|
ദുബായില് തിരുവനന്തപുരം നെടുമങ്ങാട് ബോണക്കാട് സ്വദേശിനി ആനിമോള് ഗില്ഡ(26)യെ കൊലപ്പെടുത്തിയത് ആണ്സുഹൃത്ത് അബുദാബിയിലെ സ്വകാര്യാശുപത്രിയില് ജോലി ചെയ്യുന്ന തിരുവനന്തപുരം സ്വദേശി അബിന് ലാല് മോഹന്ലാല്(28). സംഭവശേഷം ഇന്ത്യയിലേയ്ക്ക് രക്ഷപ്പെടാന് ശ്രമിച്ച ഇയാളെ ദുബായ് രാജ്യാന്തര വിമാനത്താവളത്തില് എഐ ക്യാമറ ഉപയോഗിച്ചാണ് തിരിച്ചറിഞ്ഞതും പൊലീസ് അറസ്റ്റ് ചെയ്തതും.
ദുബായ് കരാമയില് ഈ മാസം നാലിന് വൈകിട്ട് നാല് മണിക്കായിരുന്നു കൊല നടന്നത്. കരാമ മത്സ്യമാര്ക്കറ്റിന് പിന്വശത്തെ കെട്ടിടത്തിലെ ഫ്ലാറ്റില് ഷെയറിങ് മുറിയിലായിരുന്നു ആനിമോള് കൂട്ടുകാരോടൊപ്പം താമസിച്ചിരുന്നത്. അബുദാബിയില് നിന്ന് ആനിമോളെ കാണാന് എല്ലാ ഞായറാഴ്ചയും അബിന് ലാല് ഇവിടെ വരാറുണ്ടായിരുന്നു. സംഭവദിവസം വൈകിട്ട് കൂട്ടുകാരോടൊത്ത് ചായ കുടിച്ച ശേഷം ഇരുവരും ബാല്ക്കണിയില് വച്ച് വഴക്കുണ്ടാവുകയും പെട്ടെന്ന് ആനിമോളെയും കൂട്ടി അബിന്ലാല് മുറിയിലേയ്ക്ക് കയറുകയും വാതിലടക്കുകയും ചെയ്തു.
തുടര്ന്ന് ആനിമോളുടെ നിലവിളി കേട്ട് മറ്റുള്ളവര് ഓടിക്കൂടിയപ്പോഴേയ്ക്കും അബിന് ലാല് മുറിയില് നിന്ന് ഇറങ്ങിയോടി. കത്തിക്കുത്തേറ്റ് ചോരവാര്ന്ന് പിടയുന്ന ആനിമോളെയാണ് കൂട്ടുകാര് കണ്ടത്. ഉടന് പൊലീസില് വിവരമറിയിക്കുകയും അബിന് ലാലിന്റെ ഫോട്ടോ കൈമാറുകയും ചെയ്തു. തുടര്ന്നായിരുന്നു ദുബായ് രാജ്യാന്തര വിമാനത്താവളത്തില് പ്രതിയെ അറസ്റ്റ് ചെയ്തത്. ഇയാള് പിന്നീട് പൊലീസിനോട് കുറ്റം സമ്മതിച്ചു. |
