ലണ്ടന്‍: ഈ വര്‍ഷത്തെ മൂന്നാമത്തെ ശക്തമായ ഉഷ്ണതരംഗം യുകെയെ പിടിച്ചുലയ്ക്കുന്നതിനിടെ രാജ്യത്തിന്റെ വിവിധ ഭാഗങ്ങളില്‍ ജലക്ഷാമം രൂക്ഷമാകുന്നു. കടുത്ത ചൂടും മഴക്കുറവും ജലത്തിന്റെ ഉപയോഗം കുത്തനെ ഉയര്‍ത്തിയതിനെ തുടര്‍ന്ന് അഞ്ച് ജലവിതരണ കമ്പനികള്‍ ഹോസ്‌പൈപ്പ് നിരോധനം പ്രഖ്യാപിച്ചു. പ്രാബല്യത്തില്‍ വന്നതും ഉടന്‍ നടപ്പാക്കാനിരിക്കുന്നതുമായ നിയന്ത്രണങ്ങള്‍ ഏകദേശം 1.08 കോടി ആളുകളെ ബാധിക്കുമെന്നാണ് കണക്ക്. ആംഗ്ലിയന്‍ വാട്ടര്‍, സൗത്ത് ഈസ്റ്റ് വാട്ടര്‍, സതേണ്‍ വാട്ടര്‍, കേംബ്രിഡ്ജ് വാട്ടര്‍, അഫിനിറ്റി വാട്ടര്‍ എന്നീ കമ്പനികളാണ് നിയന്ത്രണങ്ങള്‍ പ്രഖ്യാപിച്ചിരിക്കുന്നത്. പൂന്തോട്ടങ്ങളും പുല്‍ത്തകിടികളും നനയ്ക്കുക, വാഹനങ്ങള്‍ കഴുകുക, നടപ്പാതകളും മുറ്റങ്ങളും വൃത്തിയാക്കുക, നീന്തല്‍ക്കുളങ്ങളും കുട്ടികളുടെ പൂളുകളും നിറയ്ക്കുക തുടങ്ങിയ ആവശ്യങ്ങള്‍ക്ക് ഹോസ്‌പൈപ്പോ സ്പ്രിങ്ക്ളറോ ഉപയോഗിക്കുന്നതിനാണ് വിലക്ക്. ഈസ്റ്റ് ഓഫ് ഇംഗ്ലണ്ടിലെ 50 ലക്ഷത്തിലധികം ഉപഭോക്താക്കള്‍ക്കായി ആംഗ്ലിയന്‍ വാട്ടര്‍ ഏര്‍പ്പെടുത്തിയ നിരോധനം ജൂലൈ 11 ശനിയാഴ്ച പുലര്‍ച്ചെ 1.01ന് പ്രാബല്യത്തില്‍ വന്നു. ബെഡ്‌ഫോര്‍ഡ്ഷയര്‍, എസെക്‌സ്, സഫോക്ക്, നോര്‍ഫോക്, കേംബ്രിഡ്ജ്ഷയര്‍, ലിങ്കണ്‍ഷയര്‍ തുടങ്ങിയ പ്രദേശങ്ങള്‍ ഇതിന്റെ പരിധിയില്‍ വരും. ആംഗ്ലിയന്‍ വാട്ടര്‍ 2012നുശേഷം ആദ്യമായാണ് ഹോസ്‌പൈപ്പ് നിരോധനം ഏര്‍പ്പെടുത്തുന്നത്.

സൗത്ത് ഈസ്റ്റ് വാട്ടര്‍ കെന്റിലെ ഉപഭോക്താക്കള്‍ക്കായി പ്രഖ്യാപിച്ച നിരോധനം ജൂലൈ മൂന്നിന് പ്രാബല്യത്തില്‍ വന്നിരുന്നു. ഉയര്‍ന്ന താപനിലയെത്തുടര്‍ന്ന് ശുദ്ധീകരിച്ച കുടിവെള്ളത്തിന്റെ ആവശ്യകത റെക്കോര്‍ഡിന് അടുത്തെത്തിയതാണ് നിയന്ത്രണത്തിന് കാരണം. ജൂണ്‍ 24ന് കമ്പനിയുടെ ശൃംഖലയിലേക്ക് പ്രതിദിനം 68.7 കോടി ലീറ്റര്‍ വെള്ളം നല്‍കേണ്ടിവന്നതായും ഇത് ജൂണിലെ സാധാരണ ഉപയോഗത്തെക്കാള്‍ ഏകദേശം പത്ത് കോടി ലീറ്റര്‍ കൂടുതലാണെന്നും കമ്പനി വ്യക്തമാക്കി. സതേണ്‍ വാട്ടര്‍ ഹാംഷയറിലും ഐല്‍ ഓഫ് വൈറ്റിലുമുള്ള ഏകദേശം പത്ത് ലക്ഷം ഉപഭോക്താക്കള്‍ക്കായി ജൂലൈ പത്തിന് ഹോസ്‌പൈപ്പ് നിരോധനം നടപ്പാക്കി. പ്രദേശത്തെ പ്രധാന ജലസ്രോതസ്സുകളായ ടെസ്റ്റ്, ഇച്ചന്‍ നദികളിലെ ജലനിരപ്പ് താഴ്ന്നതും തുടര്‍ച്ചയായ വരണ്ട കാലാവസ്ഥയും കണക്കിലെടുത്താണ് നടപടി. കേംബ്രിഡ്ജ് വാട്ടറിന്റെ പ്രദേശങ്ങളില്‍ ജൂലൈ ഒമ്പതുമുതല്‍ നിയന്ത്രണങ്ങള്‍ പ്രഖ്യാപിച്ചിട്ടുണ്ട്. നിയമപരമായ നടപടികള്‍ ജൂലൈ 17 പുലര്‍ച്ചെ ഒന്നുമുതല്‍ പ്രാബല്യത്തില്‍ വരും. മുപ്പത് വര്‍ഷത്തിനിടെ ആദ്യമായാണ് കമ്പനി ഹോസ്‌പൈപ്പ് നിരോധനം ഏര്‍പ്പെടുത്തുന്നത്. ചൂടേറിയ കാലാവസ്ഥയില്‍ ജലോപയോഗം 30 ശതമാനം വര്‍ധിച്ചതായും പ്രതിദിനം മൂന്ന് ലക്ഷം ബാത്ത് ടബുകള്‍ നിറയ്ക്കാന്‍ ആവശ്യമായത്ര അധികവെള്ളമാണ് ഉപയോഗിക്കുന്നതെന്നും കമ്പനി അറിയിച്ചു.

