മക്ക: ഹജ്ജ് കര്മ്മം നിര്വഹിച്ച് ലണ്ടന് മേയര് സാദിഖ് ഖാന്. ഈ വര്ഷം ഹജ്ജ് നിര്വഹിക്കാന് കഴിഞ്ഞത് വലിയ അനുഗ്രഹമാണെന്നും അല്ലാഹുവിന് നന്ദി പറയുന്നതായും അദ്ദേഹം സമൂഹമാധ്യമങ്ങളില് ചിത്രങ്ങള് പങ്കുവെച്ച് കുറിച്ചു. മേയ് 26, 2026-നാണ് സാദിഖ് ഖാന് ഹജ്ജ് അനുഭവം പങ്കുവെച്ചത്. ഹജ്ജ് മനുഷ്യരുടെ സമത്വവും ഐക്യവും പ്രതിനിധീകരിക്കുന്ന, ജീവിതം മാറ്റിമറിക്കുന്ന മഹത്തായ തീര്ഥാടനമാണെന്ന് സാദിഖ് ഖാന് പറഞ്ഞു. ഇഹ്റാം വസ്ത്രം ധരിച്ച് ലോകത്തിന്റെ വിവിധ ഭാഗങ്ങളില് നിന്നെത്തിയ തീര്ഥാടകരോടൊപ്പം നില്ക്കുന്നത്, ദൈവത്തിന് മുമ്പില് എല്ലാവരും തുല്യരാണ് എന്ന സത്യത്തിന്റെ മനോഹരമായ ഓര്മ്മപ്പെടുത്തലാണെന്നും അദ്ദേഹം വ്യക്തമാക്കി.
ഹജ്ജ് വെറും ശാരീരിക കര്മ്മങ്ങളുടെ സമാഹാരമല്ലെന്നും ആത്മീയ നവീകരണം, വിനയം, ക്ഷമ, വിശ്വാസത്തിന്റെ ആഴത്തിലുള്ള തിരിച്ചറിവ് എന്നിവയിലേക്കുള്ള യാത്രയാണെന്നും സാദിഖ് ഖാന് അഭിപ്രായപ്പെട്ടു. മരുഭൂമിയിലെ കടുത്ത ചൂടും ശാരീരിക വെല്ലുവിളികളും നിറഞ്ഞ ആചാരങ്ങള്ക്കിടയിലും ഇത് ജീവിതത്തില് ഒരിക്കല് ലഭിക്കുന്ന വിശുദ്ധമായ അനുഭവമാണെന്നും അദ്ദേഹം പറഞ്ഞു. ലണ്ടനിലെ ജനങ്ങളെയും ലോകമെമ്പാടുമുള്ള മുഴുവന് ആളുകളെയും തന്റെ പ്രാര്ഥനകളില് ഉള്പ്പെടുത്തുമെന്ന് സാദിഖ് ഖാന് അറിയിച്ചു. മക്കയിലെ കഅബയ്ക്ക് സമീപം ഇഹ്റാം ധരിച്ചുള്ള അദ്ദേഹത്തിന്റെ ചിത്രങ്ങള് സമൂഹമാധ്യമങ്ങളില് വലിയ ശ്രദ്ധ നേടുകയും ചെയ്തു. സാദിഖ് ഖാന് ലണ്ടന്റെ ആദ്യ മുസ്ലിം മേയറാണ്.
