ലണ്ടന്: ബ്രിട്ടനിലെ റസിഡന്റ് ഡോക്ടര്മാരുടെ ആറ് ദിവസത്തെ പണിമുടക്ക് എന്എച്ച്എസിന് കടുത്ത സമ്മര്ദം സൃഷ്ടിച്ചിരിക്കുകയാണ്. സമരത്തിന്റെ ലക്ഷ്യം ഗവണ്മെന്റിനെ സമ്മര്ദത്തിലാക്കുന്നതാണെങ്കിലും, രോഗികളും സഹപ്രവര്ത്തകരും വലിയ ബുദ്ധിമുട്ടിന് ഇരയാകുന്നുവെന്ന് എന്എച്ച്എസ് ഇംഗ്ലണ്ട് മേധാവി ജിം മാക്കി വ്യക്തമാക്കി. സമരത്തിന്റെ തീയതികള് പോലും ആശുപത്രി പ്രവര്ത്തനങ്ങളെ പരമാവധി ബാധിക്കത്തക്കവിധം തിരഞ്ഞെടുക്കപ്പെട്ടതാണെന്ന് അദ്ദേഹം കുറ്റപ്പെടുത്തി. ഈസ്റ്റര് അവധിക്കാലത്ത് ജീവനക്കാരുടെ കുറവ് കാരണം പകരം ഡോക്ടര്മാരെ നിയോഗിക്കുന്നത് ദുഷ്കരമായതായി ആശുപത്രികള് അറിയിക്കുന്നു.
ബ്രിട്ടീഷ് മെഡിക്കല് അസോസിയേഷന് അംഗങ്ങളായ ആയിരക്കണക്കിന് ഡോക്ടര്മാര് സമരത്തില് പങ്കെടുത്തിട്ടുണ്ട്. 2023 മുതല് നടന്നുവരുന്ന സമരങ്ങളില് ഏറ്റവും ദൈര്ഘ്യമേറിയതാണിത്. എന്എച്ച്എസിന്റെ വെയ്റ്റിംഗ് സമയം കുറയ്ക്കുന്നതിലും പൊതുജനങ്ങളുടെ തൃപ്തി ഉറപ്പാക്കുന്നതിലും ഉണ്ടായ പുരോഗതികള് നഷ്ടപ്പെടുന്നുവെന്ന് മാക്കി മുന്നറിയിപ്പ് നല്കി. എങ്കിലും, സമ്മര്ദങ്ങള്ക്കിടയിലും ആശുപത്രികള് 95% പരിചരണങ്ങള് പദ്ധതിയിട്ട രീതിയില് തന്നെ തുടരുന്നുവെന്ന് കണക്കുകള് വ്യക്തമാക്കുന്നു. സേവനം ഉറപ്പാക്കുന്ന എല്ലാ ജീവനക്കാര്ക്കും നന്ദി രേഖപ്പെടുത്തുന്നതായും എന്എച്ച്എസ് മേധാവി കൂട്ടിച്ചേര്ത്തു.
