ലണ്ടന്: യുകെയിലെ ചെറുകിട വൈദ്യുതി ഉല്പാദന കേന്ദ്രം സൈബര് ആക്രമണത്തെ തുടര്ന്ന് നാല് ദിവസത്തോളം പ്രവര്ത്തനരഹിതമായതായി റിപ്പോര്ട്ട്. കഴിഞ്ഞ ജൂലൈയില് നടന്ന ആക്രമണത്തിന് ഇറാന് ഭരണകൂടവുമായി ബന്ധമുള്ള ഹാക്കര്മാരാണ് പിന്നിലെന്നാണ് മാധ്യമ റിപ്പോര്ട്ടുകള് സൂചിപ്പിക്കുന്നത്. ആക്രമണം നടന്ന വൈദ്യുതി ഉല്പാദന കേന്ദ്രത്തിന്റെ പേരോ സ്ഥലമോ അധികൃതര് പുറത്തുവിട്ടിട്ടില്ല. സുരക്ഷാ കാരണങ്ങളാലാണ് കൂടുതല് വിവരങ്ങള് വെളിപ്പെടുത്താത്തതെന്ന് സര്ക്കാര് വ്യക്തമാക്കി. എന്നാല് സൈബര് ആക്രമണം നടന്നുവെന്ന കാര്യം അധികൃതര് സ്ഥിരീകരിച്ചിട്ടുണ്ട്. ആക്രമണത്തിന് പിന്നില് ഇറാനുമായി ബന്ധമുള്ള ഹാക്കര്മാരാണെന്ന വിവരം സര്ക്കാര് ഔദ്യോഗികമായി സ്ഥിരീകരിച്ചിട്ടില്ല. മാധ്യമ റിപ്പോര്ട്ടുകളിലൂടെയാണ് ഇറാന് ബന്ധം സംബന്ധിച്ച സൂചനകള് പുറത്തുവന്നത്. രാജ്യത്തെ വലിയ പവര് സ്റ്റേഷനെയോ നിര്ണായക ഊര്ജ അടിസ്ഥാനസൗകര്യത്തെയോ ആക്രമണം ബാധിച്ചിട്ടില്ലെന്നും ചെറിയ തോതില് വൈദ്യുതി ഉല്പാദിപ്പിക്കുന്ന ജനറേറ്ററാണ് ലക്ഷ്യമാക്കപ്പെട്ടതെന്നും യുകെ ഊര്ജസുരക്ഷാ-നെറ്റ് സീറോ വകുപ്പ് അറിയിച്ചു.
സംഭവത്തിന്റെ ഒരു ഘട്ടത്തിലും യുകെയുടെ ദേശീയ വൈദ്യുതി വിതരണ സംവിധാനത്തിന് ഭീഷണി ഉണ്ടായിരുന്നില്ലെന്നും അധികൃതര് വ്യക്തമാക്കി. സൈബര് ആക്രമണത്തെ തുടര്ന്ന് ജനറേറ്റര് ഏകദേശം നാല് ദിവസത്തോളം പ്രവര്ത്തനം നിര്ത്തിവെക്കേണ്ടിവന്നതായാണ് വിവരം. സംഭവത്തിന് പിന്നാലെ രാജ്യത്തെ വൈദ്യുതി ഉല്പാദക കമ്പനികള്ക്ക് സൈബര് ആക്രമണ സാധ്യതയെക്കുറിച്ച് സര്ക്കാര് മുന്നറിയിപ്പ് നല്കി. ഊര്ജ മേഖലയുള്പ്പെടെയുള്ള നിര്ണായക അടിസ്ഥാനസൗകര്യങ്ങളുടെ സൈബര് സുരക്ഷ കൂടുതല് ശക്തിപ്പെടുത്തുന്നതിനുള്ള നടപടികളും തുടരുകയാണ്. വൈദ്യുതി ആവശ്യകത ഉയരുന്ന സമയങ്ങളില് ഗ്രിഡിലേക്ക് അധിക വൈദ്യുതി നല്കുന്നതിനായി യുകെയില് നിരവധി ചെറുകിട ഗ്യാസ് ജനറേറ്ററുകള് പ്രവര്ത്തിക്കുന്നുണ്ട്. ഇത്തരം സംവിധാനങ്ങളുടെ സുരക്ഷ ഉറപ്പാക്കുന്നത് രാജ്യത്തിന്റെ ഊര്ജ പ്രതിരോധശേഷിയില് നിര്ണായകമാണെന്നാണ് വിലയിരുത്തല്. സൈബര് ആക്രമണ ശേഷിയില് ശക്തമായ രാജ്യങ്ങളിലൊന്നായാണ് ഇറാന് ദീര്ഘകാലമായി കണക്കാക്കപ്പെടുന്നത്. അമേരിക്കയുമായും മറ്റ് പാശ്ചാത്യ രാജ്യങ്ങളുമായും നിലനില്ക്കുന്ന സംഘര്ഷങ്ങളുടെ പശ്ചാത്തലത്തില് ഇറാനുമായി ബന്ധമുള്ള സൈബര് സംഘങ്ങളില് നിന്നുള്ള ആക്രമണസാധ്യതയെക്കുറിച്ച് പാശ്ചാത്യ രാജ്യങ്ങള് ജാഗ്രത തുടരുകയാണ്.
