ലണ്ടന്: ബ്രിട്ടനില് സിക്ക് പേ നിയമങ്ങളില് വന് മാറ്റം വരുത്തിയതോടെ 9.6 ദശലക്ഷം തൊഴിലാളികള്ക്ക് വലിയ സഹായം ലഭിക്കുമെന്ന് ട്രേഡ് യൂണിയന് കോണ്ഗ്രസ് വ്യക്തമാക്കി. പുതിയ നിയമപ്രകാരം, തൊഴിലാളികള്ക്ക് സിക്ക് ലീവ് എടുക്കുന്ന ആദ്യ ദിവസം മുതല് തന്നെ ശമ്പളത്തിന് അര്ഹതയുണ്ടാകും. മുന്പ് നാലാം ദിവസം മുതല് മാത്രമായിരുന്നു ഈ ആനുകൂല്യം ലഭിച്ചിരുന്നത്.
കുറഞ്ഞ വരുമാനമുള്ളവര്ക്ക് സിക്ക് പേ നിഷേധിച്ചിരുന്ന നിബന്ധനയും ഒഴിവാക്കിയതോടെ പാര്ട്ട് ടൈം ജീവനക്കാര്ക്കും കുറഞ്ഞ വേതനം വാങ്ങുന്നവര്ക്കും രോഗബാധിതരാകുമ്പോള് സാമ്പത്തിക സുരക്ഷ ഉറപ്പാക്കാന് സാധിക്കും. സ്ത്രീകള്, യുവാക്കള്, ശാരീരിക വെല്ലുവിളികള് നേരിടുന്നവര് എന്നിവര്ക്കാണ് ഈ മാറ്റം പ്രധാനമായും സഹായകരമാകുന്നത്.
സാമ്പത്തിക ബുദ്ധിമുട്ട് ഭയന്ന് അസുഖമായിരിക്കുമ്പോഴും ജോലിക്ക് പോകേണ്ടി വരുന്ന സാഹചര്യം കുറയുമെന്ന് പ്രതീക്ഷിക്കുന്നു. എന്നാല് ചെറുകിട വ്യവസായ ഉടമകള്ക്ക് ഇത് അധിക സാമ്പത്തിക ബാധ്യതയുണ്ടാക്കുമെന്ന ആശങ്കയും ഉയരുന്നുണ്ട്.
തൊഴിലാളികളുടെ പിന്തുണ
ട്രേഡ് യൂണിയന് കോണ്ഗ്രസ് നടത്തിയ സര്വേയില് 76 ശതമാനം ആളുകളും ഈ മാറ്റങ്ങളെ പിന്തുണയ്ക്കുന്നുവെന്ന് കണ്ടെത്തി. തൊഴിലാളികളുടെ അവകാശങ്ങള് സംരക്ഷിക്കുന്നതിനും സാമ്പത്തിക സുരക്ഷിതത്വം ഉറപ്പാക്കുന്നതിനുമുള്ള എംപ്ലോയ്മെന്റ് റൈറ്റ്സ് ആക്ട് 2025 ന്റെ ഭാഗമായാണ് മാറ്റങ്ങള് നടപ്പാക്കുന്നത്.
