ലണ്ടന്‍: ഇംഗ്ലിഷ് ചാനല്‍ വഴി ചെറുബോട്ടുകളില്‍ അനധികൃതമായി ബ്രിട്ടനിലേക്ക് കടക്കാനുള്ള ശ്രമങ്ങള്‍ തടയുന്നതില്‍ ഫ്രഞ്ച് അധികൃതരുടെ നടപടികള്‍ കൂടുതല്‍ ഫലപ്രദമാകുന്നതായി യുകെ ആഭ്യന്തര മന്ത്രാലയം. കടലില്‍വച്ചുതന്നെ ബോട്ടുകള്‍ തടയുന്നതും ഫ്രഞ്ച് തീരങ്ങളില്‍നിന്ന് അവ പുറപ്പെടുന്നത് തടയുന്നതുമുള്‍പ്പെടെയുള്ള പുതിയ നടപടികള്‍ ശക്തമാക്കിയതോടെയാണ് കൂടുതല്‍ യാത്രാശ്രമങ്ങള്‍ പരാജയപ്പെടുത്താന്‍ കഴിഞ്ഞതെന്ന് മന്ത്രാലയം വ്യക്തമാക്കി. ഈ വേനല്‍ക്കാലത്ത് നാല് വ്യത്യസ്ത ആഴ്ചകളിലായി 185 ചെറുബോട്ട് യാത്രാശ്രമങ്ങള്‍ ഫ്രഞ്ച് അധികൃതര്‍ തടഞ്ഞു. ഇതിലൂടെ ഏകദേശം 4,300 കുടിയേറ്റക്കാര്‍ ബ്രിട്ടനിലേക്ക് പുറപ്പെടുന്നത് തടയാനായെന്നാണ് ആഭ്യന്തര മന്ത്രാലയത്തിന്റെ കണക്ക്. ഇതിനുപുറമെ കടലില്‍ പ്രവേശിച്ച 12 ബോട്ടുകളും ഫ്രഞ്ച് അധികൃതര്‍ തടഞ്ഞു. ഇതില്‍ മൂന്ന് സംഭവങ്ങള്‍ കഴിഞ്ഞ രണ്ടാഴ്ചയ്ക്കിടെയാണ് നടന്നത്.

ഫ്രഞ്ച് പൊലീസ് പുറത്തുവിട്ട ദൃശ്യങ്ങളില്‍ ബോട്ടുകള്‍ പുറപ്പെടുന്നത് തടയാന്‍ ഉദ്യോഗസ്ഥര്‍ കടല്‍ത്തീരത്തേക്ക് അതിവേഗം എത്തുന്നതും ബോട്ടുകളിലേക്ക് നീങ്ങുന്നതും കാണാം. ചില സന്ദര്‍ഭങ്ങളില്‍ റബര്‍ ബോട്ടുകള്‍ കടലിലേക്ക് ഇറക്കാനാകാത്തവിധം പൊലീസ് കത്തി ഉപയോഗിച്ച് കീറിയതായും ദൃശ്യങ്ങളിലുണ്ട്. പൊലീസിന് നേരെ കുടിയേറ്റക്കാര്‍ വസ്തുക്കള്‍ എറിയുന്നതും ഒരുദ്യോഗസ്ഥന്‍ പെപ്പര്‍ സ്‌പ്രേ പ്രയോഗിക്കുന്നതും ദൃശ്യങ്ങളില്‍ കാണാം. ഏപ്രിലില്‍ യുകെയും ഫ്രാന്‍സും ഒപ്പുവച്ച അതിര്‍ത്തി സുരക്ഷാ കരാറിന് പിന്നാലെയാണ് വടക്കന്‍ ഫ്രാന്‍സിലെ നിരീക്ഷണവും പ്രതിരോധ നടപടികളും ശക്തമാക്കിയത്. മൂന്ന് വര്‍ഷത്തേക്ക് ഏകദേശം 66 കോടി പൗണ്ട് ചെലവിടുന്ന കരാറില്‍ വടക്കന്‍ ഫ്രാന്‍സിലെ പൊലീസ് സംവിധാനങ്ങള്‍ ശക്തിപ്പെടുത്താന്‍ ഏകദേശം 50 കോടി പൗണ്ടും പുതിയ പ്രതിരോധരീതികള്‍ക്കായി 16 കോടി പൗണ്ടും നീക്കിവച്ചിട്ടുണ്ട്. ഇതിന്റെ ഭാഗമായി 125 പ്രത്യേക പരിശീലനം നേടിയ ഉദ്യോഗസ്ഥരെയും വിന്യസിച്ചിട്ടുണ്ട്.