അഫിനിറ്റി വാട്ടറിന്റെ സെന്‍ട്രല്‍ മേഖലയിലെ ഏകദേശം 38 ലക്ഷം ഉപഭോക്താക്കളെയും ജൂലൈ 17 മുതല്‍ നിയന്ത്രണം ബാധിക്കും. ബെഡ്‌ഫോര്‍ഡ്ഷയര്‍, ബെര്‍ക്ക്ഷയര്‍, ബക്കിങ്ഹാംഷയര്‍, എസെക്‌സ്, ഹെര്‍ട്ട്‌ഫോര്‍ഡ്ഷയര്‍, സറി, ലണ്ടന്റെ ചില ഭാഗങ്ങള്‍ എന്നിവയാണ് നിരോധനത്തിന്റെ പരിധിയില്‍ വരുന്നത്. ഇതുകൂടാതെ, യുകെയിലെ വിവിധ ജലവിതരണ കമ്പനികള്‍ കോടിക്കണക്കിന് ഉപഭോക്താക്കളോട് വെള്ളം മിതമായി ഉപയോഗിക്കാനും അത്യാവശ്യമല്ലാത്ത ഉപയോഗം ഒഴിവാക്കാനും ആവശ്യപ്പെട്ടിട്ടുണ്ട്. ഇത്തരം സ്വമേധയാ പാലിക്കേണ്ട നിയന്ത്രണങ്ങള്‍ ഫലം കാണാതിരുന്നാല്‍ കൂടുതല്‍ പ്രദേശങ്ങളിലേക്ക് ഹോസ്‌പൈപ്പ് നിരോധനം വ്യാപിപ്പിച്ചേക്കുമെന്നാണ് മുന്നറിയിപ്പ്. നിരോധനം ലംഘിക്കുന്നവര്‍ക്ക് പരമാവധി 1,000 പൗണ്ട് വരെ പിഴ ചുമത്താം. എന്നാല്‍ ഗുരുതര ആരോഗ്യപ്രശ്‌നങ്ങളുള്ളവര്‍, ബ്ലൂ ബാഡ്ജ് ഉടമകള്‍, പ്രയോറിറ്റി സര്‍വീസസ് രജിസ്റ്ററിലുള്ളവര്‍, മൃഗങ്ങളുടെ സംരക്ഷണത്തിനായി വെള്ളം ഉപയോഗിക്കുന്നവര്‍ തുടങ്ങിയവര്‍ക്ക് കമ്പനികളുടെ വ്യവസ്ഥകള്‍ അനുസരിച്ച് ഇളവുകള്‍ ലഭിക്കും. ബക്കറ്റോ വാട്ടറിങ് കാനോ ഉപയോഗിക്കുന്നതിനും മഴവെള്ളം ശേഖരിച്ച ടാങ്കുകളില്‍നിന്നുള്ള വെള്ളം ഉപയോഗിക്കുന്നതിനും സാധാരണയായി വിലക്കില്ല. തുടര്‍ച്ചയായ ചൂടും മഴക്കുറവും ഇംഗ്ലണ്ടിന്റെ വിവിധ ഭാഗങ്ങളില്‍ വരള്‍ച്ചാസാധ്യത വര്‍ധിപ്പിക്കുന്നതായി അധികൃതര്‍ മുന്നറിയിപ്പ് നല്‍കി. താപനില 35 ഡിഗ്രി സെല്‍ഷ്യസിന് മുകളിലെത്തിയതോടെ കുടിവെള്ളത്തിന്റെ ആവശ്യകതയും കുത്തനെ ഉയര്‍ന്നിട്ടുണ്ട്. വരും ദിവസങ്ങളില്‍ അത്യാവശ്യമല്ലാത്ത ജലോപയോഗം പരമാവധി കുറയ്ക്കണമെന്ന് ജലവിതരണ കമ്പനികള്‍ പൊതുജനങ്ങളോട് അഭ്യര്‍ഥിച്ചു.