികൃതര്‍ ഏറ്റെടുത്തതായും വിവരമുണ്ട്. കുടുംബത്തെ വേട്ടയാടിയ ദുരന്തങ്ങള്‍ ഇതോടെ അവസാനിച്ചില്ല. മിഷേല്‍ മരിക്കുന്നതിന് നാല് മാസം മുന്‍പാണ് ഹൃദയാഘാതത്തെ തുടര്‍ന്ന് സഹോദരി സോഫിയ മരിച്ചത്. ടെഡും മിഷേലും 22 വര്‍ഷങ്ങള്‍ക്ക് മുന്‍പാണ് വിവാഹിതരായത്.