കരാര്‍ നിലവില്‍ വന്നതിന് ശേഷം ചെറുബോട്ട് യാത്രാശ്രമങ്ങളില്‍ 61 ശതമാനം വരെ ഫ്രഞ്ച് അധികൃതര്‍ തടഞ്ഞതായി യുകെ ആഭ്യന്തര മന്ത്രാലയം അറിയിച്ചു. കഴിഞ്ഞ വര്‍ഷത്തെ സമാന കാലയളവിനെ അപേക്ഷിച്ച് ഇത് അഞ്ച് ശതമാനം കൂടുതലാണ്. ഈ വര്‍ഷം ഇതുവരെ ചാനല്‍ കടന്ന് ബ്രിട്ടനിലെത്തിയവരുടെ എണ്ണം കഴിഞ്ഞ വര്‍ഷത്തെ അപേക്ഷിച്ച് ഏകദേശം 40 ശതമാനം കുറഞ്ഞിട്ടുണ്ടെങ്കിലും ആയിരക്കണക്കിന് ആളുകള്‍ ഇപ്പോഴും ചെറുബോട്ടുകളില്‍ ബ്രിട്ടനിലെത്തുന്നുണ്ട്. യുകെ-ഫ്രാന്‍സ് സഹകരണം ഇതിനകം യഥാര്‍ഥ ഫലം നല്‍കുന്നുണ്ടെന്ന് ആഭ്യന്തര സെക്രട്ടറി ഷബാന മഹ്‌മൂദ് പറഞ്ഞു. മനുഷ്യക്കടത്ത് സംഘങ്ങളുടെ പ്രവര്‍ത്തനം തകര്‍ക്കാനും ബോട്ടുകളും അനുബന്ധ ഉപകരണങ്ങളും പിടിച്ചെടുക്കാനും ബോട്ടുകള്‍ കടലിലേക്ക് ഇറങ്ങുന്നത് തടയാനും ഇരുരാജ്യങ്ങളുടെയും സംയുക്ത നടപടി സഹായിക്കുന്നുണ്ടെന്നും അവര്‍ വ്യക്തമാക്കി.

അതേസമയം, കൂടുതല്‍ ആളുകളെ ഒരേ ബോട്ടില്‍ കയറ്റി ചാനല്‍ കടത്താനുള്ള ശ്രമങ്ങള്‍ കടത്തുസംഘങ്ങള്‍ നടത്തുന്നതും അധികൃതര്‍ക്ക് വെല്ലുവിളിയാണ്. ഓഗസ്റ്റില്‍ 230 പേരെ കയറ്റിയ വലിയ ഡിങ്കി ഉള്‍പ്പെടെയുള്ള ബോട്ടുകള്‍ ചാനല്‍ കടക്കാന്‍ ഉപയോഗിച്ചിരുന്നു. ഒരേ ബോട്ടില്‍ അമിതമായി ആളുകളെ കയറ്റുന്നത് അപകടസാധ്യത വര്‍ധിപ്പിക്കുന്നതിനൊപ്പം അടിയന്തര സാഹചര്യമുണ്ടായാല്‍ രക്ഷാപ്രവര്‍ത്തനവും കൂടുതല്‍ ദുഷ്‌കരമാക്കുമെന്ന് അധികൃതര്‍ മുന്നറിയിപ്പ് നല്‍കുന്നു. ഫ്രാന്‍സില്‍നിന്ന് ബ്രിട്ടീഷ് തീരത്തേക്ക് അനധികൃതമായി ആളുകളെ എത്തിക്കുന്ന മനുഷ്യക്കടത്ത് ശൃംഖലകളെ തകര്‍ക്കുകയാണ് യുകെ-ഫ്രാന്‍സ് സഹകരണത്തിന്റെ പ്രധാന ലക്ഷ്യം. എന്നാല്‍ നിയന്ത്രണങ്ങള്‍ ശക്തമാകുന്നതിനനുസരിച്ച് കടത്തുസംഘങ്ങള്‍ പുതിയ മാര്‍ഗങ്ങളും തന്ത്രങ്ങളും സ്വീകരിക്കുന്നതിനാല്‍ അതിര്‍ത്തി സുരക്ഷാ നടപടികളും തുടര്‍ച്ചയായി പരിഷ്‌കരിക്കേണ്ടിവരുമെന്ന് ബ്രിട്ടീഷ് അധികൃതര്‍ വ്യക്തമാക്കി.